Malkangiri Flood Alert / ପ୍ରବଳ ବର୍ଷାରେ ବେହାଲ ମାଲକାନଗିରି, ସମସ୍ତ ସରକାରୀ କର୍ମଚାରୀଙ୍କ ଛୁଟି ବାତିଲ

ଲଘୁଚାପଜନିତ ଲଗାଣ ବର୍ଷାରେ ବେହାଲ ହୋଇପଡ଼ିଛି ମାଲକାନଗିରି ଜିଲ୍ଲା । ମାତ୍ର ୪୮ ଘଣ୍ଟାର ବର୍ଷା ପରେ ଜିଲ୍ଲାର ସ୍ଥିତି ସଙ୍ଗୀନ ହୋଇଥିବା ବେଳେ ଜିଲ୍ଲାର ବିଭିନ୍ନ ତଳୁଆ ପୋଲ ଉପରେ ବନ୍ୟାଜଳ ପ୍ରବାହିତ ହେଉଛି ।

ଜିଲ୍ଲା ଦେଇ ଯାଇଥିବା ୩୨୬ ନମ୍ବର ଜାତୀୟ ରାଜପଥର ପୋଟେରୁ ନିକଟସ୍ଥ ତଳୁଆ ପୋଲ ଉପରେ ପୁଣିଥରେ ପାଣି ଚାଲୁଥିବାରୁ ଯାତାୟାତ ପ୍ରଭାବିତ ହୋଇଛି । ଗତକାଲି ପୋଲ ଉପରେ ପ୍ରାୟ ୧ ଫୁଟ୍‌ର ବନ୍ୟାଜଳ ପ୍ରବାହିତ ହେବାରୁ କିଛି ସମୟ ପାଇଁ ଯୋଗାଯୋଗ ବିଚ୍ଛିନ୍ନ ହୋଇଥିଲା । ତେବେ ମଧ୍ୟରାତ୍ରୀ ସୁଦ୍ଧା ପାଣି କମିବା ପରେ ଯୋଗାଯୋଗ ସ୍ୱାଭାବିକ ହୋଇଥିଲା । ତେବେ ପୁଣି ପାଣି ବଢ଼ିବାରୁ ପୋଟେରୁ ପୋଲ ଉପରେ ଯାତାୟାତ ପ୍ରଭାବିତ ହୋଇଛି ।

ଏହାର ପ୍ରଭାବରେ କାଲିମେଳା ଓ ପଡ଼ିଆ ବ୍ଲକ ସହ ଯୋଗାଯୋଗ ବିଚ୍ଛିନ୍ନ ହୋଇଥିବା ସୂଚନା ମିଳିଛି । ଜିଲ୍ଲାର ବିଭିନ୍ନ ତଳୁଆ ଅଞ୍ଚଳ ଓ ପୋଲ ଉପରେ ପାଣିର ସ୍ଥିତି ଉପରେ ପ୍ରଶାସନ ନଜର ରଖିଛି ।

ସେପଟେ ସମ୍ଭାବ୍ୟ ବନ୍ୟାକୁ ଦୃଷ୍ଟିରେ ରଖି ମାଲକାନଗିରି ଜିଲ୍ଲାପାଳ ସମସ୍ତ ସରକାରୀ କର୍ମଚାରୀଙ୍କ ଛୁଟି ବାତିଲ କରିଛନ୍ତି । ସମସ୍ତ ବ୍ଲକର ବିଡିଓ ଓ ତହସିଲଦାରଙ୍କୁ ନିଜ ନିଜ ଅଞ୍ଚଳରେ ରହି ପରିସ୍ଥିତିର ଅନୁଧ୍ୟାନ କରିବା ସହ ଆବଶ୍ୟକ ପଦକ୍ଷେପ ନେବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।

ବର୍ତ୍ତମାନ ଜିଲ୍ଲାରେ ୩୬ ଜଣିଆ ଗୋଟିଏ ଓଡ୍ରାଫ୍‌ ଟିମ୍‌ ନିୟୋଜିତ ରହିଛି । ସମ୍ଭାବ୍ୟ ବନ୍ୟା ପରିସ୍ଥିତିର ମୁକାବିଲା ପାଇଁ କାଲିମେଳା ଓ ମାଥିଲି ବ୍ଲକକୁ ମଧ୍ୟ ଓଡ୍ରାଫ୍‌ ଟିମ୍‌ ପଠାଯାଇଛି । ଲଗାଣ ବର୍ଷା ଜାରି ରହିଲେ ସ୍ଥିତି ଆହୁରି ଗମ୍ଭୀର ହେବାର ଆଶଙ୍କା ଥିବାରୁ ପ୍ରଶାସନ ପକ୍ଷରୁ ଲୋକଙ୍କୁ ସତର୍କ ରହିବା ସହ ତଳୁଆ ଅଞ୍ଚଳ ଓ ବନ୍ୟାପ୍ରବଣ ପୋଲ ଦେଇ ଯାତାୟାତ ନକରିବାକୁ ସତର୍କ କରାଯାଉଛି ।