Dog vs Cobra / ଫଣା ଟେକି ଚାହିଁଥିଲା କୋବ୍ରା; ମାଡ଼ିଗଲା ୯ ବର୍ଷର ଟମି...ଆଉ ଶେଷରେ

ଲକ୍ଷ୍ନୌ: ଉତ୍ତର ପ୍ରଦେଶ ବଲିୟା ଜିଲ୍ଲାରେ ବେଲଥରା ରୋଡ୍ ନିକଟ ଦାନିଶ ଭଟ୍ଟାଙ୍କ ଘରେ ପଶୁଥିଲା ବିଷଧର ସାପ । ମାଲିକ ଓ ତାଙ୍କ ପରିବାରକୁ ସୁରକ୍ଷା ଦେବା ଲାଗି ଟିକେ ବି ଭାବିନଥିଲା ୯ ବର୍ଷୀୟ ଏହି ସାହସୀ କୁକୁର । ସିଧା ନିଜ ଜୀବନ କଥା ନ ଭାବି ମରଣମୁହଁକୁ ଡେଇଁଥିଲା । ଦାନିଶଙ୍କ ଲାବ୍ରାଡୋର କୁକୁର 'ଟମି' ପ୍ରାୟ ଘଣ୍ଟାଏ କାଳ ସାପ ସହ ଲଢିଥିଲା । ଟମି ଶେଷରେ କୋବ୍ରାକୁ ମାରିଦେଇଥିଲା । ସଂଘର୍ଷ ବେଳେ ବାରମ୍ବାର ସାପଠୁ ଚୋଟ ଖାଉଥିଲେ ସୁଧା ହାର ମାନିନଥିଲା ।

• ଜଗୁଆଳ ସାଜିଥିଲା ଟମି

ରାତିରେ ଯେତେବେଳେ ଦାନିଶଙ୍କ ପୂରା ପରିବାର ଶୋଇଥିଲା, ସେତେବେଳେ ଏକ ବିଷଧର ସାପ ଘର ବାହାରେ ଫଣା ଟେକି ପହଞ୍ଚିଥିଲା । ଟମି ବିପଦ ଦେଖି ସଙ୍ଗେସଙ୍ଗେ ଭୋକିବାକୁ ଲାଗିଥିଲା । ଦେଖୁ ଦେଖୁ ସାପଟି ଟମି ଉପରେ ଆକ୍ରମଣ କରିଥିଲା, ଯାହାର ଜବାବ ଦେଇଥିଲା ଏହି କୁକୁର । କୋବ୍ରା ବାରମ୍ବାର ଟମିକୁ ଚୋଟ ମାରୁଥିଲା, ଏହାପରେ ମଧ୍ୟ ଟମି ହାର ମାନିନଥିଲା ।

• କ୍ୟାମେରାରେ କଏଦ ବିଶ୍ଵସ୍ତ ସାଥୀର ଶେଷ ଲଢେଇ

ବାହାରେ ଟମିର ଭୋକିବା ଶବ୍ଦ ଶୁଣି ଦାନିଶଙ୍କ ପରିବାର ନିଦରୁ ଉଠିଥିଲା । ଘରୁ ବାହାରକୁ ଆସିବା ପରେ ଦେଖିଥିଲେ ଭୟଙ୍କର ଲଢେଇ । ଟମି ଟିକେ ବି ପଛକୁ ନ ହଟି ପ୍ରାୟ ୧ ଘଣ୍ଟା ପର୍ଯ୍ୟନ୍ତ ସାପ ସହ ଲଢେଇ କରିଥିଲା । ଶେଷରେ ଟମି ସାପକୁ ମାରିଥିଲା । ଟମିର ସାହସିକତାର ଭିଡିଓ କଏଦ କରିଥିଲେ ସେଠାରେ ଉପସ୍ଥିତ କିଛି ଲୋକ । ଏହି ପୂରା ଘଟଣାର ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେଉଛି । 

ପଢନ୍ତୁ ଏହି ଖବର: ବାଥରୁମ ଭିତରେ ୭ ଫୁଟର ହିଂସ୍ର କୁମ୍ଭୀର; କବାଟ ଖୋଲିଲା ବେଳକୁ ଡରି ଛାନିଆ

• ଓଦା ଆଖିରେ ଟମିକୁ ଅଲବିଦା

ସାପକୁ ମାରିବାର ପ୍ରାୟ ୩୦ ମିନିଟ୍ ମଧ୍ୟରେ ଟମି ଶରୀରରେ ବିଷ ବ୍ଯାପିଯାଇଥିଲା ଓ ଶେଷରେ ସେ ଆଖି ବୁଜିଥିଲା । ୯ ବର୍ଷ ଧରି ପରିବାର ସହ ଥିବା ଏହି କୁକୁରର ବିୟୋଗରେ ପରିବାର ଦୁଃଖରେ ଭାଙ୍ଗି ପଡ଼ିଛନ୍ତି । ଦାନିଶଙ୍କ ପରିବାର ଶେଷରେ ଟମିକୁ ଅଶ୍ରୁଳ ବିଦାୟ ଦେଇଛନ୍ତି । ଟମିର ସାହସିକତା ଓ ବିଶ୍ଵସନୀୟତାକୁ ସାରା ଅଞ୍ଚଳରେ ପ୍ରଶଂସା କରାଯାଉଛି । ଆଜି ଟମି ଚାଲିଯାଇଛି ସତ, କିନ୍ତୁ ପୁଣି ଥରେ କୁକୁର ଜାତିର କେତେ ବିଶ୍ଵସ୍ତ ତାହା ପ୍ରମାଣ ଦେଇଛି ।