ଗଞ୍ଜାମରେ ଫସିଥିବା ଲୋକଙ୍କୁ ଏୟାରଲିଫ୍ଟ ପାଇଁ ହେଉଛି ବ୍ୟବସ୍ଥା… କୋଷ୍ଟଗାର୍ଡ ସହ କଥା ହୋଇ ହେଲିକପ୍ଟରରେ ଲୋକଙ୍କୁ କରାଯିବ ସ୍ଥାନାନ୍ତରିତ । ୨ ହଜାର ଲୋକ ଜଳ ବନ୍ଦୀରେ ପ୍ରାୟ ୧୨୦ ଲୋକ ହେବେ ଏୟାରଲିଫ୍ଟ । SRCଙ୍କ କାର୍ଯ୍ୟାଳୟରେ ସମୀକ୍ଷା ପରେ ମୁଖ୍ୟ ଶାସନ ସଚିବଙ୍କ ସୂଚନା... ବ୍ରହ୍ମପୁରରେ ମନିଟର କରୁଛନ୍ତି RDC ।

ଗଞ୍ଜାମ ଜିଲ୍ଲାରେ ପ୍ରବଳ ବର୍ଷା ଯୋଗୁଁ ବନ୍ୟା ସ୍ଥିତି ଗମ୍ଭୀର ହୋଇପଡ଼ିଛି । ଜିଲ୍ଲାର ବିଭିନ୍ନ ଅଞ୍ଚଳରେ ଲୋକେ ଜଳବନ୍ଦୀ ହୋଇ ରହିଥିବା ବେଳେ ଉଦ୍ଧାର ଓ ସ୍ଥାନାନ୍ତରଣ ପାଇଁ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ଚାଲିଛି । ପରିସ୍ଥିତିର ଗମ୍ଭୀରତାକୁ ଦେଖି ଜଳବନ୍ଦୀରେ ଫସିଥିବା ଲୋକଙ୍କୁ ହେଲିକପ୍ଟର ଯୋଗେ ଏୟାରଲିଫ୍ଟ କରିବାକୁ ଯୋଜନା କରାଯାଉଛି ।

ମୁଖ୍ୟ ଶାସନ ସଚିବଙ୍କ ସୂଚନା ଅନୁଯାୟୀ, ଏୟାରଲିଫ୍ଟ ପାଇଁ କୋଷ୍ଟଗାର୍ଡ ସହ ଆଲୋଚନା କରାଯାଇଛି । ଜଳବନ୍ଦୀରେ ଥିବା ପ୍ରାୟ ୨ ହଜାର ଲୋକଙ୍କ ମଧ୍ୟରୁ ପ୍ରାୟ ୧୨୦ ଜଣଙ୍କୁ ହେଲିକପ୍ଟର ମାଧ୍ୟମରେ ଉଦ୍ଧାର କରି ସୁରକ୍ଷିତ ସ୍ଥାନକୁ ନେବା ପାଇଁ ବ୍ୟବସ୍ଥା ହେଉଛି । ଗଞ୍ଜାମ ଜିଲ୍ଲାର ଚାରିଟି ସ୍ଥାନରେ ଲୋକେ ବିଶେଷ ଭାବେ ପ୍ରଭାବିତ ହୋଇଥିବାରୁ ଉଦ୍ଧାର କାର୍ଯ୍ୟକୁ ଗୁରୁତ୍ୱ ଦିଆଯାଉଛି ।

ସୂଚନା ଅନୁସାରେ, ଗଞ୍ଜାମ ଜିଲ୍ଲାର ୨୨ଟି ବ୍ଲକ୍‌ର ୨୯୯ଟି ଗାଁର ପ୍ରାୟ ୪୪ ହଜାର ୫୦୦ ଲୋକ ବର୍ଷା ଓ ବନ୍ୟା ଯୋଗୁଁ ପ୍ରଭାବିତ ହୋଇଛନ୍ତି । ଏହି ସ୍ଥିତି ଉପରେ ବ୍ରହ୍ମପୁରରେ ରହି ଆର୍‌ଡିସି ନଜର ରଖିଛନ୍ତି । ଏଥିସହ ରାଜ୍ୟ ସ୍ୱତନ୍ତ୍ର ରିଲିଫ୍ କମିଶନର (SRC)ଙ୍କ କାର୍ଯ୍ୟାଳୟରେ ସ୍ଥିତିର ସମୀକ୍ଷା କରାଯାଇଛି ।

 ଏଥି ସହ ପଢନ୍ତୁ:  ବାତ୍ୟା ଅର୍ଣ୍ଣବ ପରେ ବଡ଼ ବନ୍ୟା... ଗଞ୍ଜାମ-ଗଜପତିରେ ଜଳପ୍ରଳୟ, ଗାଁରେ ପଶିଲା ପାଣି

ଅନ୍ୟପଟେ, ପଡ଼ୋଶୀ ଆନ୍ଧ୍ରପ୍ରଦେଶର ଶ୍ରୀକାକୁଲମ୍‌ରେ ରେଳବ୍ରିଜ୍‌ ଉପରେ ପାଣି ଚାଲୁଥିବାରୁ ଟ୍ରେନ୍‌ ଚଳାଚଳ ପ୍ରଭାବିତ ହୋଇଛି । ରେଳଯାତ୍ରୀଙ୍କୁ ଷ୍ଟେସନ୍‌ରେ ଆବଶ୍ୟକ ସୁବିଧା ଯୋଗାଇଦେବା ସହ ରାସ୍ତା ଉପଲବ୍ଧ ଥିବା ସ୍ଥାନକୁ ଯାତ୍ରୀଙ୍କୁ ପଠାଇବା ପାଇଁ ପଦକ୍ଷେପ ନିଆଯାଉଛି । ପ୍ରଶାସନ ପକ୍ଷରୁ ସ୍ଥିତି ଉପରେ ନିରନ୍ତର ନଜର ରଖାଯାଇଛି । ବର୍ଷାର ପରିମାଣ କମିଲେ ପରିସ୍ଥିତିରେ ସୁଧାର ଆସିବ ବୋଲି ଆଶା କରାଯାଉଛି ।

ଗଜପତି ଜିଲ୍ଲାରେ ବନ୍ୟା ସ୍ଥିତି ଅଧିକ ଚିନ୍ତାଜନକ ହୋଇପଡ଼ିଛି । ଉଦୟଗିରି ଶିବମନ୍ଦିର ନିକଟରେ ହଠାତ୍ ଜଳସ୍ତର ବଢ଼ିବାରୁ ଆତଙ୍କ ଖେଳିଯାଇଛି । ଗୋଷାଣୀ ବ୍ଲକର ବାଗସଳା ଗାଁରେ ମହେନ୍ଦ୍ରତନୟା ନଦୀର ବନ୍ୟାଜଳ ପଶିଛି । ଅନ୍ୟପଟେ ପାହାଡ଼ ଧସିବା ଯୋଗୁଁ କୋଇଁପୁରରୁ ଗଙ୍ଗାବାଡ଼କୁ ସଂଯୋଗ କରୁଥିବା ମୁଖ୍ୟ ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି ।

ସେହିପରି ଗଞ୍ଜାମ ଜିଲ୍ଲାର ସୋରଡ଼ାରେ ମଧ୍ୟ ବନ୍ୟା ପରିସ୍ଥିତି ଗମ୍ଭୀର ହୋଇଛି । ଋଷିକୁଲ୍ୟା ନଦୀର ଜଳସ୍ତର ବଢ଼ିବାରୁ ନେତାଜୀ ସାହି, ବରାଡ଼ି, ହାଡ଼ି ସାହି ଓ ମଠ ସାହି ଭଳି ଅଞ୍ଚଳରେ ପାଣି ପଶିଛି । ଜରାଉ ବ୍ରିଜ୍ ଓ ଋଷିକୁଲ୍ୟା ବ୍ରିଜ୍‌ର ସୁରକ୍ଷାକୁ ନେଇ ମଧ୍ୟ ଚିନ୍ତା ବଢ଼ିଛି ।

ପୁରୁଷୋତ୍ତମପୁରରେ ଋଷିକୁଲ୍ୟା ନଦୀର ଜଳସ୍ତର ୧୭.୫୦୦ ମିଟରରେ ପହଞ୍ଚିଥିବା ବେଳେ ବିପଦ ସଙ୍କେତ ୧୬.୮୩୫ ମିଟର ରହିଛି । ଅର୍ଥାତ୍ ନଦୀର ଜଳସ୍ତର ବିପଦ ସଙ୍କେତଠାରୁ ଉପରେ ପ୍ରବାହିତ ହେଉଛି । ଏଭଳି ସଙ୍କଟ ସମୟରେ ଅଗ୍ନିଶମ ବିଭାଗ ପକ୍ଷରୁ ବୋଟ୍ ସାହାଯ୍ୟରେ ବନ୍ୟାବିପନ୍ନଙ୍କୁ ଉଦ୍ଧାର କରାଯାଉଛି । ତେବେ ଲଗାଣ ବର୍ଷା ଓ ବଢ଼ୁଥିବା ନଦୀଜଳକୁ ନେଇ ତଳିଆ ଅଞ୍ଚଳର ଲୋକଙ୍କ ଚିନ୍ତା ବଢ଼ିଛି । ବନ୍ୟା ପରିସ୍ଥିତି ଉପରେ ପ୍ରଶାସନର ନଜର ରହିଥିବା ବେଳେ ଲୋକଙ୍କୁ ସତର୍କ ରହିବା ଜରୁରୀ ହୋଇପଡ଼ିଛି ।