First Flight / ଗରିବ ମୁହଁରେ ଫୁଟିଲା ହସ; ପ୍ରଥମ ବିମାନ ଯାତ୍ରା କରାଇଲେ ଏହି କଣ୍ଟେଣ୍ଟ କ୍ରିଏଟର

ନୂଆଦିଲ୍ଲୀ: ଜୀବନରେ ଥରେ ବିମାନରେ ବସିବା, ଆକାଶରେ ଉଡ଼ିବା କାହାର ବା ସ୍ଵପ୍ନ ନଥାଏ । କିଏ ସଂଘର୍ଷ କରି ଏହି ସ୍ଵପ୍ନକୁ ପୂରଣ କରେ ତ ଆଉ କିଏ ଅଭାବ ଯୋଗୁଁ ସମୟସ୍ରୋତରେ ସ୍ଵପ୍ନକୁ ଭସାଇଦିଏ । ଆଜିକାଲି ବିମାନ ଯାତ୍ରା ସାଧାରଣ କଥା ହେଲାଣି । ମାତ୍ର ଏବେ ବି ଏମିତି ପରିବାର ଅଛି ଯାହା ପାଇଁ ଏହା ସେମିତି ସ୍ଵପ୍ନ ହୋଇ ରହିଛି । ଏବେ ଇଣ୍ଟରନେଟରେ କିଛି ଫଟୋ, ଭିଡିଓ ଭାଇରାଲ ହେଉଛି । ଯେଉଁଠି ଦେଖିବାକୁ ମିଳିଛି ଅଭାବ ଅନଟନରେ ବଢିଥିବା କିଛି ଗରିବ ଅବହେଳିତ ପିଲା ବିମାନରେ ବସିଛନ୍ତି ଓ ଆକାଶରେ ଉଡ଼ିଛନ୍ତି । ଏହା କେବଳ ସମ୍ଭବ ହୋଇପାରିଛି ଜଣେ କଣ୍ଟେଣ୍ଟ କ୍ରିଏଟରଙ୍କ ପାଇଁ ।

ୟୁଟ୍ୟୁବର ତଥା ଜଣାଶୁଣା କଣ୍ଟେଣ୍ଟ କ୍ରିଏଟର ସୌରଭ ଯୋଶୀ ଏହି ସ୍ଵପ୍ନକୁ ସତ କରିଛନ୍ତି । ସେ ପ୍ରଥମ ଥର ଲାଗି କିଛି କୁନି ସ୍କୁଲ ପିଲାଙ୍କୁ ବିମାନ ଯାତ୍ରା ଯୋଗାଇଛନ୍ତି । ସେମାନଙ୍କ ଲାଗି ପୂରା ଇଣ୍ଡିଗୋ ଫ୍ଲାଇଟ୍ ବୁକ୍ କରିଥିବାବେଳେ ସେମାନଙ୍କୁ ଏପରି ଅନୁଭବ ପ୍ରଦାନ କରିଛନ୍ତି, ଯାହା କୁନି କୁନି ପିଲାଙ୍କ ହସରୁ ବାରି ହୋଇପଡୁଛି । ସୌରଭ ଯୋଶୀ ନିଜର ଏକ ବ୍ଲଗ୍‌ରେ ଏହାର ପ୍ରଥମ ଝଲକ ଦେଖାଇଛନ୍ତି । ଏହି ମହତ କାର୍ଯ୍ୟ ପାଇଁ ତାଙ୍କୁ ସୋସିଆଲ ମିଡିଆରେ ବେଶ ପ୍ରଶଂସା କରାଯାଉଛି ।

• ଅବହେଳିତ ଶିଶୁଙ୍କ ପ୍ରଥମ ଉଡ଼ାଣ

ଏୟାରପୋର୍ଟରେ ପହଞ୍ଚିବା ପରେ କୁନି ପିଲାଙ୍କୁ ବୋର୍ଡିଂ ପାସ୍ ଦିଆଯାଇଥିଲା ଓ ସେମାନଙ୍କୁ ସ୍ଵତନ୍ତ୍ର ଢଙ୍ଗରେ ସ୍ଵାଗତ କରାଯାଇଥିଲା । ଯେତେବେଳେ ପିଲାମାନେ ବିମାନରେ ଚଢିଥିଲେ, ତାଙ୍କ ମୁହଁରେ ଥିବା ଖୁସି ସମସ୍ତଙ୍କୁ ଆକର୍ଷିତ କରିଥିଲା । ସୌରଭ ଯୋଶୀ ଓ ତାଙ୍କ ପତ୍ନୀ ଅବନ୍ତିକା ଏହି ଯାତ୍ରାରେ ପିଲାମାନଙ୍କ ସହିତ ରହିଥିଲେ । ଟେକ୍‌ଅଫ୍ ଓ ଲ୍ୟାଣ୍ଡିଂ ସମୟରେ ପିଲାମାନେ ଭୟଭୀତ ହୋଇଯାଇଥିଲେ, ମାତ୍ର ସୌରବ ଓ ପତ୍ନୀ ଅବନ୍ତିକା ସେମାନଙ୍କ ସହିତ କଥାବାର୍ତ୍ତା ହୋଇଥିଲେ ।

ପଢନ୍ତୁ ଏହି ଖବର:  IT ଚାକିରି ଛାଡ଼ି କରୁଛନ୍ତି କ୍ଷୀର ବ୍ୟବସାୟ; ରୋଜଗାର ଶୁଣି ଉଡ଼ିବ ହୋସ୍

• ନୋଏଡାରେ ବିତାଇଲେ ଖାସ୍ ସମୟ

ଫ୍ଲାଇଟ୍ ନୋଏଡା ଅନ୍ତର୍ଜାତୀୟ ବିମାନବନ୍ଦରରେ ପହଞ୍ଚିବା ପରେ ସମସ୍ତ ପିଲା ଏକ ବସ୍ ଯୋଗେ ଏକ ବିଳାସପୂର୍ଣ୍ଣ ରେସ୍ତୋରାଁକୁ ଯାଇଥିଲେ । ସେଠାରେ ସେମାନେ ସ୍ଵାଦିଷ୍ଟ ଖାଦ୍ୟ ଖାଇଥିଲେ, ଗେମ୍ ଖେଳିଥିଲେ । ପିଜ୍ଜା ଖାଇଥିଲେ ଓ ପୂରା ଦିନ ମଉଜ ମସ୍ତି କରିଥିଲେ । ପୁରା ଦିନ କୁନି କୁନି ପିଲାଙ୍କ ସହିତ ରହିଥିଲେ ଉଭୟ । ଏହି ଭିଡିଓ ସାମ୍ନାକୁ ଆସିବା ପରେ ସୋସିଆଲ ମିଡିଆରେ ୟୁଜର ଅବନ୍ତିକା ଓ ସୌରଭଙ୍କୁ ବେଶ ପ୍ରଶଂସା କରିଛନ୍ତି । ଏହି ଦୃଶ୍ୟ ସକାରାତ୍ମକ ଭାବନା ସୃଷ୍ଟି କରୁଛି ବୋଲି ଅନେତ ମତ ପ୍ରକାଶ କରିଛନ୍ତି ।