ଥରେ କଳ୍ପନା କରନ୍ତୁ, ଆପଣଙ୍କ ଘରର କାନ୍ଥରେ ଗୋଟେ ଅସରପା ଚାଲୁଛି । ଆମେ ସାଧାରଣତଃ ଭାବୁ, ହଁ ଗୋଟେ ପୋକ ଚାଲୁଛି । କିନ୍ତୁ ଯଦି ସେହି ଅସରପା ଚୁପଚାପ ଆପଣଙ୍କ ଭିଡିଓ କରୁଛି? ଯଦି ସେହି ପୋକ ଗୋଟିଏ ଦେଶର ଗୁପ୍ତଚର ସାଜିଛି? ଶୁଣିଲେ ଏହା କୌଣସି ସିନେମାର କାହାଣୀ ପରି ଲାଗୁଥାଇ ପରେ… କିନ୍ତୁ ଏହା ଏବେ ସତ ହେବାକୁ ଯାଉଛି । ଡ୍ରୋନ୍ ପରେ ଏବେ ଆସୁଛି “ଗୁପ୍ତଚର କୋକ୍ରୋଚ୍”!

ଯୁଦ୍ଧର ମଇଦାନରେ ଏବେ ପ୍ରବେଶ କରୁଛି ନୂଆ ନୂଆ ଟେକ୍ନୋଲୋଜି । ଜର୍ମାନୀର ନୂଆ ବାୟୋ ରୋବଟ ଟେକ୍ନୋଲୋଜି ସାହାଯ୍ୟରେ ଅସରପା ଏବେ ଗୁପ୍ତଚର ର ଭୂମିକା ଗ୍ରହଣ କରିବାକୁ ଯାଉଛି । ଯେଉଁଠାରେ ଡ୍ରୋନ୍ ପହଞ୍ଚି ପାରେନି ସେଠାରେ ପହଞ୍ଚିଯିବ ଏବେ ଏହି କୋକ୍ରୋଚ୍ ବା ଅସରପା ! ଜର୍ମାନୀର ଏକ ଟେକ୍ ଷ୍ଟାର୍ଟଅପ 'ସ୍ୱାର୍ମ ବାୟୋଟିକ୍ସ' ଏମିତି ଏକ ଟେକ୍ନୋଲୋଜି ଉପରେ କାମ କରୁଛି, ଯାହା ସାଧାରଣ ଅସରପାକୁ “ବାୟୋ-ରୋବଟ୍” ରେ ପରିଣତ କରିବାକୁ ଯାଉଛି । ଏହି ପୋକଙ୍କ ପିଠିରେ ଲଗାଯାଉଛି ଛୋଟ 'ଇଲେକ୍ଟ୍ରୋନିକ୍ ବ୍ୟାକପ୍ୟାକ୍' । ଏହି ହାଲୁକା ଉପକରଣଗୁଡିକୁ ନିଜର ଶରୀର ସହିତ ବହନ କରିପାରିବ । ବର୍ତ୍ତମାନ ଏଥିରେ ପ୍ରାୟ ୧୦ ରୁ ୧୫ ଗ୍ରାମ ପର୍ଯ୍ୟନ୍ତ ମାଇକ୍ରୋ ବ୍ୟାକପ୍ୟାକ୍ ଲାଗାଯାଇପାରିବ । ଯେଉଁଥିରେ ରହିବ କ୍ୟାମେରା, ସେନ୍ସର, ମାଇକ୍ରୋଚିପ୍ ଓ ୱାୟାରଲେସ୍ ସିଷ୍ଟମ୍ । ଏହି ସିଷ୍ଟମ୍ ଦ୍ୱାରା ବୈଜ୍ଞାନିକମାନେ ଅସରପାର ଗତିକୁ ନିୟନ୍ତ୍ରଣ କରି ପାରିବେ । ଅର୍ଥାତ୍, କୋକ୍ରୋଚ୍ ଯେଉଁଠି ପହଞ୍ଚିବ, ସେଠାକାର ତଥ୍ୟ ଓ ଭିଡିଓ ସିଧାସଳଖ ଅପରେଟରଙ୍କ ପାଖକୁ ପହଞ୍ଚିଯିବ ।

ଆପଣଙ୍କ ମନକୁ ପ୍ରଶ୍ନ ଆସିପାରେ ବୈଜ୍ଞାନିକମାନେ ଅସରପାକୁ କାହିଁକି ବାଛିଲେ? କାରଣ ଅସରପା ଅତ୍ୟନ୍ତ ଛୋଟ, ଦୃଢ଼ ଓ ସଙ୍କୀର୍ଣ୍ଣ ଜାଗାରେ ମଧ୍ୟ ସହଜରେ ପଶିପାରନ୍ତି । ଭଙ୍ଗା ଘର, ଟନେଲ୍, ଯୁଦ୍ଧର ଧ୍ୱଂସସ୍ଥଳ.... ଯେଉଁଠାରେ ଡ୍ରୋନ୍ ବା ରୋବଟ୍ ପହଞ୍ଚି ପାରେନି, ସେଠାକୁ ଏହି “କୋକ୍ରୋଚ୍ ଗୁପ୍ତଚର” ଯାଇପାରିବ । ସବୁଠାରୁ ବଡ଼ କଥା ହେଉଛି ଅସରପା ପ୍ରାୟ ସବୁଯାଗାରେ ଦେଖିବାକୁ ମିଳନ୍ତି । ଏଣୁ ଅସରପା ଟିଏ ଦେଖିଲେ କେହି ହଠାତ ଗୁପ୍ତଚର ବୋଲି ସନ୍ଦେହ କରିନପାରନ୍ତି । ଏହା ବିଜ୍ଞାନର ପ୍ରୟୋଗ ନୁହେଁ, ଏହା ଆସନ୍ତା ଯୁଦ୍ଧର ନୂଆ ରଣନୀତି କୌଶଳ । ରୁଷ-ୟୁକ୍ରେନ୍ ଯୁଦ୍ଧ ପରେ ୟୁରୋପର ଅନେକ ଦେଶ ନିଜ ସୁରକ୍ଷା ନୀତିକୁ ଆଧୁନିକ କରୁଛନ୍ତି । ଜର୍ମାନୀ ମଧ୍ୟ ଡିଫେନ୍ସ ଟେକ୍ନୋଲୋଜିରେ ବହୁତ ଅର୍ଥ ଲଗାଉଛି, ଏବଂ ଏହି ବାୟୋ ରୋବଟିକ ପ୍ରୋଜେକ୍ଟ ସେହି ଯୋଜନାର ଅଂଶ ।

ସାମରିକ ବିଶ୍ଳେଷକମାନେ କହୁଛନ୍ତି, ଭବିଷ୍ୟତର ଯୁଦ୍ଧ କେବଳ ଗୋଳା, ବାରୁଦ ବା ଟ୍ୟାଙ୍କର ସାହାଯ୍ୟରେ ହେବନାହିଁ । ଆସନ୍ତା ସମୟରେ ସୂଚନା ଓ ଗୁପ୍ତ ନିରୀକ୍ଷଣ ହେବ ସବୁଠୁ ବଡ଼ ଶକ୍ତି । ତେବେ ଏହି ଅସରପାମାନେ ଏଆଇ ସହାୟତାରେ ଗୋଟିଏ ସ୍ୱାର୍ମ୍ ଭାବେ ମଧ୍ୟ ଏକ ବଡ଼ ସ୍ଥାନ ଉପରେ ମଧ୍ୟ ନଜର ରଖିପାରିବେ । ଅର୍ଥାତ୍ ଗୋଟିଏ ସମୟରେ ଶତାଧିକ ପୋକ ଗୁପ୍ତ ତଥ୍ୟ ସଂଗ୍ରହ କରିପାରିବେ । କିନ୍ତୁ ଏହି ଟେକ୍ନୋଲୋଜି ନେଇ ନୂଆ ପ୍ରଶ୍ନ ମଧ୍ୟ ଉଠୁଛି, ଯଦି ପୋକମାନେ ମଧ୍ୟ ଗୁପ୍ତଚର ହୋଇଯିବେ, ତେବେ ଗୋପନୀୟତା କେଉଁଠି ରହିବ? ଆସନ୍ତା ଦିନରେ ଯୁଦ୍ଧର ମାଇଦାନରେ ଡ୍ରୋନ୍ ନୁହେଁ… ଅସରପାମାନେ ସାଜିବେ କି ସବୁଠାରୁ ଭୟଙ୍କର ଗୁପ୍ତଚର?

ପଢନ୍ତୁ ଏହି ଖବର: ଇଣ୍ଟରନେଟ୍ ଦୁନିଆର ରହସ୍ୟ; କିପରି ପରସ୍ପର ସହ ଯୋଡ଼ି ହୋଇଛି ୭ ମହାଦେଶ?