Crocodile In Bathroom / ବାଥରୁମ ଭିତରେ ୭ ଫୁଟର ହିଂସ୍ର କୁମ୍ଭୀର; କବାଟ ଖୋଲିଲା ବେଳକୁ ଡରି ଛାନିଆ

ଗାନ୍ଧୀନଗର: ରାତି ପ୍ରାୟ ୧୧ଟା । ପୂରା ପରିବାର ନିଘୋଡ଼ ନିଦରେ ଶୋଇଥିଲା । ଠିକ୍ ସେତିକିବେଳେ ଘର ବାହାରେ କୁକୁର ଜୋର ଶବ୍ଦ କରି ଭୋକିଥିଲେ । ପ୍ରଥମେ ଲାଗିଥିଲା କିଏ ଅଜଣା ଲୋକ ହୋଇଥିବ ବା କୌଣସି ପଶୁ ବାହାରିଛି । ଏହାପରେ ବି ଭୋକିବା ବନ୍ଦ ହୋଇନଥିଲା । ଏହାପରେ ଘର ମାଲିକ ବାଲାଭାଈ ଚୌହାନ ଉଠିଥିଲେ ଓ ବାହାରକୁ ଦେଖିଥିଲେ । ଏହାପରେ ଯେତେବେଳେ ସେ ବାଥରୁମ ଭିତରକୁ ପ୍ରବେଶ କରିଥିଲେ, ଠିକ୍ ସେତିକିବେଳେ ତାଙ୍କ ପାଟି ତଳୁ ମାଟି ଖସିଯାଇଥିଲା । କାରଣ ଗାଧୁଆଘର ଭିତରେ ଥିଲା ଏକ ବିଶାଳକାୟ ୭-ଫୁଟର ହିଂସ୍ର କୁମ୍ଭୀର ।

ବାଥରୁମରେ ପ୍ରାୟ ୭ ଫୁଟର ଏକ ଲମ୍ବା କୁମ୍ଭୀର ପଶିଥିଲା । ଏହି ଛାତିଥରା ଘଟଣା ଗୁଜୁରାଟ ଆଣନ୍ଦ ଜିଲ୍ଲାର ନ୍ତ୍ରମ୍ବୋୱାଡ-ଖଡିୟାରାପୁର ଅଞ୍ଚଳରେ ଘଟିଛି । ବୁଧବାର ବିଳମ୍ବିତ ରାତିରେ ହଠାତ୍ ବିଶାଳକାୟ କୁମ୍ଭୀରଟି ଘର ଭିତରକୁ ଚାଲିଆସିଥିଲା । ଏହି ଘଟଣା ପରିବାର ଲୋକେ ଜାଣିବା ପରେ ଭୟଭୀତ ହୋଇପଡ଼ିଥିଲେ । ଭୟଭୀତ ପରିବାର ତୁରନ୍ତ ବନ ବିଭାଗକୁ ଖବର ଦେଇଥିଲା । ସୂଚନା ମିଳିବା ପରେ ବନ ବିଭାଗର ଅଧିକାରୀ ନିଲେଶ ଭରୱାଡ ଓ ମନୀଷ ପ୍ରଜାପତି ଘଟଣାସ୍ଥଳରେ ପହଞ୍ଚିଥିଲେ । ବାଥରୁମ ପରି ଛୋଟ ଘରେ କୁମ୍ଭୀରକୁ ଧରିବା ସହଜ ନଥିଲା । ପ୍ରାୟ ୧ଘଣ୍ଟା ପରେ ଉଦ୍ଧାରକାରୀ ଟିମ କୁମ୍ଭୀରକୁ ସୁରକ୍ଷିତ ଭାବେ ଉଦ୍ଧାର କରିଥିଲା ।

ଉଦ୍ଧାର ପରେ କୁମ୍ଭୀରକୁ ମଲାତଜ ଗାଁର ପୋଖରୀରେ ଛଡ଼ାଯାଇଥିଲା । ବନ ବିଭାଗ ସହ କୁମ୍ଭୀର ଉଦ୍ଧାର କରିବାକୁ ଯାଇଥିବା ଦୟା ଫାଉଣ୍ଡେସନର ସଭାପତି ନିତେଶ ଚୌହାନ କହିଛନ୍ତି ଯେ ବିଭାଗ ପକ୍ଷରୁ ସୂଚନା ମିଳିବା ପରେ ସେମାନେ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ ଓ କୁମ୍ଭୀରକୁ ଉଦ୍ଧାର କରି ତାର ପ୍ରାକୃତିକ ବାସସ୍ଥାନରେ ଛାଡ଼ିଦିଆଯାଇଥିଲା । ବନ ବିଭାଗର କହିବାନୁସାରେ, ବର୍ଷା ଋତୁରେ ପୋଖରୀ ଓ ଜଳାଶୟର ଜଳସ୍ତର ଦ୍ରୁତ ଗତିରେ ବୃଦ୍ଧି ପାଇଥାଏ । ଏଥିଲାଗି କୁମ୍ଭୀର ଖାଦ୍ଯ ଅନ୍ଵେଷଣ କିମ୍ବା ଶରୀରର ତାପମାତ୍ରାରେ ସନ୍ତୁଳନ ରକ୍ଷା କରିବା ଲାଗି ବାହାରକୁ ବାହାରି ଥାଇପାରେ ।

• ପୂର୍ବରୁ ଅଛନ୍ତି ୧୦୦ରୁ ଅଧିକ କୁମ୍ଭୀର

ବନ ବିଭାଗର ଅଧିକାରୀଙ୍କ କହିବାନୁସାରେ, ଯେଉଁ ପୋଖରୀରେ କୁମ୍ଭୀରକୁ ଛଡ଼ାଯାଇଛି ସେଠାରେ ପୂର୍ବରୁ ୧୦୦ରୁ ଅଧିକ କୁମ୍ଭୀର ଅଛନ୍ତି । ପ୍ରବଳ ବର୍ଷା ଓ ଜଳବନ୍ଦୀ ଯୋଗୁଁ କୁମ୍ଭୀର କୌଣସି ଜନବସତି ଅଞ୍ଚଳକୁ ଚାଲିଯାଇପାରେ । ଏଣୁ ବର୍ଷା ଯୋଗୁଁ ଲୋକେ ବିଶେଷ କରି ରାତି ସମୟରେ ଘରୁ ବାହାରିବା ପୂର୍ବରୁ ସତର୍କ ରୁହନ୍ତୁ । କାମ ନଥିଲେ ଘରୁ ବାହାରକୁ ବାହାରନ୍ତୁ ନାହିଁ । ଯଦି କେଉଁଠି କୁମ୍ଭୀର ଦେଖାଯାଉଛି ତେବେ ତାକୁ ଧରିବାକୁ ଆଦୌ ଉଦ୍ଯମ କରନ୍ତୁ ନାହିଁ । ବରଂ କୁମ୍ଭୀରଠାରୁ ଯଥାସମ୍ଭବ ଦୂରେଇ ରହି ଏ ସମ୍ପର୍କରେ ତୁରନ୍ତ ବନ ବିଭାଗକୁ ଖବର ଦିଅନ୍ତୁ ।