ସତରେ ବସ୍ ହେବ ତ ଏମିତି । ନିଜ କର୍ମଚାରୀଙ୍କ ଅସୁବିଧାକୁ ବୁଝି ଦେଖାଇଲେ ମାନବିକତାର ପରିଚୟ । ରୋଗିଣା ପୁଅ ପାଇଁ ଚାକିରି ଛାଡ଼ିବାକୁ ଆସିଥିବା କର୍ମଚାରୀଙ୍କ ଚାକିରି ନେବା ପରିବର୍ତ୍ତେ ଦେଲେ ଆଶ୍ଵାସନା । ଅଫିସ୍ ନ ଆସି ରୋଗିଣା ପୁଅ ପାଖରେ ରହିବାକୁ କହିଲେ । ଆଉ ମାସକୁ ମାସ ପଠାଇଲେ ଦରମା । ୧୦ ବର୍ଷ ଅଫିସ୍ ପାଇଁ ଦେଇଥିବା କର୍ମଚାରୀ ଜଣକ ପ୍ରକୃତରେ ନିଜର କର୍ମଫଳ ପାଇଛନ୍ତି । ଏହି ଘଟଣାଟି ଏବେ ଚର୍ଚ୍ଚାର ବିଷୟ ପାଲଟିଛି । ସମସ୍ତଙ୍କୁ ଏପରି ବସ୍ ବା ମ୍ୟାନେଜର ମିଳୁ ବୋଲି କର୍ମଚାରୀମାନେ କହୁଛନ୍ତି ।

• ନିଜେ ପୂରା ଘଟଣା କହିଲେ ଚର୍ଚ୍ଚିତ ବସ୍

ଅଙ୍କିତ ପାଣ୍ଡେ ନାମକ ଜଣେ ଏକ୍ସ ୟୁଜର ନିଜର ଏକ ପୋଷ୍ଟରେ ଏହି ଘଟଣା ସମ୍ପର୍କରେ ଉଲ୍ଲେଖ କରିଛନ୍ତି । ସେ କହିଛନ୍ତି ଯେ ତାଙ୍କ ଆକାଉଣ୍ଟାଣ୍ଟ ନିକଟରେ ତାଙ୍କୁ ଯୋଗାଯୋଗ କରିଥିଲେ ଏବଂ ଇସ୍ତଫା ଦେବାକୁ ଅନୁରୋଧ କରିଥିଲେ । ଉକ୍ତ କର୍ମଚାରୀ ଜଣକ ତାଙ୍କ ସହିତ ୧୦ ବର୍ଷ ଧରି କାମ କରୁଥିଲେ, ତେଣୁ ହଠାତ୍ ଇସ୍ତଫା କଥା ଶୁଣି ସେ ଆଶ୍ଚର୍ଯ୍ୟ ହୋଇଯାଇଥିଲେ । ଏହାପରେ ସେ ତାଙ୍କୁ ଇସ୍ତଫା ଦେବାର କାରଣ ପଚାରିଥିଲେ ।

• ରୋଗିଣା ପୁଅ ପାଇଁ ଚାକିରି ଛାଡୁଥିଲେ କର୍ମଚାରୀ

ଆକାଉଣ୍ଟାଣ୍ଟ ଆଖିରେ ଲୁହ ସହିତ ସେ ଉତ୍ତର ଦେଇଥିଲେ, 'ମୋ ପୁଅର ଅବସ୍ଥା ବହୁତ ଗମ୍ଭୀର । ଡାକ୍ତରମାନେ ତା'ର ଆରୋଗ୍ୟ ପାଇଁ ବହୁତ କମ୍ ଆଶା ଦେଇଛନ୍ତି । ମୁଁ ତା' ସହିତ ମୋର ସମସ୍ତ ସମୟ ବିତାଇବାକୁ ଚାହୁଁଛି । ନିଯୁକ୍ତିଦାତା ଏହା ମଧ୍ୟ ପଚାରିଥିଲେ ଯେ ସେ ଘରୁ କାମ କରିପାରିବେ କି ? କିନ୍ତୁ କର୍ମଚାରୀ ଜଣକ ମନା କରି କହିଥିଲେ ତାଙ୍କ ପୁଅ ଅନ୍ୟ ସମସ୍ତ ଜିନିଷ ଅପେକ୍ଷା ଏବେ ତାଙ୍କୁ ଅଧିକ ଆବଶ୍ୟକ କରୁଛି । ପ୍ରତିକ୍ରିୟାରେ ନିଯୁକ୍ତିଦାତା ଯାହା କହିଥିଲେ ତାହା ଇଣ୍ଟରନେଟକୁ ଆଶ୍ଚର୍ଯ୍ୟ କରିଛି । ନିଯୁକ୍ତିଦାତା ସଙ୍ଗେ ସଙ୍ଗେ ତାଙ୍କୁ ସମର୍ଥନ ପ୍ରଦାନ କରିଥିଲେ ।

Two months ago, my accountant came to my office and requested to resign.

He had been working with us for 10 years, so I was surprised.

I asked him, "Why do you want to leave?"

With tears in his eyes, he replied, "My son's condition is very serious. Doctors have given very…

— Ankit Pandey (@iamankitpande) June 3, 2026

• ଚାକିରି ନ ନେଇ ଦେଲେ ଦରମା

ନିଯୁକ୍ତିଦାତା ଅଙ୍କିତ ନିଜ ପୋଷ୍ଟରେ ଲେଖିଛନ୍ତି, "ମୁଁ ତାଙ୍କୁ କହିଲି ପୁଅ ସହିତ ରୁହ । ଏଠାରେ ତୁମର ପଦବୀ ତୁମ ପାଇଁ ଖାଲି ରହିବ । କିନ୍ତୁ ୧୦ ବର୍ଷର ବିଶ୍ୱସ୍ତତା ପରେ ମୁଁ ତାଙ୍କୁ ଏକା ଏହି ଅସୁବିଧାର ସମ୍ମୁଖୀନ ହେବାକୁ ଦେଇପାରିଲି ନାହିଁ। ତେଣୁ ମୁଁ କହିଲି, 'ଟଙ୍କା ବିଷୟରେ ଚିନ୍ତା କର ନାହିଁ । ତୁମର ଦରମା ତୁମ ଆକାଉଣ୍ଟକୁ ମାସ ଶେଷରେ ଯିବ । ତୁମର ପୁଅ ଉପରେ ଧ୍ୟାନ ଦିଅ ଏବଂ ସେ ସୁସ୍ଥ ହେଲେ ପୁଣି ଅଫିସ ଆସିପାରିବ ।"

• ମିଠା ବାକ୍ସ ସହ ଫେରିଲେ କର୍ମଚାରୀ

ପୋଷ୍ଟରେ ନିଯୁକ୍ତିଦାତା ଅଙ୍କିତ କହିଛନ୍ତି ଯେ କର୍ମଚାରୀ ଜଣକ ଠିକ୍ ଗୋଟିଏ ମାସ ପରେ ମିଠା ବାକ୍ସ ସହିତ ଅଫିସ ଆସିଥିଲେ । ତାଙ୍କ ପୁଅ ସୁସ୍ଥ ହୋଇଯାଇଛି ବୋଲି କହିଥିଲେ । ସେ ଯେଉଁ ଗୋଟେ ମାସ ଆସିନଥିଲେ, ତାର ଦରମା ଫେରସ୍ତ ନେବାକୁ ମଧ୍ୟ ଅନୁରୋଧ କରିଥିଲେ । କିନ୍ତୁ ନିଯୁକ୍ତିଦାତା ମନା କରିଥିଲେ ଏବଂ କହିଥିଲେ, "ଏହା ଦରମା ନଥିଲା । ତୁମ ପୁଅର ଆରୋଗ୍ୟ ପାଇଁ ଏହା ଆମର ଛୋଟ ଅବଦାନ ଥିଲା ।" ଏକ୍ସ ୟୁଜର ତଥା ନିଯୁକ୍ତିଦାତା ଅଙ୍କିତ କର୍ମସ୍ଥଳକୁ ଘର ଓ କର୍ମଚାରୀଙ୍କୁ ନିଜ ପରିବାର ବୋଲି ଭାବିବା ଉଚିତ ବୋଲି ନିଜ ପୋଷ୍ଟରେ ଲେଖିଥିଲେ । ଅଙ୍କିତ ନିଜ ପୋଷ୍ଟରେ କମ୍ପାନୀର ନାମ କିମ୍ବା ଆକାଉଣ୍ଟାଣ୍ଟଙ୍କ ନାମ ଉଲ୍ଲେଖ କରିନଥିଲେ ।

• ଅଙ୍କିତଙ୍କୁ ଛୁଟିଲା ପ୍ରଶଂସାର ସୁଅ

ଏହି ପୋଷ୍ଟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ୟୁଜର ଅଙ୍କିତଙ୍କୁ ତାଙ୍କର ପ୍ରତିକ୍ରିୟା ପାଇଁ ପ୍ରଶଂସା କରିଛନ୍ତି । ଜଣେ ୟୁଜର ଲେଖିଛନ୍ତି, "ବାଃ...ତୁମକୁ ସଲାମ ବନ୍ଧୁ । ଏହା ତୁମର ନିଃସ୍ୱାର୍ଥପରତାକୁ ଦର୍ଶାଇଛି । ତୁମର ଏହି ନିଷ୍ପତ୍ତି ପାଇଁ ସେ କୌଣସି ଚିନ୍ତା ବିନା ତାଙ୍କ ପୁଅ ସହିତ ସମୟ ବିତାଇ ପାରିଲେ । ଭଗବାନ ତୁମକୁ ଆଶୀର୍ବାଦ କରନ୍ତୁ ଭାଇ ।"

ପଢନ୍ତୁ ଏହି ଖବର: "ବାହଘର ଜରୁରୀ ନୁହେଁ, କାମକୁ ଆସନ୍ତୁ"... କର୍ମଚାରୀକୁ ଏପରି କହିଲେ ବସ୍

ଆଉ ଜଣେ ୟୁଜର ଲେଖିଛନ୍ତି, "ଗୋଟିଏ କର୍ମକ୍ଷେତ୍ର ନିଜର ସମସ୍ତ କର୍ମଚାରୀଙ୍କୁ ପରିବାର ପରି ବ୍ୟବହାର କରିବା ଉଚିତ, କାରଣ ସେମାନେ ମଧ୍ୟ କର୍ମକ୍ଷେତ୍ରର ଲାଭ ପାଇଁ ସମାନ ଭାବରେ ସଂଘର୍ଷ କରୁଛନ୍ତି ।" ଅନ୍ୟ ଜଣେ ୟୁଜର ଲେଖିଛନ୍ତି, "କାର୍ଯ୍ୟସ୍ଥଳରେ ଦୟା ଜୀବନରେ ଶକ୍ତି ପାଲଟିଯାଏ ।"