India 6G / 6G ଗ୍ଲୋବାଲ୍ ରେସ୍‌ରେ ଭାରତ; ଆହୁରି ଦ୍ରୁତ ଗତିରେ ଦୌଡ଼ିବ ଇଣ୍ଟରନେଟ୍

5G ଏବେ ସମ୍ପୂର୍ଣ୍ଣ ଭାବେ ପୁରୁଣା ହୋଇନି, କିନ୍ତୁ ସେପଟେ ଟେକ୍ନୋଲୋଜି ଦ୍ରୁତ ଗତିରେ ଆଗକୁ ବଢି 6Gର ପ୍ରସ୍ତୁତି ଆରମ୍ଭ କରିଛି । ଏହି ଗ୍ଲୋବାଲ୍‌ ରେସ୍‌ରେ ଭାରତ ପଛରେ ପଡ଼ିନି । ଏଣିକି ଆହୁରି ଦ୍ରୁତ ଗତିରେ ଦୌଡ଼ିବ ଇଣ୍ଟରନେଟ୍ । ଆଖି ପିଛୁଳାକେ ଡାଉନଲୋଡ୍ ହୋଇଯିବ ଭିଡିଓ । ଏହି ଦୌଡ଼ରେ ଭାରତ ସାମିଲ ହେବା ପରେ ମୋଟ ୨୬ ଦେଶ 6G ଆଣିବାକୁ ପ୍ରୟାସ ଜାରି ରଖିଛନ୍ତି । ଫଳରେ ଆଗାମୀ କିଛି ବର୍ଷରେ ଇଣ୍ଟରନେଟ୍‌ର ସଂଯୋଗ ଆହୁରି ଉନ୍ନତ ହେବ ।

• 6G ରେସ୍‌ରେ ଭାରତର ଏଣ୍ଟ୍ରି

ଭାରତ ବି ଏବେ ୬ଜି ଦୌଡ଼ରେ ସାମିଲ ହୋଇଥିବା ନେଇ ଆମେରିକା ବାଣିଜ୍ୟ ବିଭାଗ ସୂଚନା ଦେଇଛି । G20 ଇନୋଭେସନ ମିନିଷ୍ଟିରିଆଲ୍ ସମୟରେ ଭାରତର ବାଣିଜ୍ୟ ଏବଂ ଉଦ୍ୟୋଗ ରାଷ୍ଟ୍ରମନ୍ତ୍ରୀ ଜିତିନ ପ୍ରସାଦ ଆମେରିକାର ବାଣିଜ୍ୟ ସଚିବ ହାଭାର୍ଡ ଲଟନିକ୍‌ଙ୍କ ସହ ବିଶେଷ ଆଲୋଚନା କରିଛନ୍ତି । ଆମେରିକା ବାଣିଜ୍ୟ ବିଭାଗ ପକ୍ଷରୁ କୁହଯାଇଛି ଯେ ଏହି ଆଲୋଚନା ଏହା ସୁନିଶ୍ଚିତ କରେ ଯେ, ଆଗକୁ ଯେପରି ଆଗାମୀ ପିଢିର ନେଟୱର୍କ ସମସ୍ତଙ୍କ ହିତ ଦିଗରେ କାମ କରିବ । ସାଧାରଣ ଲୋକେ ଏହାର ଫାଇଦା ଉଠାଇପାରିବେ ।

• ଦୌଡ଼ରେ ଅଛନ୍ତି ଏହି ୨୫ ଦେଶ

ଏହି ଦୌଡ଼ରେ ଭାରତ ବ୍ୟତୀତ ଆମେରିକା ଓ ବାକି ୨୪ ଦେଶ ସାମିଲ ଅଛନ୍ତି । ଯେଉଁଥିରେ ଆମେରିକା, ବ୍ରିଟେନ, ଜାପାନ, ଦକ୍ଷିଣ କୋରିଆ, ଅଷ୍ଟ୍ରେଲିଆ, କାନାଡା, ଫ୍ରାନ୍ସ, ଜର୍ମାନୀ, ଫିନଲ୍ୟାଣ୍ଡ ଓ ସ୍ଵିଡେନ ସାମିଲ । ଆଗାମୀ ପିଢିର ନେଟୱର୍କ ଆଣିବାର ମୁଖ୍ୟ ଉଦ୍ଦେଶ୍ୟ ହେଉଛି 6G ନେଟୱର୍କର ସୁରକ୍ଷା ଓ ସୃଜନଶୀଳତାକୁ ପ୍ରୋତ୍ସାହିତ କରିବା ।

• ଭାରତର ନିଜସ୍ଵ 6G ମିଶନ

ବିଶ୍ୱସ୍ତରୀୟ ପଦକ୍ଷେପରେ ଅଂଶଗ୍ରହଣ କରିବା ସହିତ, ଭାରତ ନିଜସ୍ୱ 6G କାର୍ଯ୍ୟକ୍ରମରେ ମଧ୍ୟ କାର୍ଯ୍ୟ କରୁଛି । ଭାରତ 6G ମିଶନ ଏବଂ ଭାରତ 6G ଆଲାଏନ୍ସ ମାଧ୍ୟମରେ ନୂତନ ପ୍ରଯୁକ୍ତିବିଦ୍ୟା ବିକାଶ କରିବା ଦିଗରେ ଭାରତ ଆଗକୁ ବଢ଼ୁଛି । ଭାରତ 6G ଆଲାଏନ୍ସ ୨୦୩୦ ସୁଦ୍ଧା ଦେଶରେ 6G ପ୍ରଯୁକ୍ତିବିଦ୍ୟା ପ୍ରଚଳନ କରିବାକୁ ଲକ୍ଷ୍ୟ ରଖିଛି । ଏହାବ୍ୟତୀତ ଦେଶ 6G-ସମ୍ବନ୍ଧୀୟ ଉତ୍ପାଦ ଏବଂ ସୁଲଭ ଟେଲିକମ୍ ସମାଧାନ ବିକାଶ କରି ବିଶ୍ୱ ବଜାରରେ ନିଜର ଅଂଶ ବୃଦ୍ଧି କରିବାକୁ ମଧ୍ୟ ଯୋଜନା କରୁଛି ।

ପଢନ୍ତୁ ଏହି ଖବର: ଆଶ୍ଚର୍ଯ୍ୟ କରିଦେବ ବୈଜ୍ଞାନିକଙ୍କ ଏହି ଅଧ୍ୟୟନ; ଝାଳରୁ ଉତ୍ପନ୍ନ ହେବ ବିଦ୍ୟୁତ୍

ଜି-୨୦ ନବସୃଜନ ମନ୍ତ୍ରୀସ୍ତରୀୟ ଅଧିବେଶନରେ, ଭାରତ ଏବଂ ଆମେରିକା 6G ବ୍ୟତୀତ ସେମିକଣ୍ଡକ୍ଟର, ଏଆଇ ଏବଂ ଡାଟା ସେଣ୍ଟର ସମେତ ପ୍ରମୁଖ ପ୍ରଯୁକ୍ତିବିଦ୍ୟା କ୍ଷେତ୍ରଗୁଡ଼ିକ ଉପରେ ମଧ୍ୟ ଆଲୋଚନା କରିଛନ୍ତି । ଭାରତ ଇଣ୍ଡିଆ ସେମିକଣ୍ଡକ୍ଟର ମିଶନ 2.0ରେ ଆମେରିକୀୟ ନିବେଶ ବୃଦ୍ଧି କରିବାକୁ ପ୍ରସ୍ତାବ ଦେଇଛି । ଏହାସହିତ ଦୁଇ ଦେଶ ଏଆଇ ପ୍ରଯୁକ୍ତିବିଦ୍ୟା ଏବଂ ଏଆଇର ସୁରକ୍ଷିତ ବ୍ୟବହାର ସହିତ ଜଡିତ ନିୟମାବଳୀରେ ସହଯୋଗ ବିସ୍ତାର କରିବା ଉପରେ ମଧ୍ୟ ଆଲୋଚନା କରିଛନ୍ତି ।