ଏବେ ଚାଟିଂର ଦୁନିଆରେ ଆସୁଛି ବଡ଼ ପରିବର୍ତ୍ତନ । WhatsApp ନେଇଆସୁଛି ଏକ ନୂତନ ଫିଚର୍, ଯାହା ଆପଣଙ୍କ ଚାଟ୍‌ କରିବା ଧାରାକୁ ପୂରା ପରିବର୍ତ୍ତନ କରିଦେବ । ଏପର୍ଯ୍ୟନ୍ତ WhatsApp ରେ କାହା ସହ କଥାହେବା ପାଇଁ ମୋବାଇଲ୍ ନମ୍ବର ଦରକାର ହୁଏ । କିନ୍ତୁ ଏବେ କମ୍ପାନୀ ଆଣୁଛି ଏକ ନୂଆ Username ଫିଚର୍ । ଅର୍ଥାତ୍ ଆଗାମୀ ଦିନରେ ବିନା ମୋବାଇଲ ନମ୍ବରରେ ମଧ୍ୟ ଚାଟ୍‌ କରିପାରିବେ ।

କିଛି ରିପୋର୍ଟରୁ ଜଣାପଡ଼ିଛି ଯେ ହ୍ୱାଟସଆପ୍ କିଛି ୟୁଜର୍ସଙ୍କ ପାଇଁ ୟୁଜରନେମ୍ ଫିଚର୍ ଆରମ୍ଭ କରିଛି । ଏହି ଫିଚର୍ ଉଭୟ ଆଣ୍ଡ୍ରଏଡ୍ ଏବଂ iOS ପ୍ଲାଟଫର୍ମରେ ପରୀକ୍ଷଣ କରାଯାଉଛି । ଯଦି ସମ୍ପୂର୍ଣ୍ଣ ଭାବରେ ଲଞ୍ଚ ହୁଏ, ତେବେ ଏହାକୁ ହ୍ୱାଟସଆପ୍ ଇତିହାସର ସବୁଠାରୁ ବଡ଼ ଅପଡେଟ୍ ମଧ୍ୟରୁ ଗୋଟିଏ ବୋଲି ବିବେଚନା କରାଯିବ ।

ଏହି ଫିଚରର ସବୁଠାରୁ ବଡ଼ ଲାଭ ହେଉଛି ଗୋପନୀୟତା । ଏପର୍ଯ୍ୟନ୍ତ ଯେତେବେଳେ ଆପଣ ହ୍ୱାଟସଆପ୍‌ରେ ନୂଆ କରି କାହା ସହ ଯୋଗାଯୋଗ କରନ୍ତି, ଆପଣଙ୍କର ନମ୍ବର ଅନ୍ୟ ବ୍ୟକ୍ତିଙ୍କ ସହିତ ସେୟାର କରାଯାଏ । କିନ୍ତୁ ୟୁଜରନେମ୍ ଫିଚର୍ ଆସିଲେ ଆପଣ କେବଳ ଆପଣଙ୍କର ୟୁଜରନେମ୍ ସେୟାର କରି ଚାଟ୍‌ କରିପାରିବେ । ଏହାର ଅର୍ଥ ହେଉଛି ଆପଣଙ୍କର ଫୋନ୍ ନମ୍ବର ସମ୍ପୂର୍ଣ୍ଣ ଭାବରେ ଗୋପନୀୟ ରହିପାରିବ ।

ରିପୋର୍ଟ ଅନୁଯାୟୀ, ହ୍ୱାଟ୍ସଆପ୍ ୟୁଜର୍ସଙ୍କ ପାଖରେ ଏକ ଅନନ୍ୟ ୟୁଜରନେମ୍ ବାଛିବାର ବିକଳ୍ପ ରହିବ । ଏହା କିଛିଟା Instagram କିମ୍ବା Telegram ପରି କାମ କରିବ । ଥରେ ଆପଣଙ୍କର ୟୁଜରନେମ୍ ସେଟ୍ ହୋଇଗଲେ, ଲୋକେ ସେହି Username ଦ୍ୱାରା ଆପଣଙ୍କୁ ସର୍ଚ୍ଚ କରି ମେସେଜ୍ କରିପାରିବେ । ଏହା ବିଶେଷକରି ସେହି ଲୋକଙ୍କ ପାଇଁ ଉପକାରୀ ହେବ, ଯେଉଁମାନେ ନିଜ ପର୍ସନାଲ୍ ନମ୍ବର ସେୟାର କରିବାକୁ ଚାହୁଁନାହାନ୍ତି । WhatsApp ଏହି ଫିଚର୍‌ ଦ୍ୱାରା ନିଜକୁ ଆଉ ଅଧିକ ମଡର୍ଣ୍ଣ ମେସେଜିଂ ପ୍ଲାଟଫର୍ମ ଭାବେ ପରିବର୍ତ୍ତନ କରିବାକୁ ଚାହୁଁଛି ।

ତଥାପି ଏହା ଫିଚର୍‌କୁ ନେଇ କିଛି ପ୍ରଶ୍ନ ମଧ୍ୟ ରହିଛି । ଯେପରିକି ଏହା ସ୍ପାମ୍ ମେସେଜରେ ବୃଦ୍ଧି ଘଟାଇପାରେ କି ? କାରଣ ଯଦି କେହି ଆପଣଙ୍କୁ କେବଳ ଆପଣଙ୍କ ୟୁଜରନେମ୍ ଦ୍ୱାରା ଖୋଜି ପାଆନ୍ତି, ତେବେ ଏହା ଅଜଣା ଲୋକଙ୍କଠାରୁ ମେସେଜ୍ ପାଇବାର ସମ୍ଭାବନାକୁ ବୃଦ୍ଧି କରିପାରେ । କିନ୍ତୁ ଏହା ଆଶା କରାଯାଉଛି ଯେ WhatsApp ଗୋପନୀୟତା ସେଟିଂସ୍ ମଧ୍ୟ ପ୍ରଦାନ କରିବ, ଯାହା ଆପଣଙ୍କୁ କିଏ ମେସେଜ୍ କରିପାରିବ ତାହା ନିୟନ୍ତ୍ରଣ କରିବାକୁ ଅନୁମତି ଦେବ ।

ଏହା ସହିତ ଏହି ଫିଚର୍ ବିଜନେସ୍ ଓ କଣ୍ଟେଣ୍ଟ କ୍ରିଏଟର୍‌ମାନଙ୍କ ପାଇଁ ବଡ଼ ସୁଯୋଗ ନେଇଆସିପାରେ । ଯେଉଁମାନେ ନମ୍ବର ପବ୍ଲିକ୍ କରିବାକୁ ଚାହୁଁନାହାନ୍ତି, ସେମାନେ ସହଜରେ Username ଦ୍ୱାରା ନିଜ ଅଡିଏନ୍ସ ସହ ଯୋଡ଼ି ହୋଇ ରହିପାରିବେ । ଏପର୍ଯ୍ୟନ୍ତ ଏହି ଫିଚର୍ ଧୀରେ ଧୀରେ ରୋଲଆଉଟ୍ ହେଉଛି ଏବଂ ସମସ୍ତ ୟୁଜର୍ସଙ୍କ ପାଖକୁ ପହଞ୍ଚିବାକୁ କିଛି ସମୟ ଲାଗିପାରେ ।