ସାରା ରାଜ୍ୟରେ ଗୁରୁବାର ରାତି ସାରା କାଳବୈଶାଖୀ ତାଣ୍ଡବ ଦେଖିବାକୁ ମିଳିଛି । ପବନ, ବିଜୁଳି, ଘଡ଼ଘଡ଼ି ସହ ବର୍ଷା ଯୋଗୁଁ କେଉଁଠି ବଡ଼ ବଡ଼ ଗଛ ଉପୁଡ଼ି ପଡ଼ିଛି, ତ ଆଉ କେଉଁଠି ହୋଡିଂ ଖସି ପଡ଼ିଛି । ଅଧିକାଂଶ ସ୍ଥାନରେ ବିଦ୍ୟୁତ ସରବରାହ ଠପ୍ ହୋଇଛି । କିଛି କିଛି ସ୍ଥାନରେ ବଜ୍ରାପାତରେ ଲୋକଙ୍କ ଜୀବନ ଯାଇଛି । ରାସ୍ତାରେ ବଡ଼ ବଡ଼ ଗଛ ଉପୁଡ଼ି ଯାତାୟତ ବାଧାପ୍ରାପ୍ତ ହୋଇଛି । ସେପଟେ ଗତକାଲି ସର୍ବାଧିକ ବର୍ଷା ପୁରୀରେ ୬୮.୮ ମିଲିମିଟର ବର୍ଷା ରେକର୍ଡ ହୋଇଥିବା ବେଳେ ଛତ୍ରପୁରରେ ୬୪.୦ ମିଲିମିଟର, ଦାରିଙ୍ଗବାଡ଼ିରେ ୬୩.୦, ଭୁବନେଶ୍ୱରରେ ୪୫.୪ ଓ ଗୋପାଳପୁରରେ ୪୫.୪ ମିଲିମିଟର ବର୍ଷା ରେକର୍ଡ କରାଯାଇଛି।
- ବଡ଼ମ୍ବାରେ ଗଛ ପଡ଼ି ଜଣେ ମୃତ
କଟକ ବଡମ୍ବା ଅଞ୍ଚଳରେ ଭୀଷଣ କାଳ ବୈଶାଖୀ ପ୍ରଭାବରେ ବ୍ୟାପକ କ୍ଷୟ କ୍ଷତି ହୋଇଛି । ବଡମ୍ବା ମାନପୁର ଗାଁର ନରେନ୍ଦ୍ର ମଲ୍ଲିକ (୫୮ ବର୍ଷ) ରାତ୍ରିରେ କାମ ସାରି ଘରକୁ ଫେରିବା ବେଳେ ହରିଠା ଗୋବିନ୍ଦପୁର ମଝିରାସ୍ତାରେ ଏକ ନିମ୍ବ ଗଛ ତାଙ୍କ ଉପରେ ପଡ଼ିବାରୁ ସେ ପ୍ରାଣ ତ୍ୟାଗ କରିଛନ୍ତି । ଗଛ ପଡ଼ିବା ପରେ କିଛି ଲୋକ ତାଙ୍କୁ ସଙ୍ଗେ ସଙ୍ଗେ ମାଣିଆବନ୍ଧ ମେଡିକାଲରେ ଭର୍ତ୍ତି କରିଥିଲେ, କିନ୍ତୁ ଡାକ୍ତର ସେଠାରେ ମୃତ୍ୟୁ ଘୋଷଣା କରିଥିଲେ । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଥିବା ବେଳେ ବଡମ୍ବା ମେଡିକାଲରେ ଶବ ବ୍ୟବଚ୍ଛେଦ ପାଇଁ ରଖାଯାଇଛି । ସରକାରୀ ସ୍ତରରେ ପ୍ରଶାସନ ପକ୍ଷରୁ ସହଯୋଗ ଯୋଗାଇ ଦେବାକୁ ଦାବି ହେଉଛି ।
ସେହିପରି ନୟାଗଡ଼ରେ ବି ତାଣ୍ଡବ ରଚିଛି କାଳବୈଶାଖୀ । ଦଶପଲ୍ଲା କୁଆଁରିଆ ଡ୍ୟାମରେ ମାଛ ଧରିବାକୁ ଯାଇ ଭାସିଯାଇଛନ୍ତି ଦୁଇ ସାଙ୍ଗ । ବହୁ ଖୋଜାଖୋଜି ପରେ ଜଣଙ୍କର ମୃତଦେହ ଉଦ୍ଧାର ହୋଇଥିବା ବେଳେ ଅନ୍ୟ ଜଣଙ୍କର ପତ୍ତା ମିଳୁନାହିଁ । ସେପଟେ ଦଶପଲ୍ଲା ଅଗ୍ନିଶମ ବାହିନୀ ଦଶପଲ୍ଲା ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଛି । ତେବେ ଉଭୟ ସାଙ୍ଗ ଓଡସର ଗାଁର ଅଭୟ ଖମାରୀ ଓ ପ୍ରଦୀପ ପ୍ରଧାନ ହୋଇଥିବା ବେଳେ ଅଗ୍ନିଶମ ବାହିନୀ ପାଣି ଭିତରୁ ପ୍ରଦୀପ ପ୍ରଧାନଙ୍କ ମୃତଦେହ ଉଦ୍ଧାର କରିଛି ।
- ପୁରୀରେ ଅଳ୍ପକେ ବର୍ତ୍ତିଲେ ୧୦ ଜଣ
କାଳବୈଶାଖୀ ପ୍ରଭାବରେ ପୁରୀ ଜିଲ୍ଲା ବ୍ରହ୍ମଗିରି ଓ କୃଷ୍ଣପ୍ରସାଦରେ ବ୍ୟାପକ କ୍ଷତି ହୋଇଛି । ଗଛ ଓ ବିଦ୍ୟୁତ ଖୁଣ୍ଟ ଭାଙ୍ଗିଯାଇଛି । ବିଭିନ୍ନ ସ୍ଥାନରେ ରାସ୍ତା ଅବରୋଧ ହୋଇଛି । ଅନେକ ଗାଁରେ ଚାଳ ଓ ଆଜବେଷ୍ଟସ ଛପର ଉଡ଼ିଛି । ବଜ୍ରପାତରେ ନଡ଼ିଆ ଗଛ ଜଳିଯାଇଥିବାବେଳେ କୃଷ୍ଣପ୍ରସାଦରେ ଅଳ୍ପକେ ବର୍ତ୍ତିଛନ୍ତି ୧୦ଜଣ ବ୍ୟକ୍ତି । ବ୍ରହ୍ମଗିରିରେ ଘରେ ଶୋଇଥିବା ବେଳେ ଉଡିଗଲା ଆଜବେଷ୍ଟସ ଛପର।
ମୟୂରଭଞ୍ଜ ଜିଲ୍ଲା ଶୁଳିଆପଦା ତହସିଲ ଅଧିନ ଫାନିଆ ପଞ୍ଚାୟତ ଜମ୍ଭିରାପାଳ ଗାଁରେ ବି ବ୍ୟାପକ କ୍ଷୟକ୍ଷତି । ଗାଁର ଲକ୍ଷ୍ମୀଧର ସୋରେନଙ୍କ ଘର ଉପରେ ଏକ ବିରାଟକାୟ ଗଛ ପଡ଼ିବା ଯୋଗୁଁ ବ୍ୟାପକ କ୍ଷତି ହେଇଛି । ପରିବାର ସହିତ ଲକ୍ଷ୍ମୀଧର ଘର ଭିତରେ ଶୋଇଥିବା ସମୟରେ ରାତିରେ ହଠାତ୍ ଜୋରରେ ପବନ ବର୍ଷା, ଘଡଘଡି ହୋଇଥିଲା । ଗଛଟି ଘର ଉପରେ ପଡ଼ିବା ସହିତ ଇଲେକ୍ଟ୍ରି ତାର ଛିଡ଼ିଯାଇଛି । ଅଳ୍ପକେ ମୃତ୍ୟୁମୁଖରୁ ବର୍ତ୍ତି ଯାଇଛନ୍ତି ପରିବାର ଲୋକେ । ଘରଭିତରେ ଥିବା ଧାନ ସବୁ ନଷ୍ଟ ହୋଇଯାଉଛି । ସେହିପରି ବାଘଡା ପଞ୍ଚାୟତ ସିଙ୍ଗଡ଼ାଠାରେ ଲକ୍ଷାଧିକ ଟଙ୍କାର ନିର୍ମିତ ହାଟ ପିଣ୍ଡି ଭାଙ୍ଗି ଚୁରମାର ହୋଇଯାଇଛି ।
କାଳବୈଶାଖୀ ପ୍ରଭାବରେ ସୁବର୍ଣ୍ଣପୁର ଜିଲ୍ଲାର ବିଭିନ୍ନ ଭାଗରେ କୁଆପଥର ମାଡ଼ ସହ ପବନ ଓ ବର୍ଷା ରେକର୍ଡ ହୋଇଛି ସୋନପୁର ସହର ସହିତ ବୀରମହାରାଜପୁର, ଉଲୁଣ୍ଡା ସମେତ ଡୁଙ୍ଗୁରିପାଲି ଓ ବିନିକା ଅଞ୍ଚଳରେ ବେଶୀ ପ୍ରଭାବିତ ହୋଇଛି । ଫଳରେ ଚାଷୀଙ୍କ ଚିନ୍ତା ବଢ଼ିଛି । ରବି ଧାନ ସହିତ ବ୍ୟାପକ ପନିପରିବା ନଷ୍ଟ ହେବାର ଆଶଙ୍କା ରହିଛି ।
ଅଧିକ
ଖବର ପଢନ୍ତୁ...
