ହଠାତ୍ ରବିବାର ମାର୍କେଟ ପାଲଟିଲା କ୍ରିକେଟ୍ ମୈଦାନ । ହାତରେ ବ୍ୟାଟ୍, ଷ୍ଟମ୍ପ ଧରି ରାସ୍ତାରେ ଲୋକେ । କେହି କିଛି ବୁଝିବା ଆଗରୁ ମାରପିଟ, ଗାଳିଗୁଲଜ । ଏହା ବଜାର ନା କୁସ୍ତି ମୈଦାନ ନା କ୍ରିକେଟ୍ ପଡ଼ିଆ ତାହା ଲୋକେ ବୁଝିପାରୁନଥିଲା । ଏମିତି କିଛି ଦୃଶ୍ୟ ଦେଖିବାକୁ ମିଳିଥିଲା ଉତ୍ତରପ୍ରଦେଶ ଝାନ୍ସି ଜିଲ୍ଲାର ସବୁଠୁ ବ୍ୟସ୍ତ ବଜାର ମାନିକଚୌକରେ । ଗ୍ରାହକ ଓ ଦୋକାନୀଙ୍କ ମଧ୍ୟରେ ମାତ୍ର ୭୩୦ ଟଙ୍କାର ସପିଂକୁ ନେଇ ଗଣ୍ଡଗୋଳ ହୋଇଥିଲା ।

ନିଜ ପିଲାଙ୍କ ପାଇଁ ବ୍ୟାଟ୍ ଓ ବଲ୍ କିଣିବାକୁ ପହଞ୍ଚିଥିବା ଜଣେ ଗ୍ରାହକ ଓ ଦୋକାନୀଙ୍କ ମଧ୍ୟରେ ସାମାନ୍ୟ ବଚସା ଶେଷରେ ମାରପିଟରେ ପରିଣତ ହୋଇଥିଲା । ମଝିରାସ୍ତାରେ ଉଭୟ ପକ୍ଷ ମଧ୍ୟରେ ବ୍ୟାଟ୍ ଓ ଷ୍ଟମ୍ପ ଧରି ମାରପିଟ ଆରମ୍ଭ ହୋଇଯାଇଥିଲା । ବଜାରରେ ଉପସ୍ଥିତ ଲୋକେ ପୁରା ଘଟଣାର ଭିଡିଓ ନିଜ ମୋବାଇଲ କ୍ୟାମେରାରେ ରେକର୍ଡ କରିଥିଲେ, ଯାହାକି ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ଭାଇରାଲ ଭିଡିଓରେ ଦୋକାନୀ ଓ ଗ୍ରାହକଙ୍କ ମଧ୍ୟରେ ଏତେ ଜୋରରେ ଗଣ୍ଡଗୋଳ ହୋଇଥିଲା ଯେ ଦେଖୁ ଦେଖୁ ଭିଡ଼ ଜମିଥିଲା ।

• କଣ ପୂରା ଘଟଣା ?

ଝାନ୍ସିର ମାନିକଚୌକ ସ୍ଥିତ ଏକ ଖେଳ ସାମଗ୍ରୀ ଦୋକାନରୁ ନିଜ ପିଲାଙ୍କ ପାଇଁ କ୍ରିକେଟର କିଛି ଜିନିଷ କିଣିବାକୁ ପହଞ୍ଚିଥିଲେ । ସେ ଦୋକାନରୁ ପ୍ରାୟ ୭୩୦ ଟଙ୍କାର ସାମଗ୍ରୀ କିଣିଥିଲେ ଓ ଅନଲାଇନ ପେମେଣ୍ଟ ମଧ୍ୟ କରିସାରିଥିଲେ । ଆରମ୍ଭରୁ ସବୁକିଛି ଠିକ୍ ଥିଲା, ହେଲେ ଦେଖୁ ଦେଖୁ ଗ୍ରାହକ ଜଣକ ଦୋକାନରୁ ବାହାରିବା ସମୟରେ ଉଭୟ ପକ୍ଷ ମଧ୍ୟରେ ଯୁକ୍ତିତର୍କ ହୋଇଥିଲା । ଏହାପରେ ଦୁଇ ପକ୍ଷ ରାସ୍ତା ଉପରକୁ ଓହ୍ଲାଇଥିବାବେଳେ ମାରପିଟ ମଧ୍ୟ ଆରମ୍ଭ ହୋଇଥିଲା ।

• କଣ କହିଲେ ଦୋକାନୀ ?

ଦୋକାନର ମାଲିକ ବିନୟ ଅଗ୍ରୱାଲ କହିଛନ୍ତି ଯେ ଗ୍ରାହକ ଜଣକ ନିଜ ସାମଗ୍ରୀ କିଣିବା ପରେ ପରିବାରକୁ ନେଇ ଅଭଦ୍ର ଟିପ୍ପଣୀ ଦେବା ସହ ଗାଳି ଗୁଲଜ ମଧ୍ୟ କରିଥିଲେ । ଦୋକାନୀ ଜଣକ କହିଥିଲେ ଯେ ପରିବାରକୁ ନେଇ ଏପରି କଥା କୁହନ୍ତୁ ନାହିଁ, ଯଦି ଆପଣଙ୍କୁ ବ୍ୟବହାର ଭଲ ଲାଗୁନି ତେବେ ଆଗକୁ ଦୋକାନକୁ ଆସନ୍ତୁ ନାହିଁ । ଏହାପରେ ଦୋକାନୀ ଜଣକ ଉତକ୍ଷିପ୍ତ ହୋଇଯାଇଥିଲେ ଏବଂ ଉକ୍ତ ଦୋକାନୀଙ୍କୁ ମାଡ଼ ମାରିଥିଲେ । ୭୩୦ ଟଙ୍କାର ସାମଗ୍ରୀ କିଣିଥିବା ଗ୍ରାହକଙ୍କ ସହିତ ଜିନିଷ କିଣାବିକା ନୁହେଁ, ବରଂ ଅଭଦ୍ର ଟିପ୍ପଣୀକୁ ନେଇ ମାରପିଟ ହୋଇଥିଲା ।

ପଢନ୍ତୁ ଏହି ଖବର: ଇଦ ପୂର୍ବରୁ ବଜାରରେ ବଢୁଛି ଟ୍ରମ୍ପ-ନେତାନ୍ୟାହୁ ମଇଁଷିର ଚାହିଦା; ସେଲ୍ଫି ପାଇଁ ପ୍ରବଳ ଭିଡ଼

ତେବେ ସମ୍ପୃକ୍ତ ଗ୍ରାହକ ଜଣକ ଘଟଣାସ୍ଥଳରୁ ଫେରାର ହୋଇଯିବା ଯୋଗୁଁ ଔପଚାରିକ ଭାବେ କୌଣସି ମାମଲା ରୁଜୁ କରାଯାଇନାହିଁ । କିନ୍ତୁ ଏହି ମାରପିଟର ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । ଏହାପରେ ଝାନ୍ସି ପୋଲିସ ମଧ୍ୟ ସକ୍ରିୟ ଅଛି । କୋତବାଲି ପୋଲିସ ପୁରା ଘଟଣାର ଯାଞ୍ଚ କରୁଥିବାବେଳେ ଭାଇରାଲ ଭିଡିଓକୁ ମଧ୍ୟ ପରଖିଛି ।