India Space Mission / ଠିକ୍ ଏହି ବର୍ଷ ଜହ୍ନରେ ପହଞ୍ଚିବେ ଭାରତୀୟ, କହିଦେଲେ ପ୍ରଧାନମନ୍ତ୍ରୀ ମୋଦି

ନୂଆଦିଲ୍ଲୀ: ଆସନ୍ତା ୨୦୩୫ ମସିହା ସୁଦ୍ଧା ଭାରତର ନିଜସ୍ୱ ମହାକାଶ ଷ୍ଟେସନ ହେବ । ଭାରତୀୟ ବୈଜ୍ଞାନିକମାନେ ସେଠାରେ ରହି ବିଭିନ୍ନ ମହାକାଶର ବିଭିନ୍ନ ରହସ୍ୟକୁ ନେଇ ଗବେଷଣା କରିବେ । ଏହାସହିତ ୨୦୪୦ ସୁଦ୍ଧା ଚନ୍ଦ୍ରରେ ଭାରତୀୟମାନେ ପହଞ୍ଚିବେ । ପ୍ୟାରିସରେ ଚାଲିଥିବା ଅନ୍ତର୍ଜାତୀୟ ମହାକାଶ ସମ୍ମିଳନୀକୁ ସମ୍ବୋଧିତ କରିବା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶ୍ୱକୁ ଭାରତର ମହାକାଶ ଯାତ୍ରା ବିଷୟରେ ଏହି ସମସ୍ତ ସୂଚନା ଦେଇଛନ୍ତି ।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୁରୁବାର ପ୍ୟାରିସରେ ଚାଲିଥିବା ଅନ୍ତର୍ଜାତୀୟ ମହାକାଶ ସମ୍ମିଳନୀକୁ ଭର୍ଚୁଆଲ୍ ଭାବରେ ସମ୍ବୋଧିତ କରିଥିଲେ । ତାଙ୍କ ଅଭିଭାଷଣ ଆରମ୍ଭ କରି ମୋଦି ସମ୍ମିଳନୀରେ ତାଙ୍କୁ ନିମନ୍ତ୍ରଣ କରିଥିବାରୁ ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରନଙ୍କୁ ଧନ୍ୟବାଦ ଜଣାଇଥିଲେ । ସେ କହିଥିଲେ ଯେ ମହାକାଶ ଶତାବ୍ଦୀ ଧରି ଆମର କଳ୍ପନାକୁ ପ୍ରେରଣା ଦେଇଆସିଛି ଏବଂ ଆଜି ଏହା ପୃଥିବୀରେ ଜୀବନ ରକ୍ଷା କରୁଛି । ସେ ଆହୁରି ମଧ୍ୟ କହିଥିଲେ, "ମହାକାଶର ସମ୍ଭାବନା ଅସୀମ । ଆମର ଦାୟିତ୍ୱ ସାମୂହିକ ।"

#WATCH | PM Modi addresses International Space Summit in France via video conferencing, says, "The promise of space is infinite. Our responsibility is collective. As orbits become more crowded, technologies more powerful, and actors more numerous. Our choices must be clear -… pic.twitter.com/vHhKx7GIdP

— Argus News (@ArgusNews_in) September 10, 2026

ପ୍ରଧାନମନ୍ତ୍ରୀ ମୋଦି ତାଙ୍କ ଅଭିଭାଷଣରେ କହିଥିଲେ, "ଭାରତର ଦୃଷ୍ଟିକୋଣ 'ବସୁଧୈବ କୁଟୁମ୍ବକମ୍' ଉପରେ ଆଧାରିତ, ଯାହାର ଅର୍ଥ 'ଏକ ପୃଥିବୀ, ଗୋଟିଏ ପରିବାର, ଗୋଟିଏ ଭବିଷ୍ୟତ' । ଏହି ବିଚାରଧାରା ​​ପୃଥିବୀ ବାହାରେ ବିସ୍ତାର ହେବା ଉଚିତ । ଆମେ ଅନ୍ତର୍ଜାତୀୟ ଆଇନ ଉପରେ ଆଧାରିତ ଏକ ସୁରକ୍ଷିତ ଏବଂ ସ୍ଥାୟୀ ମହାକାଶ କ୍ଷେତ୍ରକୁ ସମର୍ଥନ କରୁ । ବିଶ୍ଵ ସମୁଦାୟ ଏକ ସାଧାରଣ ଲକ୍ଷ୍ୟ ପାଇଁ ସଚ୍ଚୋଟତାର ସହିତ ବୈଜ୍ଞାନିକ ତଥ୍ୟ ବ୍ୟବହାର କରାଯିବା ଉଚିତ । ଭାରତର ମହାକାଶ ଯାତ୍ରା ମଧ୍ୟ ଏହି ଚିନ୍ତାଧାରା ସହିତ ଏକମତ ।"

• ଇସ୍ରୋକୁ ପ୍ରଶଂସା କଲେ ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତୀୟ ମହାକାଶ ସଂସ୍ଥା (ଇସ୍ରୋ)କୁ ମଧ୍ୟ ପ୍ରଶଂସା କରିଛନ୍ତି । ସେ କହିଛନ୍ତି, "ଇସ୍ରୋର ପ୍ରଯୁକ୍ତିବିଦ୍ୟା ଏବଂ ସହଭାଗିତା କେବଳ ଭାରତକୁ ନୁହେଁ ବରଂ ସମଗ୍ର ବିଶ୍ୱକୁ ସେବା କରେ । ଭାରତୀୟ ଲଞ୍ଚ ଯାନ ଦ୍ଵାରା ମହାକାଶକୁ ୩୪ଟି ଦେଶରୁ ୪୩୦ଟି ଉପଗ୍ରହକୁ ଲଞ୍ଚ କରାଯାଇଛି । ଏହି ବିଶ୍ୱସ୍ତରୀୟ ବିଶ୍ୱାସ ଭାରତୀୟ ବୈଜ୍ଞାନିକ, ଇଞ୍ଜିନିୟର ଏବଂ ଟେକ୍ନିସିଆନର ପିଢ଼ି ପରେ ପିଢ଼ିଙ୍କ କଠିନ ପରିଶ୍ରମ ଏବଂ ସମର୍ପଣର ଫଳାଫଳ । ସେମାନେ ଦିନରାତି କାମ କରି ଇସ୍ରୋର ପ୍ରତିଷ୍ଠା ନିର୍ମାଣ କରିଛନ୍ତି ।" ଏହାସହିତ ସେ ଇସ୍ରୋର ସଫଳ ଯାତ୍ରାକୁ ବିଶ୍ଵ ଆଗରେ ରଖିଥିଲେ । କିପରି ଭାରତ ପ୍ରଥମ ଦେଶ ଭାବେ ଜହ୍ନର ଦକ୍ଷିଣ ପାର୍ଶ୍ଵରେ ଅବତରଣ କରିଥିଲା, କିପରି ଭାରତର ଆଦିତ୍ୟ L1 ଗୋଟିଏ ପରେ ଗୋଟିଏ ସୂର୍ଯ୍ୟଙ୍କ ରହସ୍ୟ ଖୋଲୁଛି ତାହା ମଧ୍ୟ କହିଥିଲେ । ଏହାସହିତ ଗତବର୍ଷ ପ୍ରଥମ ଭାରତୀୟ ଭାବେ ଶୁଭାଂଶୁ ଶୁକ୍ଳାଙ୍କ ଅନ୍ତର୍ଜାତୀୟ ମହାକାଶ କେନ୍ଦ୍ର (ISS)ର ଯାତ୍ରାକୁ ମଧ୍ୟ ସେ ଉଲ୍ଲେଖ କରିଥିଲେ ।