iPhone in Space / NASAର ବଡ଼ ନିଷ୍ପତ୍ତି; ଏଣିକି ମହାକାଶକୁ ନିଜ ଫୋନ ନେବେ ମହାକାଶଚାରୀ

ଏଣିକି ମହାକାଶରୁ ଆସିବ ଫୋନକଲ୍ । ମହାକାଶଚାରୀମାନେ ନିଜ ପରିବାରବର୍ଗଙ୍କ ସହିତ ନିଜ ଫୋନ ମାଧ୍ୟମରେ ସିଧାସଳଖ କଥାବାର୍ତ୍ତା କରିପାରିବେ । ଏପରି ବଡ଼ ନିଷ୍ପତ୍ତି ନେଇଛି ଆମେରିକୀୟ ସ୍ପେଶ ଏଜେନ୍ସି ନାସା । ଏଜେନ୍ସିର ଏହି ନିଷ୍ପତ୍ତି ମହାକାଶ ଯାତ୍ରୀଙ୍କ ପୁରା ଅନୁଭବକୁ ପରିବର୍ତ୍ତନ କରିବାକୁ ଯାଉଛି । ଏଯାବତ ମହାକାଶ ଯାତ୍ରା କରୁଥିବା ମହାକାଶଚାରୀମାନଙ୍କୁ ସାଙ୍ଗରେ ନିଜ ସ୍ମାର୍ଟଫୋନ ନେଇ ଯିବା ପାଇଁ ଅନୁମତି ଦିଆଯାଉନଥିଲା, ମାତ୍ର ଖୁବଶୀଘ୍ର ଏହି ନିୟମରେ ପରିବର୍ତ୍ତନ ହେବାକୁ ଯାଉଛି । ନାସା ଖୁବଶୀଘ୍ର ନିଜର Crew-12 ଓ Artemis II ମିଶନର ମହାକାଶଚାରୀଙ୍କୁ ସାଥୀରେ ନିଜ ପର୍ସନାଲ ସ୍ମାର୍ଟଫୋନ ନେବାକୁ ଅନୁମତି ଦେଇଛି ।

ନାସାର ପ୍ରଶାସକ ଜେରେଡ୍ ଆଇଜ୍ୟାକମ୍ୟାନ୍ ନିଜ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ ସାଇଟ୍‌ରେ ଏକ ପୋଷ୍ଟ କରି ଏ ସମ୍ପର୍କରେ ସୂଚନା ଦେଇଛନ୍ତି । ସେ କହିଛନ୍ତି ଯେ ଏବେ କ୍ରୁ ମେମ୍ବରମାନଙ୍କୁ ଏପରି ଟୁଲ୍ସ ଦିଆଯାଉଛି, ଯାହା ଜରିଆରେ ସେମାନେ ନିଜ ପରିବାର ସହିତ ବିଶେଷ ମୁହୂର୍ତ୍ତକୁ ବାଣ୍ଟିପାରିବେ ଏବଂ ମହାକାଶ ଯାତ୍ରା ସମୟରେ ସେମାନେ ଯେପରି ନିଜ ପରିବାରଠାରୁ ଦୂରରେ ନାହାନ୍ତି ସେପରି ଅନୁଭବ ପ୍ରଦାନ କରିବା ଲାଗି ଏହି ନୂଆ ନିୟମ କରାଯାଇଛି । ଏହାସହିତ ମହାକାଶର ଚମତ୍କାର ଭିଡିଓ ଓ ଫଟୋକୁ ସେ ପୁରା ଦୁନିଆ ସହିତ ସେୟାର ମଧ୍ୟ କରିପାରିବେ ।

• ଏଯାବତ ମୋବାଇଲ ପାଇଁ ନ ଥିଲା ଅନୁମତି

ପୂର୍ବରୁ ମହାକାଶଚାରୀମାନେ ଅନ୍ତର୍ଜାତୀୟ ସ୍ପେଶ ଷ୍ଟେସନ (ISS) ଗସ୍ତ ସମୟରେ ସାଥୀରେ ନିଜ ଫୋନ ନେଇ ଯାଇପାରୁନଥିଲେ । ଏଥିଲାଗି ସେମାନଙ୍କୁ ନାସା ଅନୁମତି ପ୍ରଦାନ କରୁନଥିଲା । ସେମାନେ ପୂର୍ବରୁ କେବଳ ଏକ ସ୍ବତନ୍ତ୍ର ଲାପଟପ୍ ଓ ଅଧୀକୃତ ଡିଭାଇସର ବ୍ୟବହାର କରିପାରୁଥିଲେ । ଏହି ଡିଭାଇସ ଜରିଆରେ ସେମାନେ ଇମେର୍‍ ମେସେଜ୍ ଓ ଭିଡିଓ କଲ୍ କରିପାରୁଥିଲେ । ଏହି ସମସ୍ତ ଜିନିଷ ନିୟନ୍ତ୍ରଣରେ କରାଯାଉଥିଲା । ସ୍ମାର୍ଟଫୋନର ସୁରକ୍ଷା, ଇଣ୍ଟରଫେର୍‍ ସ୍ଥାୟିତ୍ବ ଓ ତଥ୍ୟ ସୁରକ୍ଷା ଲାଗି ନାସା ସମସ୍ତ କାର୍ଯ୍ୟ ପାଇଁ ଅନୁମତି ପ୍ରଦାନ କରୁନଥିଲା । ଫଳରେ ମହାକାଶଚାରୀମାନେ ଏକ ସୀମା ଭିତରେ ରହି ଡିଭାଇସ ବ୍ୟବହାର କରୁଥିଲେ । ସେମାନେ ନିଜ ଇଚ୍ଛା ମୁତାବକ ପରିବାରକୁ ଫଟୋ କିମ୍ବା ଭିଡିଓ ପଠାଇ ପାରୁନଥିଲେ । ଏବେ ସେମାନେ ମହାକାଶ ଗସ୍ତ ସମୟରେ ମଧ୍ୟ ଏସବୁ କରିପାରିବେ ।

• ଅତ୍ୟାଧୁନିକ ଫୋନ ନେବେ ମହାକାଶଚାରୀ

ନାସା ଏଥିଲାଗି କିଛି ଅତ୍ୟାଧୁନିକ ସ୍ମାର୍ଟଫୋନକୁ ଅନୁମତି ପ୍ରଦାନ କରିଛି, ଯାହାଦ୍ବାରା ମହାକାଶଚାରୀମାନଙ୍କୁ ଲମ୍ବା ଓ ଧୀର ପ୍ରକ୍ରିୟାରୁ ଆଶ୍ବସ୍ତି ମିଳିବ । ସେମାନେ ସ୍ବାଭାବିକ ଭାବେ ଫଟୋ ଓ ଭିଡିଓ ରେକର୍ଡ କରିପାରିବେ । ଫଳରେ ନାସା ପାଇଁ ଆଗାମୀ ମିଶନଗୁଡ଼ିକ ଡକ୍ୟୁମେଣ୍ଟେଡ୍ ମିଶନ ହେବାକୁ ଯାଉଛି । ମହାକାଶଚାରୀମାନଙ୍କ ନିକଟରେ ନିଜର ବ୍ୟକ୍ତିଗତ ଫୋନ ରହିବା ଯୋଗୁଁ ଆଗାମୀ ଦିନରେ ମହାକାଶର ଅନେକ ରୋଚକ ତଥ୍ୟ, ଫଟୋ ଆଦି ଦେଖିପାରିବେ ବିଶ୍ବବାସୀ ।

• ନାସାର ଆଗାମୀ ମିଶନ

ଆମେରିକୀୟ ସ୍ପେଶ ଏଜେନ୍ସି ନାସା ଆଗାମୀ ଦିନରେ କ୍ରୁ-୧୨ ମିଶନକୁ ଫେବୃଆରୀ ୧୧ ତାରିଖ ଭାରତୀୟ ସମୟ ଅପରାହ୍ନ ୪.୩୦ଟାରେ ଲଞ୍ଚ କରିବ । ଏହି ମିଶନ ସ୍ପେଶଏକ୍ସର ଫାଲକନ୍-୯ ରକେଟ୍‌ରେ ଡ୍ରାଗନ ସ୍ପେଶକ୍ରାଫ୍ଟ ଜରିଆରେ ଉଡ଼ାଣ ଭରିବ । ଏହି ମିଶନର କ୍ରୁ ମେମ୍ବରମାନେ ହେଉଛନ୍ତି ଜେସିକା ମିର, ଜ୍ୟାକ୍ ହେଥୱେ, ସୋଫି ଏଡେନା ଓ ଆନ୍ଦ୍ରେଇ । ଏହି ମିଶନରେ ମହାକାଶଚାରୀମାନେ ପ୍ରାୟ ୯ ମାସ ପର୍ଯ୍ୟନ୍ତ ସ୍ପେଶ ଷ୍ଟେସନରେ ରହିବେ । ଏହାବ୍ୟତୀତ ମାର୍ଚ୍ଚ ୨୦୨୬ରେ ନାସା ଆଉ ଏକ ନୂଆ ମିଶନ Artemis IIକୁ ଲଞ୍ଚ କରିବାକୁ ଯାଉଛି । ଏହି ମିଶନର ସମୟ ୧୦ ଦିନ ରହିବ । ଏଥିରେ ୪ ଜଣ ମହାକାଶଚାରୀ ଚନ୍ଦ୍ରକୁ ଯିବେ । ଏହି ମିଶନଟି ବେଶ ଐତିହାସିକ ହେବାକୁ ଯାଉଛି । କାରଣ ୧୯୭୨ ମସିହା ପରେ ଏହା ପ୍ରଥମ ଥର ଲାଗି ହେବ ଯେତେବେଳେ ମଣିଷ ପୃଥିବୀର ନିମ୍ନ କକ୍ଷପଥରୁ ବାହାରକୁ ଯିବ ।

ଏଥିସହ ପଢନ୍ତୁ: ମାଗଣା ୱାଇ-ଫାଇ ଲୋଭ ହୋଇପାରେ ଘାତକ; ଫୋନରେ ଖୋଲିଯିବ ଏହିସବୁ