NASA Telescope Fall / ପୃଥିବୀ ଆଡ଼କୁ ମାଡ଼ିଆସୁଛି 'ନାସା'ର ୨୨ ବର୍ଷର ପୁରୁଣା ଦୂରବୀକ୍ଷଣ ଯନ୍ତ୍ର; ଭାରତରେ ଏଇଠି ପଡ଼ିବ

ନୂଆଦିଲ୍ଲୀ: ମହାକାଶରୁ ପୃଥିବୀ ପୃଷ୍ଠ ଆଡକୁ ମାଡି ଆସୁଛି ଆମେରିକାର ମହାକାଶ ଗବେଷଣା ସଂସ୍ଥା 'ନାସା'ର ଏକ ବିଶାଳକାୟ ଦୂରବୀକ୍ଷଣ ଯନ୍ତ୍ର । ସବୁଠାରୁ ବଡ଼ ଚିନ୍ତାର ବିଷୟ ହେଉଛି, ଏହି ଦୂରବୀକ୍ଷଣ ଯନ୍ତ୍ରର ଭଙ୍ଗାରୁଜା ଅଂଶ ଭାରତର ଦୁଇ ପ୍ରମୁଖ ସହର ମୁମ୍ବାଇ ଏବଂ ହାଇଦ୍ରାବାଦ ଉପରେ ପଡିବାର ଆଶଙ୍କା କରାଯାଉଛି । ମହାକାଶରେ ଦୀର୍ଘ ୨୨ ବର୍ଷ ଧରି କାମ କରିବା ପରେ ପୃଥିବୀକୁ ଫେରୁଛି ଏହି ଦୂରବୀକ୍ଷଣ ଯନ୍ତ୍ର, ଯାହାର ନାମ ହେଉଛି ‘ନିଲ୍ ଗେରେଲ୍ସ ସ୍ୱିଫ୍ଟ ଅବଜରଭେଟୋରି’।

ଏହା ପୃଥିବୀର ବାୟୁମଣ୍ଡଳରେ ପ୍ରବେଶ କରିବା ସମୟରେ ଅଧିକାଂଶ ଅଂଶ ଜଳିଯିବା ଆଶା କରାଯାଉଥିବାବେଳେ କିଛି ଅଂଶ ପୃଥିବୀ ପୃଷ୍ଠରେ ପଡ଼ିପାରେ । ୨୦୦୪ ନଭେମ୍ବର ୨୦ ତାରିଖରେ ଏହି ମହାକାଶ ଦୂରବୀକ୍ଷଣ ଯନ୍ତ୍ରକୁ ଉତ୍‌କ୍ଷେପଣ କରାଯାଇଥିଲା । ପ୍ରାରମ୍ଭରେ ଏହାର ନାମ ‘ସ୍ୱିଫ୍ଟ ଗାମା-ରେ ବର୍ଷ୍ଟ ଏକ୍ସପ୍ଲୋରର’ ରଖାଯାଇଥିଲା । ମାତ୍ର ଦୁଇ ବର୍ଷ କାମ କରିବା ପାଇଁ ନିର୍ମିତ ଏହି ଯନ୍ତ୍ରଟି ଆଶାଠାରୁ ଅଧିକ ସମୟ ଧରି କାର୍ଯ୍ୟ କରିଛି ।

• କେବେ ମହାକାଶରୁ ଖସିବ ?

ନାସାର ସୂଚନା ଅନୁଯାୟୀ, ଏହା ନଭେମ୍ବର ୪ ତାରିଖ ଦିନ ଭାରତୀୟ ସମୟ ଅପରାହ୍ଣ ପ୍ରାୟ ୨ଟା ୩୦ ମିନିଟ୍‌ରେ ପୃଥିବୀର ବାୟୁମଣ୍ଡଳରେ ପ୍ରବେଶ କରିପାରେ । ତେବେ ଏହାର ପୁନଃପ୍ରବେଶ ସମୟରେ ଆଉ କିଛି ଘଣ୍ଟା ରହିଛି । ନାସାର ମିଶନ୍‌ ମୁଖ୍ୟ ବୈଜ୍ଞାନିକ ବ୍ରାଡ୍ ସେଙ୍କୋ ଆସୋସିଏଟେଡ୍ ପ୍ରେସ୍‌କୁ କହିଛନ୍ତି ଯେ, ଆଫ୍ରିକା, ଅଷ୍ଟ୍ରେଲିଆ, ଭାରତ, ଦକ୍ଷିଣ-ପୂର୍ବ ଏସିଆ ଏବଂ ମଧ୍ୟ ଓ ଦକ୍ଷିଣ ଆମେରିକାର କିଛି ଅଞ୍ଚଳ ଏହାର ପୁନଃପ୍ରବେଶ ସମ୍ଭାବ୍ୟ ଅଞ୍ଚଳ ମଧ୍ୟରେ ରହିଛି । ଏହି ମହାକାଶ ଯନ୍ତ୍ରର ପୁନଃପ୍ରବେଶ ଅଞ୍ଚଳ ୨୦.୬ ଡିଗ୍ରୀ ଦକ୍ଷିଣ ଅକ୍ଷାଂଶରୁ ୨୦.୬ ଡିଗ୍ରୀ ଉତ୍ତର ଅକ୍ଷାଂଶ ମଧ୍ୟରେ ହେବ ବୋଲି ନାସା ଆକଳନ କରିଛି ।

• ଏଇଠି ପଡ଼ିବାର ସମ୍ଭାବନା

ଏହି ସମ୍ଭାବ୍ୟ ଅଞ୍ଚଳରେ ମୁମ୍ବାଇ, ହାଇଦ୍ରାବାଦ, ବେଙ୍ଗାଲୁରୁ ଓ ଚେନ୍ନାଇ ରହିଥିବା ବେଳେ ଦିଲ୍ଲୀ, କୋଲକାତା ଏବଂ ଉତ୍ତର ଭାରତର ଅଧିକାଂଶ ଅଞ୍ଚଳ ଏହା ବାହାରେ ରହିଛି । ତେବେ କୌଣସି ସହର ଏହି ଅକ୍ଷାଂଶ ଅଞ୍ଚଳରେ ରହିବା ଅର୍ଥ ନୁହେଁ ଯେ, ସେଠାରେ ନିଶ୍ଚିତ ଭାବେ ମହାକାଶ ଯନ୍ତ୍ରର ଅଂଶ ପଡ଼ିବ । ଏହାର ପ୍ରକୃତ ପଡ଼ିବା ସ୍ଥାନ ବାୟୁମଣ୍ଡଳରେ ପ୍ରବେଶ ସମୟରେ ଏହାର ଅବସ୍ଥିତି ଉପରେ ନିର୍ଭର କରିବ।

ପଢନ୍ତୁ ଏହି ଖବର: ଠିକ୍ ଏହି ବର୍ଷ ଜହ୍ନରେ ପହଞ୍ଚିବେ ଭାରତୀୟ, କହିଦେଲେ ପ୍ରଧାନମନ୍ତ୍ରୀ ମୋଦି

• ଦୂରବୀକ୍ଷଣର ଗତିପଥ ଉପରେ ବୈଜ୍ଞାନିକଙ୍କ ନଜର

ମହାକାଶରୁ ପୃଥିବୀକୁ ଫେରୁଥିବା ବସ୍ତୁଗୁଡ଼ିକୁ ନିରୀକ୍ଷଣ କରିବା ପାଇଁ ଭାରତର ମଧ୍ୟ ନିଜସ୍ୱ ବ୍ୟବସ୍ଥା ରହିଛି। ଶ୍ରୀହରିକୋଟାରେ ଥିବା ଇସ୍ରୋର ‘ମଲ୍ଟି-ଅବଜେକ୍ଟ ଟ୍ରାକିଂ ରାଡାର’ (MOTR) ରକେଟ୍‌ର ଅବଶିଷ୍ଟ ଅଂଶ ଓ ଉପଗ୍ରହଗୁଡ଼ିକୁ ବାୟୁମଣ୍ଡଳରେ ପ୍ରବେଶ ପୂର୍ବରୁ ଏହାର ଶେଷ କିଛି କକ୍ଷପଥରେ ନିରୀକ୍ଷଣ କରିଥାଏ । କିଛି ବିଶେଷଜ୍ଞଙ୍କ ମତରେ, ଏହି ମହାକାଶ ଯନ୍ତ୍ରର ଅଧିକାଂଶ ଅଂଶ ସମୁଦ୍ରରେ ପଡ଼ିବାର ସମ୍ଭାବନା ରହିଛି। ଜ୍ୟୋତିର୍ବିଜ୍ଞାନୀ ଜୋନାଥନ୍ ମ୍ୟାକଡାଉଏଲ୍ ଗିଜମୋଡୋକୁ କହିଛନ୍ତି ଯେ, ଏହି ଅକ୍ଷାଂଶ ଅଞ୍ଚଳର ଏକ ବଡ଼ ଅଂଶ ସମୁଦ୍ର ଦ୍ୱାରା ଆବୃତ।

• ସ୍ଥଳଭାଗରେ ଖସିବାର ସମ୍ଭାବନା ବହୁତ କମ୍

ଅଷ୍ଟ୍ରେଲିଆନ୍ ନ୍ୟାସନାଲ୍ ୟୁନିଭର୍ସିଟିର ଜ୍ୟୋତିର୍ବିଜ୍ଞାନୀ ବ୍ରାଡ୍ ଟକର୍ କହିଛନ୍ତି ଯେ, ପୃଥିବୀର ୭୦ ପ୍ରତିଶତ ଅଂଶ ସମୁଦ୍ର ହୋଇଥିବାରୁ ୧୦ରୁ ୭ ଥର ଏହା ସମୁଦ୍ରରେ ପଡ଼ିବାର ସମ୍ଭାବନା ରହିଛି । ତେବେ ୧୦ରୁ ୩ ଥର ଏହା ସ୍ଥଳଭାଗରେ ମଧ୍ୟ ପଡ଼ିପାରେ । ବିଶେଷଜ୍ଞମାନେ ଏହା ମଧ୍ୟ କହିଛନ୍ତି ଯେ, ଏହାର କୌଣସି ଅଂଶ ଭିତ୍ତିଭୂମିକୁ କ୍ଷତି ପହଞ୍ଚାଇବା କିମ୍ବା କାହାକୁ ଆଘାତ କରିବାର ସମ୍ଭାବନା ଅତ୍ୟନ୍ତ କମ୍‌ ।