Bay of Bengal Cyclone / ଆଜି ବଙ୍ଗୋପସାଗରରେ ସୃଷ୍ଟି ହେବ ବାତ୍ୟା ! ୩ ତାରିଖରେ କରିବ ଲ୍ୟାଣ୍ଡଫଲ୍‌

ନଭେମ୍ବର ପହିଲାରୁ ଡ଼ରାଇଲାଣି ବାତ୍ୟା । ଅର୍ଣ୍ଣବ ଛାଡ଼ିଥିବା ଦାଗ ଏବେ ବି ସତେଜ ରହିଥିବା ବେଳେ ପୁଣି ଏକ ବାତ୍ୟା ଭୟ ଲୋକଙ୍କ ମନରେ ଛନକା ଭରିଛି । ବଙ୍ଗୋପସାଗରରେ ସୃଷ୍ଟ ଲଘୁଚାପ ଅବପାତରେ ପରିଣତ ହୋଇଛି । ଆଜି ଅପରାହ୍ନ ସୁଦ୍ଧା ଗଭୀର ଅବପାତ ଏବଂ ମଧ୍ୟରାତ୍ରି ରାତି ଏହା ବାତ୍ୟାର ରୂପ ନେଇପାରେ ବୋଲି ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି ।

ନଭେମ୍ବର ୨ ତାରିଖ ସନ୍ଧ୍ୟା ସୁଦ୍ଧା ଏହା ଆନ୍ଧ୍ରପ୍ରଦେଶ ଉପକୂଳ ପହଞ୍ଚିବା ଆକଳନ କରାଯାଉଛି । ବର୍ତ୍ତମାନ ଏହା ଚେନ୍ନାଇଠାରୁ ପ୍ରାୟ ୮୩୦ କିଲୋମିଟର ପୂର୍ବ-ଦକ୍ଷିଣ ପୂର୍ବରେ, ବିଶାଖାପାଟଣାଠାରୁ ୮୮୦ କିଲୋମିଟର ଦକ୍ଷିଣ-ଦକ୍ଷିଣ ପୂର୍ବରେ, ମଚ୍ଛଲିପଟନମଠାରୁ ୯୦୦ କିଲୋମିଟର ଦକ୍ଷିଣ-ପୂର୍ବରେ ଏବଂ ଓଙ୍ଗୋଲଠାରୁ ୯୫୦ କିଲୋମିଟର ପୂର୍ବ-ଦକ୍ଷିଣ ପୂର୍ବରେ ରହିଛି ।

୨୨କିମି ବେଗରେ ଆଗକୁ ବଢୁଛି ଅବପାତ ବିଶାଖାପାଟନମ ଠାରୁ #୮୮୦କିମି ଏବଂ ଚେନ୍ନାଇ ଠାରୁ #୮୩୦କିମି ଦୂରରେ କେନ୍ଦ୍ରୀଭୂତ ଆଜି ବାତ୍ୟା ଆସନ୍ତା କାଲି ଭୀଷଣ ବାତ୍ୟାର ରୂପ ନେବା ସମ୍ଭାବନା https://t.co/iC9OnMqjGD

— usd (@usd0705) November 1, 2026

ବାତ୍ୟାଟି ଦକ୍ଷିଣ ଆନ୍ଧ୍ରପ୍ରଦେଶର ନେଲୋର ଏବଂ ନରାସପୁର ମଧ୍ୟରେ ସ୍ଥଳଭାଗ ଛୁଇଁପାରେ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ । ବାତ୍ୟା ଓଡ଼ିଶା ଆଡ଼କୁ ମୁହାଁଉନଥିଲେ ମଧ୍ୟ ଏହାର ପ୍ରଭାବରେ ରାଜ୍ୟରେ ବର୍ଷା ଓ ପବନର ଆଶଙ୍କା ରହିଛି । ବିଶେଷ ଭାବରେ ଦକ୍ଷିଣ ଓଡ଼ିଶାରେ ପ୍ରବଳ ବର୍ଷା ହୋଇପାରେ ।

ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ଆସନ୍ତା ୨୪ ଘଣ୍ଟା ପାଇଁ ଗଞ୍ଜାମ, ଗଜପତି, ରାୟଗଡ଼ା, କୋରାପୁଟ, ମାଲକାନଗିରି, ନୟାଗଡ଼, ଖୋର୍ଦ୍ଧା, ପୁରୀ, କଟକ, ଜଗତସିଂହପୁର, କେନ୍ଦ୍ରାପଡ଼ା, ଯାଜପୁର, ଭଦ୍ରକ, ବାଲେଶ୍ୱର, କେନ୍ଦୁଝର ଓ ମୟୂରଭଞ୍ଜରେ ଜିଲ୍ଲାରେ ପ୍ରବଳ ବର୍ଷା ସହ ପବନର ବେଗ ଘଣ୍ଟାପ୍ରତି ୩୦ ରୁ ୪୦ କିମି ରହିବ । ଏଥିପାଇଁ ଏହି ସବୁ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି ।

ତେବେ ଏହି ସମ୍ଭାବ୍ୟ ବାତ୍ୟା ସ୍ଥଳଭାଗ ଛୁଇଁଲା ବେଳେ ପବନର ବେଗ ୮୦ ରୁ ୯୦ ରହିବା ଅନୁମାନ କରାଯାଉଛି । ତେବେ ଝଟକା ପବନ ୧୦୦ କିଲୋମିଟର ରହିପାରେ । ଓଡ଼ିଶାରେ ପବନର ବେଗ ୫୦ ରୁ ୬୦ ରହିବା ବେଳେ ଝଟକା ପବନ ୭୦ କିଲୋମିଟର ଯାଏଁ ଯାଇପାରେ । ଏହି ସମୟରେ ସମୁଦ୍ର ଅଶାନ୍ତ ରହିବ । ଏଥିଯୋଗୁଁ ୨ ରୁ ୪ ତାରିଖ ଯାଏଁ ମତ୍ସଜୀବୀମାନଙ୍କୁ ସମୁଦ୍ର ଭିତରକୁ ନ ଯିବାକୁ ବାରଣ କରାଯାଇଛି ।