Luxury Jail / ବିଶ୍ଵର ସବୁଠୁ ବିଳାସପୂର୍ଣ୍ଣ ଜେଲ୍; କଏଦୀଙ୍କୁ ଅତିଥି ପରି ସୁବିଧା, ବିଶ୍ଵାସ କରିବା ମୁସ୍କିଲ

ଏଠି ବଦିଳିଯାଏ ଜେଲର ପରିଭାଷା । ବନ୍ଦ, ଅନ୍ଧକାରମୟ କୋଠରୀ ନୁହେଁ ସଫାସୁତୁରା ପରିବେଶ ସାଙ୍ଗକୁ ଚକଚକ୍ କରୁଥିବା ମାର୍ବଲ ଚଟାଣ । ପଞ୍ଚତାରକା ହୋଟେଲର ଭ୍ରମ ସୃଷ୍ଟି କରେ । ଦୁନିଆର କିଛି ଦେଶରେ ଥିବା ଜେଲ୍ ସମ୍ପୂର୍ଣ୍ଣ ଭାବେ ଜେଲର ଦୃଶ୍ୟପଟକୁ ହିଁ ପରିବର୍ତ୍ତନ କରିଥାନ୍ତି । ତେବେ ଆପଣ କଣ ଜାଣନ୍ତି ବିଶ୍ଵର ସବୁଠୁ ବିଳାସପୂର୍ଣ୍ଣ ଜେଲ୍ ସମ୍ପର୍କରେ ? ଆମେ ଆଜି ଏହି ଜେଲର ପରିବେଶ, କଏଦୀଙ୍କ ଜୀବନଶୈଳୀ, ଖାଦ୍ୟପେୟ ସମ୍ପର୍କରେ କହିବୁ ଯାହାକୁ ସାଧାରଣ ଲୋକଟିଏ ବିଶ୍ଵାସ କରିବା ମଧ୍ୟ କଷ୍ଟକର ହୋଇପଡ଼ିବ ।

• କେଉଁଠି ଅଛି ଲଗଜରୀ ଜେଲ୍ ?

ନରୱେର ହେଲ୍ଡନ ଜେଲ ଦୁନିଆର ସବୁଠୁ ଆଧୁନିକ ଜେଲ୍ ବୋଲି କୁହାଯାଏ । ଏଠାରେ କଏଦୀଙ୍କ ଲାଗି ସଙ୍ଗୀତ ଷ୍ଟୁଡିଓ, ଲାଇବ୍ରେରୀ, ଖେଳକୁଦ ପାଇଁ ବିଶେଷ ବ୍ୟବସ୍ଥା ରହିଛି । ପ୍ରଶାସନର କହିବାନୁସାରେ, ଏପରି ସମ୍ମାନଜକ ସୁବିଧା ପ୍ରଦାନ କରିବା ଦ୍ଵାରା କଏଦୀଙ୍କ ବ୍ୟବହାରରେ ବିଶେଷ ପରିବର୍ତ୍ତନ ଆସିଥାଏ । ସେହିପରି ସ୍ଵିଡେନର ସୋଲେଣ୍ଟୁନା ଜେଲ ମଧ୍ୟ ଏହି ବ୍ୟବସ୍ଥାକୁ ଆପଣାଇଛି । ଏଠାରେ କଏଦୀଙ୍କୁ ଟିଭି, ରୋଷେଇ କରିବାକୁ ଏବଂ ମାନସିକ ସ୍ଵାସ୍ଥ୍ୟ ସୁଧାରିବାକୁ ସ୍ଵତନ୍ତ୍ର ତାଲିମ ପ୍ରଦାନ କରାଯାଏ ।

• କଏଦୀଙ୍କୁ ମିଳେ ପର୍ସନାଲ ରୁମ୍

ଅଷ୍ଟ୍ରିଆର ଜଷ୍ଟିଜସେଣ୍ଟର ଲିୟୋବେନ ଜେଲ ନିଜର ସ୍ଵତନ୍ତ୍ର ସୁବିଧା ଲାଗି ବେଶ ଜଣାଶୁଣା । ଏଠାରେ ପ୍ରତ୍ୟେକ କଏଦୀଙ୍କୁ ଅଲଗା ଅଲଗା କୋଠରୀରେ ରଖାଯାଏ, ଯେଉଁଠି ଥାଏ ବଡ଼ ବଡ଼ ଝରକା, ଅଲଗା ଗାଧୁଆ ଘର ଓ ଆରାମ ପାଇଁ ଫର୍ଣ୍ଣିଚର ।

ପଢନ୍ତୁ ଏହି ଖବର: ହୃଦୟ ଜିତିଲା ନିରୀହତା; ଫ୍ଲାଇଟରେ ଯାତ୍ରୀଙ୍କ କଥା ବୁଝିଲେ କୁନି ଏୟାରହୋଷ୍ଟେସ

• ଏଠି ଛୋଟପିଲାଙ୍କ ସହ ରୁହନ୍ତି କଏଦୀ

ସ୍ପେନର ଅରାଙ୍ଖୁଏଜ୍ ଜେଲରେ କଏଦୀମାନେ ଛୋଟ ଛୋଟ ପିଲାଙ୍କ ସହ ରୁହନ୍ତି । ଏହାର ଉଦ୍ଦେଶ୍ୟ ହେଉଛି ପିତାମାତା ଓ ପିଲାଙ୍କ ମଧ୍ୟରେ ଭାବନାତ୍ମକ ସମ୍ପର୍କକୁ ଭାଙ୍ଗିବାକୁ ନଦେବା । ଏହି ଜେଲ ଦର୍ଶାଏ ଯେ ଦଣ୍ଡ ଦେବାର ପ୍ରକୃତ ଅର୍ଥ କେବଳ ବନ୍ଦୀ କରି ରଖିବା ନୁହେଁ, ବରଂ ଜଣେ ମଣିଷର ମାନସିକ ବିଚାରଧାରାରେ ପରିବର୍ତ୍ତନ ଆଣିବା । ଏହି ଜେଲଗୁଡ଼ିକ ବାହାରୁ ହୋଟେଲ ପରି ଦିଶୁଥିଲେ ସୁଦ୍ଧା କଏଦୀଙ୍କୁ ସ୍ଵାଧୀନତା ପ୍ରଦାନ କରାଯାଏ ନାହିଁ । ସେମାନଙ୍କୁ ଜେଲ୍ ଭିତରେ ଅନେକ ନିୟମ ପାଳନ କରିବାକୁ ପଡ଼ିଥାଏ, ଯାହାଦ୍ଵାରା ସେମାନଙ୍କ ଦଣ୍ଡର ସମୟ ସରିବା ବେଳକୁ ସେମାନେ ଜଣେ ଉତ୍ତମ ମଣିଷ ହୋଇ ବାହାରିବେ । ମାତ୍ର ବାହାରୁ ଏମିତି ହୋଟେଲ ପରି ଜେଲକୁ ଦେଖିଲେ ସାଧାରଣ ଲୋକଟିଏ ଆଶ୍ଚର୍ଯ୍ୟ ହୋଇପଡ଼େ ।