ଦିସପୁର: ଆସାମରେ ବନ୍ୟା ପରିସ୍ଥିତି ଅତି ଭୟାବହ । ଜଳପ୍ରଳୟରେ ବୁଡ଼ିଛି ଗାଁକୁ ଗାଁ । ପ୍ରକୃତିର କୋପରେ ଥରହର ଭାରତର ଉତ୍ତର-ପୂର୍ବବର୍ତ୍ତୀ ରାଜ୍ୟ । ପ୍ରଭାବିତ ହୋଇଛନ୍ତି ପ୍ରାୟ ୨ ଲକ୍ଷ ଲୋକ । ବ୍ରହ୍ମପୁତ୍ର ସମେତ ୫ଟି ପ୍ରମୁଖ ନଦୀ ବିପଦ ସଙ୍କେତ ଉପରେ ପ୍ରବାହିତ ହେଉଥିବା ବେଳେ ଉଦ୍ଧାର କାର୍ଯ୍ୟ ପାଇଁ ମୈଦାନକୁ ଓହ୍ଲାଇଛି ସେନା । ସ୍ଥିତି ପରଖିବାକୁ ହାଇ ଆଲର୍ଟରେ ଅଛନ୍ତି ବାୟୁସେନା ଏବଂ NDRF।
- ହଠାତ୍ ମାଡ଼ି ଆସିଲା ବନ୍ୟା ପାଣି
ଲଗାଣ ମୌସୁମୀ ବର୍ଷା ଯୋଗୁଁ ଉପରମୁଣ୍ଡରୁ ମାଡ଼ି ଆସିଥିବା ବନ୍ୟା ପାଣି ଏବେ ରାଜ୍ୟରେ ହାହାକାର ସୃଷ୍ଟି କରିଛି । ଆସାମର ୧୨ଟି ଜିଲ୍ଲାର ପ୍ରାୟ ୫୮୦ରୁ ଅଧିକ ଗାଁ ସମ୍ପୂର୍ଣ୍ଣ ଭାବେ ପାଣି ଘେରରେ ରହିଛି । ବ୍ରହ୍ମପୁତ୍ର, ଦିଖୋ ଏବଂ ବୁଢୀଦିହିଙ୍ଗ୍ ଭଳି ୫ଟି ପ୍ରମୁଖ ନଦୀର ଜଳସ୍ତର ବିପଦ ସଙ୍କେତ ଉପରକୁ ଚାଲିଯାଇଥିବାରୁ ସ୍ଥିତି ଅଣାୟତ୍ତ ହୋଇପଡ଼ିଛି । ସିମାଲୁଗୁଡ଼ି ଅଞ୍ଚଳରେ ରେଳଧାରଣା ଉପରେ ବନ୍ୟା ପାଣି ପ୍ରବାହିତ ହେବା ଯୋଗୁଁ ଅନେକ ଦୂରଗାମୀ ଟ୍ରେନ୍ ଚଳାଚଳକୁ ବାତିଲ ବା ରୁଟ୍ ଡାଇଭର୍ଟ କରାଯାଇଛି ।
- ଉଦ୍ଧାର କରୁଛନ୍ତି ଭାରତୀୟ ସେନା
ସ୍ଥିତି ଜଟିଳ ହେବା ଦେଖି ଉଦ୍ଧାର କାର୍ଯ୍ୟ ପାଇଁ ମୈଦାନକୁ ଓହ୍ଲାଇଛି ଭାରତୀୟ ସେନା । ଆସାମ ରାଇଫଲ୍ସ ଏବଂ NDRF ସହ ମିଶି ସେନା ପକ୍ଷରୁ 'ଅପରେସନ୍ ଜଳରାହତ' ଜରିଆରେ ଯୁଦ୍ଧକାଳୀନ ଭିତ୍ତିରେ ଉଦ୍ଧାର କାର୍ଯ୍ୟ ଚାଲିଛି । ଶିବସାଗର, ଜୋରହାଟ୍ ଏବଂ ଚରାଇଦେଓ ଜିଲ୍ଲାରେ NDRFର ପ୍ରାୟ ୨୪ରୁ ଅଧିକ ବୋଟ୍ ମୁତୟନ କରାଯାଇ ଶତାଧିକ ଫସି ରହିଥିବା ଲୋକଙ୍କୁ ସୁରକ୍ଷିତ ଆଶ୍ରୟ ସ୍ଥଳୀକୁ ଅଣାଯାଉଛି । ଉଦ୍ଧାର କାର୍ଯ୍ୟରେ NDRFର ୬ଟି ଟିମ୍ ଲାଗିଛନ୍ତି ।
- ୩,୮୦୦ ହେକ୍ଟରରୁ ଅଧିକ ଚାଷ ଜମି ନଷ୍ଟ
ସରକାରୀ ରିପୋର୍ଟ ଅନୁସାରେ, ବନ୍ୟା ଯୋଗୁଁ ପ୍ରାୟ ୩,୮୦୦ ହେକ୍ଟରରୁ ଅଧିକ ଚାଷ ଜମି ଏବଂ ୩୭,୦୦୦ରୁ ଅଧିକ ଗୃହପାଳିତ ପଶୁ ପ୍ରଭାବିତ ହୋଇଛନ୍ତି । ପ୍ରଶାସନ ପକ୍ଷରୁ ପ୍ରଭାବିତ ଜିଲ୍ଲାଗୁଡ଼ିକରେ ରିଲିଫ୍ ଶିବିର ଖୋଲାଯାଇ ଶୁଖିଲା ଖାଦ୍ୟ ଓ ସାମଗ୍ରୀ ବଣ୍ଟନ କରାଯାଉଛି । ହେଲେ ଆଗକୁ ଯଦି ବର୍ଷାର ପରିମାଣ ବଢ଼େ, ତେବେ ପରିସ୍ଥିତି ଆହୁରି ସଂଗୀନ ହେବାର ଆଶଙ୍କା ରହିଛି ।
- ରିଲିଫ କାର୍ଯ୍ୟ ତ୍ଵରାନ୍ବିତ କରିବାକୁ CM ଶର୍ମାଙ୍କ ନିର୍ଦ୍ଦେଶ
ବନ୍ୟାର ଭୟାବହତାକୁ ଦୃଷ୍ଟିରେ ରଖି ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ଵଶର୍ମା ସୋମବାର ରିଲିଫ କାର୍ଯ୍ୟକୁ ତ୍ଵରାନ୍ବିତ କରିବା ଲାଗି ସରକାରୀ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ସେ ଏକ୍ସ ପୋଷ୍ଟରେ କହିଛନ୍ତି ଯେ ବନ୍ୟା ପ୍ରଭାବିତ ଜିଲ୍ଲାର ସମସ୍ତ ବିଧାୟକ ଓ ସାଂସଦଙ୍କ ସହିତ ସେ କଥାବାର୍ତ୍ତା କରିଛନ୍ତି ଓ ସେମାନଙ୍କୁ ସ୍ଥିତି ଉପରେ ଧ୍ୟାନ ଦେବାକୁ ନିର୍ଦ୍ଦେସ ଦେଇଛନ୍ତି । ବର୍ଷା ଯୋଗୁଁ ଜଳସ୍ତର ବୃଦ୍ଧି ପାଉଥିବାରୁ ସରକାର ତଳିଆ ଅଞ୍ଚଳରୁ ଲୋକଙ୍କୁ ସୁରକ୍ଷିତ ସ୍ଥାନକୁ ନେବା ଉପରେ ଜୋର ଦେଇଛନ୍ତି।
