Facebook Ban Demand / ପିଲାଙ୍କ ପାଇଁ ନିଶା ପାଲଟିଲାଣି ସୋସିଆଲ ମିଡିଆ; ବ୍ୟାନ୍ ପାଇଁ ବଢିଲା ଡିମାଣ୍ଡ

ସୋସିଆଲ ମିଡିଆ । ଆମ ଦୈନନ୍ଦିନ ଜୀବନର ପାଲଟିଛି ଅବିଚ୍ଛେଦ୍ୟ ଅଂଶ । ସକାଳୁ ଉଠିଲେ ସୋସିଆଲ ମିଡିଆ । ଶୋଇବା ବେଳେ ସୋସିଆଲ ମିଡିଆ । ମନ ସବୁବେଳେ ସେଇଠି ରହୁଛି । ବିଶେଷ କରି ପିଲାମାନେ ସୋସିଆଲ ମିଡିଆରେ ଅଧିକ ସମୟ ଅତିବାହିତ କରୁଛନ୍ତି । ପିଲାଠୁ ବୁଢା ଏହା ସମସ୍ତଙ୍କ ପାଇଁ ନିଶା ପାଲଟିଲାଣି । ଫେସବୁକ୍, ଇନଷ୍ଟାଗ୍ରାମ, ହ୍ଵାଟ୍ସଆପ୍‌ର ବ୍ୟବହାର ଏତେ ବଢିଲାଣି ଯେ ଶେଷରେ ଅଭିଭାବକମାନେ ଏହାର ବ୍ୟାନ୍ ପାଇଁ ଦାବି କଲେଣି ।

ଆମେରିକାରେ ସୋସିଆଲ ମିଡିଆ କମ୍ପାନୀଗୁଡ଼ିକ ବିରୁଦ୍ଧରେ ଅଭିଭାବକମାନେ ସ୍ଵର ଉଠାଇଛନ୍ତି । ନିକଟରେ ଏକ ସର୍ଭେ ଅନୁସାରେ ପ୍ରାୟ ୬୧% ଆମେରିକୀୟ ସୋସିଆଲ ମିଡିଆ କମ୍ପାନୀ ଉପରେ ସରକାରଙ୍କ କଡ଼ା ନଜର ରଖିବାକୁ ଦାବି କରୁଛନ୍ତି । ସେହିପରି ୬୬% ଆମେରିକୀୟ ୧୬ ବର୍ଷରୁ କମ ବର୍ଷର ପିଲାଙ୍କ ପାଇଁ ସୋସିଆଲ ମିଡିଆ ବ୍ୟାନ୍ କରିବା ପାଇଁ ଦାବି କରୁଛନ୍ତି । କମ୍ପାନୀଗୁଡ଼ିକ ଏଥିଲାଗି ବୟସ ଯାଞ୍ଚ ପ୍ରକ୍ରିୟା ଅନିବାର୍ଯ୍ୟ କରନ୍ତୁ ବୋଲି ସେମାନେ ମତ ରଖିଛନ୍ତି ।

• କାହିଁକି ଉଠିଲା ବ୍ୟାନ୍ ଦାବି ?

ନିକଟରେ ୪୫୦୫ ଆମେରିକୀୟଙ୍କ ମଧ୍ୟରେ ସର୍ଭେ କରାଯାଇଥିଲା । ସର୍ଭେରେ ସୋସିଆଲ ମିଡିଆ ଉପରେ କଡ଼ା ନଜର ରଖିବାକୁ ଦାବି ହୋଇଛି । ଲୋକମାନେ ଛୋଟ ଛୋଟ ପିଲାଙ୍କ ସୋସିଆଲ ମିଡିଆ ବ୍ୟବହାରକୁ ନେଇ ଚିନ୍ତା ପ୍ରକଟ କରିଛନ୍ତି । ୬୬ ପ୍ରତିଶତ ଅଂଶଗ୍ରହଣକାରୀ ୧୬ ବର୍ଷରୁ କମ ପିଲାଙ୍କ ପାଇଁ ସୋସିଆଲ ମିଡିଆ ବ୍ୟାନ୍ କରାଯାଉ ବୋଲି କହିଛନ୍ତି । ଏହି ଅଂଶଗ୍ରହଣକାରୀଙ୍କ ମଧ୍ୟରେ ରିପବ୍ଲିକାନ ଦଳକୁ ସମର୍ଥନ କରୁଥିବା ୭୪ ପ୍ରତିଶତ ଥିବାବେଳେ ଡେମେକ୍ରାଟିକ୍ ଦଳକୁ ସମର୍ଥନ କରୁଥିବା ୬୯ ପ୍ରତିଶତ ଲୋକ ଅଛନ୍ତି ।

• 'ପିଲାଙ୍କ ପାଇଁ ନିଶା ପାଲଟିଛି ସୋସିଆଲ ମିଡିଆ'

ସର୍ଭେରେ ପ୍ରାୟ ୮୫ ପ୍ରତିଶତ ଆମେରିକୀୟ ସ୍ଵୀକାର କରିଛନ୍ତି ଯେ ଏବେ ସୋସିଆଲ ମିଡିଆ କୁନି ପିଲାଙ୍କ ଲାଗି ନିଶା ପାଲଟିଛି । ଏହା କୁନି ପିଲାଙ୍କ ମାନସିକ ସ୍ଵାସ୍ଥ୍ୟକୁ କ୍ଷତି ପହଞ୍ଚାଉଛି । ଅନ୍ୟପଟେ କିଛି ଲୋକ ସୋସିଆଲ ମିଡିଆକୁ ମଧ୍ୟ ବେଶ ପସନ୍ଦ କରୁଛନ୍ତି । ୭୦ ପ୍ରତିଶତ ଲୋକ କହିଛନ୍ତି ଯେ ଏହି ପ୍ଲାଟଫର୍ମରେ ସମୟ ବିତାଇବା ସେମାନଙ୍କୁ ମନୋରଞ୍ଜନ ଯୋଗାଏ । ୫୨ ପ୍ରତିଶତ ଲୋକଙ୍କ କହିବା କଥା ହେଉଛି ଯେ ସୋସିଆଲ ମିଡିଆରେ ଆବଶ୍ୟକଠାରୁ ଅଧିକ ସମୟ ବିତାନ୍ତି । ଏହାର ଅର୍ଥ ହେଉଛି ଯେ ଲୋକମାନେ ଫେସବୁକ୍ ଓ ଇନଷ୍ଟାଗ୍ରାମ ବ୍ୟବହାର କରିବାକୁ ଚାହୁଁଛନ୍ତି, କିନ୍ତୁ ଯେତେବେଳେ ଛୋଟ ପିଲାଙ୍କ କଥା ଆସୁଛି ସେତେବେଳେ ଅଭିଭାବକ ଅଧିକ ନିୟମର ଆବଶ୍ୟକ କରୁଛନ୍ତି ।

• ଟେନସନରେ ପଡ଼ିଲାଣି ମେଟା

ଏହି ସର୍ଭେ ସେତେବେଳେ ଆସିଛି ଯେତେବେଳେ ମେଟା ବିରୋଧରେ ଆମେରିକାରେ ଆଇନଗତ ସମସ୍ୟା ବଢିବାରେ ଲାଗିଛି । ନିକଟରେ ନ୍ୟୁ ମେକ୍ସିକୋରେ ଏକ କୋର୍ଟ ମେଟାକୁ ୫୭୬ ମିଲିଅନ ଡଲାର କ୍ଷତିପୂରଣ ଦେବାକୁ ଆଦେଶ ଦେଇଥିଲା । ଏହି ଟଙ୍କା ଯୁବବର୍ଗଙ୍କ ମାନସିକ ସ୍ଵାସ୍ଥ୍ୟ ସମ୍ବନ୍ଧୀୟ କାମ ଲାଗି ଖର୍ଚ୍ଚ ହେବ । ଏବେ ସୋସିଆଲ ମିଡିଆ ବ୍ୟାନ୍‌କୁ ନେଇ ଦାବି ଉଠିବା ପରେ ମେଟା ସିଇଓ ମାର୍କ ଜୁକରବର୍ଗ ଚିନ୍ତାରେ ପଡ଼ିଛନ୍ତି ।

ପଢନ୍ତୁ ଏହି ଖବର: ମୋଦିଙ୍କ AI-ମର୍ଫଡ୍ ଭିଡିଓ ତିଆରି ଅଭିଯୋଗ: ମେଟା ବିରୋଧରେ ମାମଲା ରୁଜୁ

• ବନ୍ଦ ହେବ କି ଫେସବୁକ୍ ଓ ଇନଷ୍ଟାଗ୍ରାମ ?

ସୋସିଆଲ ମିଡିଆକୁ ବିରୋଧ ହେଉଛି ଅର୍ଥ ଏହା ସମ୍ପୂର୍ଣ୍ଣ ଭାବେ ବନ୍ଦ ହୋଇଯିବ ନାହିଁ, ବରଂ ଆଗାମୀ ଦିନରେ ଏହି ପ୍ଲାଟଫର୍ମରେ ବୟସ ସୀମା ଓ ଚାଇଲ୍ଡ ସେଫ୍ଟି ସହ ଜଡ଼ିତ କିଛି କଠିନ ନିୟମ ଲାଗୁ ହୋଇପାରେ । ଅନ୍ୟପଟେ ଆମେରିକାରେ ଅନେକ ରାଜ୍ୟରେ ପିଲାଙ୍କ ସୋସିଆଲ ମିଡିଆ ବ୍ୟବହାରକୁ ନେଇ ଅଲଗା ଅଲଗା ନିୟମ ରହିଛି । କିଛି ସ୍ଥାନରେ ବୟସ ସୀମା ଯାଞ୍ଚ, କେଉଁଠି ପିତାମାତାଙ୍କ ସହ ପିଲାଙ୍କ ଆକାଉଣ୍ଟକୁ ସଂଯୋଗ କରିବା ଭଳି ନିୟମ ରହିଛି ।