ଦିନେ ସକାଳ ହେଲେ ପୂରା ଗାଁ ଚଳଚଞ୍ଚଳ ହୋଇଉଠୁଥିଲା । କାଉ ରାବ, ଗାଈର ହମା ରଡ଼ି, ପିଲାଙ୍କ ଲୁଚକାଳି ଖେଳ, ମାଆ ହାଣ୍ଡିଶାଳର ସେହି ବାସ୍ନା ଓ ବରଗଛ ତଳେ ଲୋକଙ୍କ ଚା' ଖଟିରେ ବିତୁଥିଲା ଦିନ । ସନ୍ଧ୍ୟା ହେଲେ ପ୍ରାକୃତିକ ସୌନ୍ଦର୍ଯ୍ୟ ମଧ୍ୟରେ ଗାଁର ଶୋଭା ଦ୍ଵିଗୁଣିତ ହେଉଥିଲା । ହେଲେ ଏମିତି ଏକ ଦିନ ଆସିବ କେହି କେବେ କଳ୍ପନା କରିନଥିଲେ । ଗୋଟିଏ ରାତି ପୂରା ବଦଳାଇଦେଇଥିଲା ଗାଁର ଚିତ୍ର । ରାତାରାତି ଜନଶୂନ୍ୟ ପାଲଟିଗଲା କୁଲଧରା । ଏହି କାହାଣୀ ଆଜି କି କାଲିର ନୁହଁ, ବର୍ଷ ବର୍ଷର । ତେବେ କଣ ସେହି ରାତିରେ ଘଠିଥିଲା, ତାକୁ ନେଇ ଚର୍ଚ୍ଚା ହୋଇଥିଲା ।

ଏହାରି ଭିତରେ ଅନେକ ବର୍ଷ ବିତିଛି । ହେଲେ ସେମିତି ଠିଆ ହୋଇଛି କୁଲଧରା । ଖରାଛୁଟି ଆସିଲେ ଏହି ଗାଁରେ ପର୍ଯ୍ୟଟକଙ୍କ ଭିଡ଼ ଜମୁଛି । ଯଦି ଆପଣ ବି ଏକ ନିଆରା ସ୍ଥାନକୁ ଯିବାକୁ ପସନ୍ଦ କରନ୍ତି, ତେବେ ରାଜସ୍ଥାନ ଜୈସଲମର ନିକଟରେ ଥିବା ଏହି ରହସ୍ୟମୟ ଗାଁ କୁଲଧରାକୁ ନିଜ ତାଲିକାରେ ସାମିଲ କରିପାରିବେ । ମରୁଭୂମି ଭିତରେ ସ୍ଥିତ ଏହି ପୁରାତନ ଗାଁଟି ନିଜର ରହସ୍ୟମୟ କାହାଣୀ ଓ ଭୂତକୋଠି ପରି ଠିଆ ହୋଇଥିବା କୋଠା ପାଇଁ ଜଣାଶୁଣା । ଜୈସଲମରଠାରୁ ପ୍ରାୟ ୧୮କିମି ଦୂରରେ ଅବସ୍ଥିତ ଏହି ଗାଁ ଏବେ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି । ଏହାକୁ ଭାରତର ଅନ୍ୟ ଏକ 'ଭୂତ ଗାଁ' ବୋଲି କୁହାଯାଏ ।

• କେମିତି ଥିଲା ସେତେବେଳର କୁଲଧରା ?

ତ୍ରୟୋଦଶ ଶତାବ୍ଦୀରେ ପାଲିୱାଲ ବ୍ରାହ୍ମଣମାନେ ଏହି ଗାଁ ବସାଇଥିଲେ, ଏମାନେ ମରୁଭୂମିରେ ଚାଷ କରିବାର ଖାସ୍ କଳା ପାଇଁ ଜଣାଶୁଣା । କୁହାଯାଏ ସେହି ଖାସ୍ ଧରଣର ଚାଷ ଯୋଗୁଁ ଏମାନଙ୍କୁ ବହୁ ସଫଳତା ମିଳିଥିଲା । ଏହି ଗାଁର ପରିବେଶ ଏବେ ବି ଅତି ସୁନ୍ଦର । ଆପଣ ନିରିଖେଇ ଦେଖିଲେ ଏହି ଗାଁର କୋଠାଗୁଡ଼ିକ ଉଚ୍ଚକୋଟୀର ଢାଞ୍ଚାରେ ନିର୍ମିତ । ଏହି ଗାଁରେ ପିଇବା ପାଣି ପାଇଁ କୂଅ ଓ ପୋଖରୀର ବ୍ୟବସ୍ଥା ହୋଇଛି । ୧୮୦୦ ମସିହା ସୁଦ୍ଧା ଏହି ଗାଁ ପୂରା ଖାଲି ହୋଇଯାଇଥିଲା । ମରୁଭୂମିରେ ପାଣି ଗୁରୁତ୍ଵ ଭୂମିକା ରଖେ, କିନ୍ତୁ ହଠାତ୍ ଏଠାକାର କୂଅ ଶୁଖିଯାଇଥିଲା । ଏଠାକାର ଶାସକ ସବୁ ଜିନିଷ ଉପରେ ଟ୍ୟାକ୍ସ ଲଗାଇବା ଆରମ୍ଭ କରିଥିଲେ । କିଛି ଲୋକଙ୍କ କହିବାନୁସାରେ, ସେତେବେଳେ ଭୂମିକମ୍ପ ମଧ୍ୟ ଗାଁକୁ ପ୍ରଭାବିତ କରିଥିଲା । ଏହାପରେ ଗ୍ରାମବାସୀ ରାତାରାତି ଗାଁ ଛାଡ଼ିବାକୁ ବାଧ୍ୟ ହୋଇଥିଲେ ।

• କୁଲଧରାକୁ ମିଳିଥିଲା ଅଭିଶାପ

ଏହି ଗାଁ ସହିତ ଏକ ରୋଚକମୟ କାହାଣୀ ମଧ୍ୟ ଯୋଡ଼ି ହୋଇ ରହିଛି । ଆଖପାଖ ଲୋକଙ୍କ କହିବାନୁସାରେ, ସଲିମ ସିଂହ ନାମକ ଜଣେ ଶକ୍ତିଶାଳୀ ମନ୍ତ୍ରୀ ଗାଁର ଜଣେ ଯୁବତୀର ସୌନ୍ଦର୍ଯ୍ୟରେ ବିମୋହିତ ହୋଇଥିଲା । ସେ ଉକ୍ତ ଯୁବତୀଙ୍କୁ ବିବାହ କରିବାକୁ ଚାହୁଁଥିଲା, କିନ୍ତୁ ଗାଁଲୋକେ ସିଧା ମନା କରିଦେଇଥିଲେ । ଏହାପରେ ଗାଁ ଲୋକ ହାର ମାନିବା ଅପେକ୍ଷା ଏହି ଗାଁ ଛାଡ଼ି ସବୁଦିନ ପାଇଁ ଚାଲିଯିବାକୁ ନିଷ୍ପତ୍ତି ନେଇଥିଲେ । ଏମିତି ଏକ ରାତି ଆସିଥିଲା, ଯେତେବେଳେ କେବଳ କୁଲଧରା ଗାଁ ନୁହେଁ, ଏହାର ଆଖପାଖ ଗାଁ ମଧ୍ୟ ଖାଲି ହୋଇଯାଇଥିଲା । ଲୋକେ ରାତାରାତି ଗାୟବ ହୋଇଯାଇଥିଲେ । ଗାଁ ଛାଡ଼ିବା ପୂର୍ବରୁ ଗ୍ରାମବାସୀ ଅଭିଶାପ ଦେଇଥିଲେ ଯେ, ଏହି ଗାଁରେ କେହି ବି ରହିପାରିବ ନାହିଁ । ଆଶ୍ଚର୍ଯ୍ୟକର କଥା ହେଉଛି, ଏବେ ବି ଏହି ଗାଁ ନିର୍ଜନ ଅବସ୍ଥାରେ ଅଛି ।

• କଣ ସତରେ କୁଲଧରା 'ଭୂତ ଗାଁ' ?

କୁଲଧରା ଗାଁକୁ ନେଇ ଅନେକ କାହାଣୀ ଅଛି । ଲୋକେ କୁହନ୍ତି ରାତିରେ ଏଠାରୁ ଅଜବ ଶବ୍ଦ ଶୁଣାଯାଏ । ଭଙ୍ଗା କୋଠା ଭିତରେ ଛାଇ ବୁଲେ । ଯେମିତି ଲାଗେ ଆପଣଙ୍କୁ କେହି ଦେଖୁଛି । ମାତ୍ର ସ୍ଥାନୀୟ ଲୋକେ ଏହି ଭୂତ କାହାଣୀ ଉପରେ ସମ୍ପୂର୍ଣ୍ଣ ବିଶ୍ଵାସ କରନ୍ତି ନାହିଁ । ସେମାନଙ୍କ ମତରେ କୁଲଧରାର ସ୍ଵତନ୍ତ୍ରତାର ଏହା ଏକ ଅଂଶ ମାତ୍ର ।

• କୁଲଧରାରେ କଣ କରନ୍ତି ପର୍ଯ୍ୟଟକ ?

ଏହାକୁ ଭୂତ ଗାଁ ଆଖ୍ୟା ମିଳିଥିଲେ ସୁଦ୍ଧା ଅନେକ ପର୍ଯ୍ୟଟକ ପ୍ରତିବର୍ଷ ଏଠାକୁ ଭ୍ରମଣ ଉଦ୍ଦେଶ୍ୟରେ ଯାଇଥାନ୍ତି । ଏଠାରେ ଦିନ ସାରା ଆପଣ ବୁଲିପାରିବେ । ଘର ଭିତରେ ପୁରାତନ ଜନବସତିର ବାସ୍ତବ ଚିତ୍ରକୁ ଅତି ନିକଟରୁ ଦେଖିପାରିବେ । ଗାଁର କାନ୍ଥରେ ସୁନ୍ଦର ସୁନ୍ଦର ଚିତ୍ର ଦେଖିପାରିବେ । ସୂର୍ଯ୍ୟାସ୍ତ ହେବା ପରେ ଏହି ଗାଁର ଶୋଭା ଯେପରି ବହୁଗୁଣିତ ହୋଇଯାଏ, ଫଳରେ ଏହି ସ୍ଥାନ ଫଟୋ ଉଠାଇବା ଲାଗି ଏକ ସୁନ୍ଦର ସ୍ଥାନ ପାଲଟେ । ରାଜସ୍ଥାନ ସରକାର ମଧ୍ୟ ଏହି ଗାଁର ବିକାଶ ଲାଗି କାମ କରୁଛନ୍ତି । ଆଗକୁ ଏଠାରେ ଆଧୁନିକ କାଫେ, ରେସ୍ତୋରାଁ ଓ ପର୍ଯ୍ୟଟକଙ୍କ ରାତ୍ରି ଯାପନ ଲାଗି ବିଭିନ୍ନ ପ୍ରକାର ବ୍ୟବସ୍ଥା କରାଯାଉଛି ।



ପଢନ୍ତୁ ଏହି ଖବର: ଗାଁରେ ନିୟମ ହେବ ତ ଏମିତି; ₹୫୦୦ ଗଣ, ନହେଲେ ଘଣ୍ଟାଏ ସଫା କର

ଯଦି ଆପଣ ଏହି ନିଆରା ଗାଁକୁ ଯିବାକୁ ଚାହୁଁଛନ୍ତି, ଅତି ସହଜରେ ଯାଇପାରିବେ । ଜୈସଲମରରୁ ଆପଣ ଅଟୋ ଧରି କୁଲଧରା ଯାଇପାରିବେ ନଚେତ ସ୍ଥାନୀୟ ପରିବହନ ସେବାର ବ୍ୟବହାର କରିପାରିବେ । ଅନେକ ପର୍ଯ୍ୟଟକ ଏହାକୁ ଡେଜର୍ଟ ସଫାରୀ ସହିତ ପ୍ଲାନ୍ କରନ୍ତି । କୁଲଧରା କେବଳ ଭୂତପ୍ରେତଙ୍କ ରହସ୍ୟମୟ ସ୍ଥାନ ନୁହେଁ, ଏହା ଏକ ଶାନ୍ତ, ସୁନ୍ଦର ଓ ଆକର୍ଷଣୀୟ ସ୍ଥାନ । କୁଲଧରା ନିକଟରେ ଅନ୍ୟ ପର୍ଯ୍ୟଟନସ୍ଥଳୀଗୁଡ଼ିକ ହେଉଛି ସମ୍ ସ୍ୟାଣ୍ଡ ଡ୍ୟୁନ୍ସ, ଖୁରି ଗାଁ, ଜୈସଲମର କିଲା, ଗଡିସର ଝରଣା ଓ ବଡ଼ା ବାଗ୍ ।