Amarnath Shivling Melting Case: ଅମରନାଥ ଗୁମ୍ଫାରେ ପ୍ରତି ବର୍ଷ ଦର୍ଶନ ଦେଉଥିବା ପ୍ରାକୃତିକ ହିମଲିଙ୍ଗ ଏଥର ଦ୍ରୁତ ଗତିରେ ତରଳିବାରେ ଲାଗିଛି। ଏହାର କାରଣ ହେଉଛି ଚଳିତ ବର୍ଷ ସ୍ୱାଭାବିକ ଅପେକ୍ଷା ଅଧିକ ଗରମ ଅନୁଭୂତ ହେବାରେ ଲାଗିଛି। ଯାତ୍ରା ଆରମ୍ଭ ହେବା ପୂର୍ବରୁ ହିମଲିଙ୍ଗ ଆକାର ସଙ୍କୁଚିତ ହେବା ଆରମ୍ଭ କରିଦେଇଛି। ଯାହା ଭକ୍ତ, ଧାର୍ମିକ ସଙ୍ଗଠନ ଏବଂ ପ୍ରଶାସନ ମଧ୍ୟରେ ଚିନ୍ତା ସୃଷ୍ଟି କରିଛି। ହେଲେ ତଥାପି ଅଧିକାରୀ କହିଛନ୍ତି ଯେ ଏହା ଅମରନାଥ ଯାତ୍ରା କିମ୍ବା ତୀର୍ଥଯାତ୍ରୀଙ୍କ ଦର୍ଶନ ବ୍ୟବସ୍ଥାକୁ ପ୍ରଭାବିତ କରିବ ନାହିଁ।

ଗରମ ପାଗର ପ୍ରଭାବ ହେଉଛି ଦୃଶ୍ୟମାନ
ଅମରନାଥ ଗୁମ୍ଫା ସମୁଦ୍ର ପତ୍ତନରୁ ପ୍ରାୟ ୩୮୮୦ ମିଟର ଉଚ୍ଚତାରେ ଅବସ୍ଥିତ। ପ୍ରତିବର୍ଷ ଗୁମ୍ଫାର ଛାତରୁ ପଡୁଥିବା ପାଣି ଜମାଟ ବାନ୍ଧି ଏକ ପ୍ରାକୃତିକ ବରଫ ନିର୍ମିତ ହିମଲିଙ୍ଗ ଗଠନ କରିଥାଏ। ଏହାର ଆକାର ସମ୍ପୂର୍ଣ୍ଣ ଭାବରେ ପାଗ ଉପରେ ନିର୍ଭର କରେ। ଯେଉଁଥିରେ ତାପମାତ୍ରା, ଆର୍ଦ୍ରତା ଏବଂ ତୁଷାରପାତ ଏକ ପ୍ରମୁଖ ଭୂମିକା ଗ୍ରହଣ କରିଥାଏ। ଚଳିତ ବର୍ଷ ଜୁନ୍ ମାସରେ କାଶ୍ମୀର ଉପତ୍ୟକା ଏବଂ ଅଧିକ ଉଚ୍ଚତାରେ ରହିଥିବା ସ୍ଥାନର ତାପମାତ୍ରା କିଛି ଦିନ ପର୍ଯ୍ୟନ୍ତ ସ୍ୱାଭାବିକ ଠାରୁ ଅଧିକ ରହିଥିଲ। ଯାହା ଉଚ୍ଚ ପାର୍ବତ୍ୟାଞ୍ଚଳକୁ ମଧ୍ୟ ପ୍ରଭାବିତ କରିଥିଲା। ଏହି କାରଣରୁ ସେଠାରେ ବରଫ ଦ୍ରୁତ ଗତିରେ ତରଳିବା ସହ ହିମଲିଙ୍ଗ ଆକାର ସଙ୍କୁଚିତ ହେବାରେ ଲାଗିଥିଲା।

କମ୍ ତୁଷାରପାତ ମଧ୍ୟ ଗ୍ରହଣ କରିଥିଲା ଏକ ଭୂମିକା
ବିଶେଷଜ୍ଞ ଏହା କହିଛନ୍ତି ଯେ ଏଥର ଶୀତ ଋତୁରେ, ଅନେକ ଅଞ୍ଚଳରେ ସ୍ୱାଭାବିକ ତୁଳନାରେ କମ୍ ତୁଷାରପାତ ହୋଇଥିଲା। ଯାହା ଗୁମ୍ଫା ଚାରିପାଖରେ ଥଣ୍ଡା ପରିବେଶକୁ ଦୀର୍ଘ ସମୟ ପର୍ଯ୍ୟନ୍ତ ରହିବାରୁ ରୋକିଥିଲା। ଏହା ବ୍ୟତୀତ, ମେ-ଜୁନ୍ ମାସରେ ପ୍ରଚଣ୍ଡ ସୂର୍ଯ୍ୟକିରଣ ଏବଂ ଗରମ ପବନ ହିମଲିଙ୍ଗକୁ ଦ୍ରୁତ ଗତିରେ ତରଳିବା ପ୍ରକ୍ରିୟାକୁ ବଢାଇ ଦେଇଥିଲା।

ଏହା ସହ ପଢନ୍ତୁ: ସୁରକ୍ଷା ଏଜେନ୍ସି ପାଇଁ କ'ଣ ରହିଛି ଚ୍ୟାଲେଞ୍ଜ? କିପରି ହେଉଛି ଯାତ୍ରା ପାଇଁ ପ୍ରସ୍ତୁତି?

ଜଳବାୟୁ ପରିବର୍ତ୍ତନର ପ୍ରଭାବ
ପରିବେଶ ବିଜ୍ଞନୀ ବିଶ୍ୱାସ କରନ୍ତି ଯେ ଜଳବାୟୁ ପରିବର୍ତ୍ତନର ପ୍ରଭାବ ଏବେ ହିମାଳୟ ଅଞ୍ଚଳରେ ସ୍ପଷ୍ଟ ଭାବରେ ଦୃଶ୍ୟମାନ ହେଉଛି। ହିମବାହ ନିରନ୍ତର ସଙ୍କୁଚିତ ହେବାରେ ଲାଗିଛି। ତୁଷାରପାତର ଶୈଳୀ ପରିବର୍ତ୍ତନ ହେଉଛି। ପୂର୍ବ ସମୟ ତୁଳନାରେ ତାପମାତ୍ରା ମଧ୍ୟ ବୃଦ୍ଧି ପାଉଛି। ଏହି ପରିବର୍ତ୍ତନ ଅମରନାଥ ଗୁମ୍ଫାରେ ନଜର ଆସୁଥିବା ବରଫ ନିର୍ମିତ ହିମଲିଙ୍ଗର ଗଠନ ଏବଂ ଆକାରକୁ ପ୍ରଭାବିତ କରୁଛି। ସାମ୍ପ୍ରତିକ ବର୍ଷରେ ହିମଲିଙ୍ଗ ଅସମୟରେ ସଙ୍କୁଚିତ କିମ୍ବା ତରଳିବାର ଘଟଣା ଘଟିଛି।

ଯାତ୍ରା ପାଇଁ ଜାରି ରହିଛି ପ୍ରସ୍ତୁତି
ଏହି ସମୟରେ ପ୍ରଶାସନ ଅମରନାଥ ଯାତ୍ରା ପାଇଁ ପ୍ରସ୍ତୁତିରେ ବ୍ୟସ୍ତ ରହିଛି। ପହଲଗାମ୍ ଏବଂ ବାଲତାଲ୍ ଉଭୟ ରାସ୍ତାରେ ତୀର୍ଥଯାତ୍ରୀଙ୍କ ପାଇଁ ଆବଶ୍ୟକୀୟ ସୁବିଧା ବିକଶିତ କରାଯାଉଛି। ସୁରକ୍ଷା ବ୍ୟବସ୍ଥାକୁ ମଧ୍ୟ ମଜବୁତ କରାଯାଉଛି। ଅଧିକାରୀ କହିଛନ୍ତି ଯେ ହିମଲିଙ୍ଗ ଆକାର ଆସ୍ଥାର ବିଷୟ। ହେଲେ ଏଥରହ ଯାତ୍ରାର ସୁରକ୍ଷା, ପରିଚାଳନା ଏବଂ ଦର୍ଶନ ବ୍ୟବସ୍ଥାକୁ ପ୍ରଭାବିତ କରିବ ନାହିଁ।

ଗୁଜବକୁ ଏଡାଇବାକୁ ନିବେଦନ
ଧାର୍ମିକ ସଙ୍ଗଠନ ଗୁଜବରେ ଧ୍ୟାନ ନଦେବାକୁ ଭକ୍ତଙ୍କୁ ନିବେଦନ କରିଛନ୍ତି। ସେମାନେ କହିଛନ୍ତି ଯେ ପ୍ରତିବର୍ଷ ପାଗ ଅନୁଯାୟୀ ବରଫ ଲିଙ୍ଗର ଆକାର ପରିବର୍ତ୍ତନ ହୋଇଥାଏ। ଏହାକୁ ଏକ ଅସାଧାରଣ ଘଟଣା ବୋଲି ବିବେଚନା କରାଯିବା ଉଚିତ୍ ନୁହେଁ।

ପାଗ ଉପରେ ନଜର
ଆଗାମୀ ଦିନରେ ତାପମାତ୍ରା ସ୍ୱାଭାବିକ ଠାରୁ ଟିକିଏ ଅଧିକ ରହିବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ଏପରି ପରିସ୍ଥିତିରେ ବରଫ ଲିଙ୍ଗର ଆକାର ଆହୁରି ହ୍ରାସ ପାଇପାରେ। ବର୍ତ୍ତମାନ ପ୍ରଶାସନ କହୁଛି ଯେ ଯାତ୍ରା ସମୟରେ ଭକ୍ତଙ୍କୁ ନିରାପଦ ଏବଂ ସୁଗମ ଦର୍ଶନ ଯୋଗାଇ ଦିଆଯିବ। ସମସ୍ତ ଆବଶ୍ୟକୀୟ ସୁବିଧା ଉପଲବ୍ଧ ହେବ। ବର୍ତ୍ତମାନ, ଲକ୍ଷ ଲକ୍ଷ ଭକ୍ତ ପାଗ ଏବଂ ଅମରନାଥ ଗୁମ୍ଫାରେ ସୃଷ୍ଟି ହେଉଥିବା ପ୍ରାକୃତିକ ବରଫ ଲିଙ୍ଗର ଅବସ୍ଥା ଉପରେ ନଜର ରଖିଛନ୍ତି।