Taliban New Rule / ଚୁପ୍ ରହିବା କୁଆଁରୀଙ୍କ ପାଇଁ କାଳ; ତାଲିବାନ ସରକାରର ନୂଆ ନିୟମକୁ ନେଇ ଚର୍ଚ୍ଚା

ଏଠି ଝିଅର ଇଚ୍ଛାକୁ ଦିଆଯାଇଛି ଜଳାଞ୍ଜଳି । ମହିଳାର ମନକୁ ହେଉଛି କୁଠାରଘାତ । ମହିଳା ବିରୋଧୀ ନିୟମ ପାଇଁ ପୁଣି ଚର୍ଚ୍ଚାରେ ତାଲିବାନ ସରକାର । ଏବେ ଆଫଗାନିସ୍ତାନରେ ତାଲିବାନୀ ଶାସନ ଚାଲିଥିବାବେଳେ ତାଲିବାନ ସରକାର ନୂଆ 'ପରିବାର ଆଇନ' ଲାଗୁ କରିଛି, ଯାହାକୁ ନେଇ ବିବାଦ ଉପୁଜିଛି । ନୂଆ ଆଇନରେ ବିବାହ, ଛାଡ଼ପତ୍ର ଓ ବାଲ୍ୟ ବିବାହ ସହ ଜଡ଼଼ିତ ନିୟମ ସାମିଲ । ଏହି ନୂଆ ନିୟମ ଲାଗୁ ହେବାପରେ ସାରା ବିଶ୍ଵର ମାନବ ଅଧିକାର କର୍ମକର୍ତ୍ତାମାନେ ଚିନ୍ତା ପ୍ରକଟ କରିଛନ୍ତି ।

ଆଫଗାନିସ୍ତାନର ଏକ ମିଡିଆ ଅନୁସାରେ, ନୂଆ ଆଇନର ନାମ ରଖାଯାଇଛି 'ସ୍ଵାମୀ-ସ୍ତ୍ରୀଙ୍କ ଅଲଗା ହେବା ନୀତି' । ଏହି ୩୧ ଧାରାର ପୂରା ଡ୍ରାଫ୍ଟରେ ତାଲିବାନର ସୁପ୍ରିମ ଲିଡର୍ ହିବତୁଲ୍ଲା ଅଙ୍ଖୁଦଜାଦା ମଞ୍ଜୁରୀ ଦେଇଛନ୍ତି । ଏଥିରେ ବାଲ୍ୟ ବିବାହ, ନିଖୋଜ ସ୍ଵାମୀ, ଧର୍ମ ପରିବର୍ତ୍ତନ ଓ ଜୋରଜବରଦସ୍ତ ଅଲଗା ହେବା ପରି ମାମଲା ସାମିଲ । କିନ୍ତୁ ସବୁଠୁ ଚର୍ଚ୍ଚାକୁ ଆସିଛି ପରିପକ୍ଵ ଯୁବତୀ (Mature Girl)ଙ୍କ ବିବାହ । ଯଦି ବିବାହକୁ ନେଇ ଝିଅଟି ଚୁପ୍ ରହୁଛି, ତେବେ ଏହାକୁ 'ହଁ' ବୋଲି ଧରାଯିବ ବୋଲି ନିୟମରେ ରହିଛି ।

• ଚୁପ୍ ରହିବା କୁଆଁରୀଙ୍କ ପାଇଁ ବିପଦ

ଏହି ନିୟମରେ କୁହାଯାଇଛି ଯେ ଯଦି ଜଣେ ପରିପକ୍ଵ ଯୁବତୀ ବିବାହ ପ୍ରସଙ୍ଗରେ ଚୁପ୍ ରୁହେ, ତେବେ ତାହାକୁ ବିବାହ ପାଇଁ ରାଜି ବୋଲି ଧରାଯିବ । ଏହି ନିୟମରେ ଏହା ମଧ୍ୟ କୁହାଯାଇଛି ଯେ ଯଦି କୌଣସି ପୁଅ ବା ବିବାହିତ ମହିଳା ଚୁପ୍ ରହୁଛନ୍ତି, ତେବେ ଏହାକୁ ବିବାହ ସହିତ ସହମତ ବୋଲି ଧରାଯିବ ନାହିଁ । ଏ ନେଇ ଆଫଗାନିସ୍ତାନରେ ମିଳିତ ଜାତିସଂଘ ସହାୟତା ମିଶନ (UNAMA) ଏକ ବିବୃତ୍ତିରେ କହିଛି ଯେ ଆଇନରେ ବର୍ତ୍ତମାନ ଯୌବନରେ ପହଞ୍ଚିଥିବା ଯୁବତୀ ଏବଂ ବିବାହିତ ଝିଅମାନଙ୍କ ପାଇଁ ଛାଡପତ୍ର ବିଷୟରେ ମଧ୍ୟ ଉଲ୍ଲେଖ ଅଛି । ଏହା ସୂଚିତ କରେ ଯେ ତାଲିବାନ ବାଲ୍ୟ ବିବାହକୁ ଆଇନଗତ କରିଛି । UNAMA କହିଛି ଯେ ଏହି ଆଇନ ମହିଳାଙ୍କ ସ୍ଵଇଚ୍ଛାକୁ ଦୁର୍ବଳ କରେ ଏବଂ ପିଲାମାନଙ୍କ ସ୍ୱାର୍ଥକୁ ସୁରକ୍ଷା ଦେବାରେ ବିଫଳ ହୁଏ ।

• ଯୌତୁକ ନଦେଲେ ବିବାହ ବେଆଇନ

ଏହି ତାଲିବାନୀ ଆଦେଶରେ ଏହା ମଧ୍ୟ କୁହାଯାଇଛି ଯେ ଯଦି କୌଣସି ବାପା ନିଜ ନାବାଳିକା ଝିଅ ବା ପୁଅର ବିବାହକୁ ଯୌତୁକ ବିନା, କମ ଯୌତୁକ ବା ଭୁଲ ଢଙ୍ଗରେ କରିଛି ତେବେ ଏହି ବିବାହକୁ ବେଆଇନ ବୋଲି ବିବେଚନା କରାଯିବ । ଏହା ମଧ୍ୟ କୁହାଯାଇଛି ଯେ ଯଦି କୌଣସି ଝିଅ ବିବାହ ପରେ ଭଲ ବ୍ୟବହାର କରୁନଥିବା ସ୍ଵାମୀ ସହ ସମ୍ପର୍କ ଶେଷ କରିବାକୁ ଚାହୁଁଛି, ତେବେ ଉକ୍ତ ଯୁବତୀ କୋର୍ଟ ଯାଇ ଆବେଦନ କରିପାରିବେ ।

• ସ୍ଵାମୀ ମନା କଲେ ମିଳିବନି ଛାଡ଼ପତ୍ର

ଏହି ନିୟମରେ ଆଉ ଏକ ମହିଳା ବିରୋଧୀ ଆଇନ ହେଉଛି, ଯଦି କୌଣସି ମହିଳା ନିଜ ସ୍ଵାମୀଙ୍କଠାରୁ ଛାଡ଼ପତ୍ର ନେବାକୁ ଚାହୁଁଛନ୍ତି, କିନ୍ତୁ ସ୍ଵାମୀ ଛାଡ଼ପତ୍ର ଦେଉନାହାନ୍ତି ବା ଦେବାକୁ ରାଜି ନାହାନ୍ତି ତେବେ ମହିଳାଙ୍କୁ ସ୍ଵାମୀଙ୍କ ଇଚ୍ଛାକୁ ସମ୍ମାନ ଦେବାକୁ ପଡ଼ିବ । ଏଠାରେ ସ୍ଵାମୀଙ୍କ କଥାକୁ ଗୁରୁତ୍ଵ ଦିଆଯିବ । ଏହାପରେ ମଧ୍ୟ ଯଦି ସ୍ତ୍ରୀ ଛାଡ଼ପତ୍ର ଚାହୁଁଛନ୍ତି, ତେବେ ତାଙ୍କୁ ଠୋସ୍ ପ୍ରମାଣ ସହିତ କୋର୍ଟ ଯିବାକୁ ପଡ଼ିବ, ନଚେତ୍ ଛାଡ଼ପତ୍ର ମିଳିବା କଷ୍ଟସାଧ୍ୟ ।

ପଢନ୍ତୁ ଏହି ଖବର: ତାଲିବାନୀ ମନ୍ତ୍ରୀଙ୍କ ପ୍ରେସ୍‌ମିଟ୍‌, ମହିଳା ସାମ୍ବାଦିକଙ୍କୁ ମିଳିଲାନି ଅନୁମତି

• ଆଫଗାନିସ୍ତାନରେ କିପରି ମହିଳାଙ୍କ ସ୍ଥିତି ?

୨୦୨୧ ଅଗଷ୍ଟ ମାସରେ ଯେତେବେଳେ ତାଲିବାନ ଆଫଗାନିସ୍ତାନକୁ କବଜା କରିଥିଲା, ସେତେବେଳ ପରଠାରୁ ମହିଳା ଓ ଯୁବତୀଙ୍କୁ ନେଇ ଭେଦଭାବ ହେଉଥିବା ଖବର ଲଗାତାର ଆସୁଛି । ମହିଳାମାନେ କେଉଁ ପ୍ରକାରର ବସ୍ତ୍ର ପିନ୍ଧିବେ, ତାହା ସେମାନଙ୍କ ଇଚ୍ଛା ଉପରେ ନୁହେଁ, ବରଂ ଆଇନ ଉପରେ ନିର୍ଭର କରେ । ଛୋଟ ଝିଅଙ୍କ ସ୍କୁଲ, କଲେଜ ଓ ଚାକିରି କରିବା ଅଧିକାରକୁ ମଧ୍ୟ ବ୍ୟାନ୍ କରାଯାଇଥିଲା । ଏପରିକି ଯୁବତୀଙ୍କୁ ଜିମ୍‌, ବ୍ୟୁଟି ସେଲୁନ ଏପରିକି ସାର୍ବଜନୀନ ପାର୍କକୁ ଯିବା ପରି ସମସ୍ତ ପ୍ରକାର ମନୋରଞ୍ଜନ କାର୍ଯ୍ୟକଳାପକୁ ବ୍ୟାନ୍ କରାଯାଇଥିଲା ।