Char Dham Yatra Temporarily Suspended / ଅଟକିଗଲା ଚାରିଧାମ ଯାତ୍ରା; ପ୍ରବଳ ଥଣ୍ଡାରେ ଫସି ରହିଛନ୍ତି ୪୦୦୦ ତୀର୍ଥଯାତ୍ରୀ

ଦେବଭୂମି ଉତ୍ତରାଖଣ୍ଡରେ ଅବିରତ ବର୍ଷା ଯୋଗୁଁ ପର୍ବତରେ ଭୂସ୍ଖଳନ ଜାରି ରହିଛି। ଯାହା ଦ୍ୱାରା ରାଜ୍ୟର ପରିବହନ ବ୍ୟବସ୍ଥା ସର୍ବାଧିକ ପ୍ରଭାବିତ ହୋଇଛି। ରୁଦ୍ରପ୍ରୟାଗ ଠାରେ ଭୂସ୍ଖଳନ ଯୋଗୁଁ ଚାରିଧାମ ଯାତ୍ରାକୁ ଅସ୍ଥାୟୀ ଭାବରେ ବନ୍ଦ କରାଯାଇଛି। ଉଭୟ ପାର୍ଶ୍ୱରେ ପ୍ରାୟ ୪,୦୦୦ ତୀର୍ଥଯାତ୍ରୀ ଫସି ରହିଛନ୍ତି। ରାଜପଥରେ ଭଗ୍ନାବଶେଷ ଜମା ହୋଇଛି। ଯାତ୍ରା ମାର୍ଗରେ ଜମା ହୋଇଥିବା ଭଗ୍ନାବଶେଷ ହଟାଇବା ପାଇଁ ବିଭିନ୍ନ ଉପକରଣ ବ୍ୟବହାର କରାଯାଇଛି। ହେଲେ ଖରାପ ପାଗ ଯୋଗୁଁ ଭଗ୍ନାବଶେଷ ସଫା କରିବା ପ୍ରକ୍ରିୟା ବାଧାପ୍ରାପ୍ତ ହୋଇଛି। ଯାହାର ଫଳସ୍ୱରୂପ, ପ୍ରଶାସନ ପରବର୍ତ୍ତୀ ସୂଚନା ପର୍ଯ୍ୟନ୍ତ କେଦାରନାଥ ଯାତ୍ରାକୁ ସ୍ଥଗିତ ରଖିଛି। ଅନ୍ୟପଟେ ହେଲିକ୍ୟାପ୍ଟର ସେବା ପୂର୍ବରୁ ସ୍ଥଗିତ ରଖାଯାଇଛି। ରାଜ୍ୟରେ ଦିନସାରା ପ୍ରବଳ ବର୍ଷା ପାଇଁ ପାଣିପାଗ ବିଭାଗ ମଧ୍ୟ ରେଡ୍ ଆଲର୍ଟ ଜାରି କରିଛି।

ବଦ୍ରିନାଥ ରାଜପଥରେ ଭୂସ୍ଖଳନ
ଉତ୍ତରାଖଣ୍ଡର ରୁଦ୍ରପ୍ରୟାଗ ଠାରେ ନିରନ୍ତର ବର୍ଷା ଯୋଗୁଁ, ବଦ୍ରିନାଥ ଜାତୀୟ ରାଜପଥର ସିରୋବାଗଡ଼ ପୁଣି ଥରେ ସମସ୍ୟାର କାରଣ ପାଲଟିଛି। ଧାରୀ ଦେବୀ ମନ୍ଦିର ନିକଟ ଏକ ପାହାଡରୁ ହଠାତ୍ ବିପୁଳ ପରିମାଣର ଭଗ୍ନାବଶେଷ ଏବଂ ପଥର ରାଜପଥ ଉପରେ ପଡ଼ି ଜମା ହୋଇଯିବାରୁ ଯାତାୟାତ ସମ୍ପୂର୍ଣ୍ଣ ଭାବରେ ବାଧାପ୍ରାପ୍ତ ହୋଇଛି। କିଛି ମିନିଟ୍ ମଧ୍ୟରେ ରାଜପଥର ଉଭୟ ପାର୍ଶ୍ୱରେ ଗାଡ଼ିର ଲମ୍ବା ଧାଡ଼ି ସୃଷ୍ଟି ହେବା ଯୋଗୁଁ ହଜାର ହଜାର ଯାତ୍ରୀ ଫସି ରହିଥିଲେ। ସିରୋବାଗଡ଼ ଠାରେ ପାହାଡ଼ରୁ ନିରନ୍ତର ଭଗ୍ନାବଶେଷ ଖସିବା ଯୋଗୁଁ ରାଜପଥକୁ ପୁନର୍ବାର କାର୍ଯ୍ୟକ୍ଷମ କରିବାରେ ଏକ ଚ୍ୟାଲେଞ୍ଜ ସୃଷ୍ଟି କରିଛି। ସ୍ଥାନୀୟ ପ୍ରଶାସନ ଯନ୍ତ୍ରପାତି ସହାୟତାରେ ଜାତୀୟ ରାଜପଥରୁ ଭଗ୍ନାବଶେଷ ହଟାଇବା ପାଇଁ କାମ କରୁଛି। ହେଲେ ନିରନ୍ତର ଭଗ୍ନାବଶେଷ ଏବଂ ପଥର ପଡ଼ିବା ଯୋଗୁଁ ସୁରକ୍ଷିତ ଭାବରେ ରାସ୍ତାକୁ ପୁନର୍ବାର ଖୋଲିବା କଷ୍ଟକର ହୋଇପଡ଼ିଛି। ଯାହା ଯାତ୍ରୀଙ୍କ ପାଇଁ ଅସୁବିଧା ବୃଦ୍ଧି କରୁଛି।

ଏହା ସହ ପଢନ୍ତୁ: ବନ୍ଦ ହୋଇଗଲା କେଦାରନାଥ ଯାତ୍ରା; ଚିରବାସା ଠାରେ ଧସିଲା ପାହାଡ଼, ସୁରକ୍ଷିତ ସ୍ଥାନରେ ଅଟକି ରହିଲେ ତୀର୍ଥଯାତ୍ରୀ

ରୁଦ୍ରପ୍ରୟାଗ ଠାରେ ୩ ଦଶନ୍ଧି ଧରି ଲାଗି ରହିଛି ଏହି ସମସ୍ୟା
ସିରୋବାଗଡ଼ ଠାରେ ବର୍ତ୍ତମାନ ସୃଷ୍ଟି ହୋଇଥିବା ସମସ୍ୟା କୌଣଶି ନୂଆ କଥା ନୁହେଁ। ପ୍ରାୟ ୩ ଦଶନ୍ଧି ଧରି, ଏହି ଅଞ୍ଚଳ ବର୍ଷା ଋତୁରେ ବଦ୍ରିନାଥ ରାଜପଥ ପାଇଁ ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଥାଏ। ବର୍ଷା ହେବା ମାତ୍ରେ ପାହାଡ଼ରୁ ଭଗ୍ନାବଶେଷ ଏବଂ ପଥର ଖସିବା ଆରମ୍ଭ ହୋଇଥାଏ। ଯାହା ଦ୍ୱାରା ବାରମ୍ବାର ଜାତୀୟ ରାଜପଥ ଅବରୋଧିତ ହୋଇଥାଏ। ପ୍ରତିବର୍ଷ ଯନ୍ତ୍ରପାତି ନିୟୋଜିତ କରାଯାଇ ଭଗ୍ନାବଶେଷ ହଟାଯାଏ ଏବଂ ପରିବହନ ବ୍ୟବସ୍ଥାକୁ ପୁନର୍ବାର କାର୍ଯ୍ୟକ୍ଷମ କରାଯାଏ। ହେଲେ ପରବର୍ତ୍ତୀ ସମୟରେ ହେଉଥିବା ବର୍ଷା ସହିତ ସମସ୍ୟା ପୁନର୍ବାର ଦେଖାଦିଏ। ସବୁଠାରୁ ବଡ଼ ପ୍ରଶ୍ନ ହେଉଛି ସିରୋବାଗଡ଼ ଠାରେ ଭଗ୍ନାବଶେଷ ହଟାଇବା ପ୍ରୟାସ କେତେ ଦିନ ଜାରି ରହିବ ଏବଂ ଏହି ପୁରୁଣା ସମସ୍ୟାର ସ୍ଥାୟୀ ସମାଧାନ କେବେ ମିଳିବ? କାରଣ ଏହି ରାସ୍ତାରେ ଯାତ୍ରୀ ଯାତ୍ରା କରିବା ସମୟରେ ନାନାଦି ଅସୁବିଧା ଭୋଗିଥାନ୍ତି।