ଏ ବର୍ଷ ବିଳମ୍ବ ହେଉଛି ଚାଷ । ବର୍ଷା ଅଭାବରୁ ଆଗେଇ ପାରୁନି ଖରିଫ ଚାଷ କାର୍ଯ୍ୟ । ମୌସୁମୀ ଓଡ଼ିଶା ଛୁଇଁଥିଲେ ବି ରାଜ୍ୟର ବିଭିନ୍ନ ଅଂଚଳରେ ଏବେ ବି ଟାଣ ଖରା ସହ ଅସହ୍ୟ ଗୁଳୁଗୁଳି ଅନୁଭୂତ ହେଉଛି । କେଉଁଠି ଚାଷୀ ଆକାଶକୁ ଚାହିଁ ଚିନ୍ତାରେ ବସିଛି ତ ପୁଣି କେଉଁଠି ବର୍ଷା ପାଇଁ ଆରମ୍ଭ ହୋଇଛି ନିଆରା ପରମ୍ପରା ।

ରଜ ପରେ ବି କମୁନି ଖରାର ପ୍ରକୋପ । ଖରିଫ ଚାଷ ଆରମ୍ଭ କରିବାରେ ବିଳମ୍ବ, ଚିନ୍ତାରେ ଚାଷୀକୂଳ । ନୂଆପଡା ଜିଲ୍ଲା ଖଡ଼ିଆଳ, ବୋଡେନ ଏବଂ ସିନାପାଲି ବ୍ଲକରେ ମୌସୁମୀ ବର୍ଷାର ଦେଖାନାହିଁ । ଚାଷୀ ଜମିରେ ଧାନ ବୁଣିବା ପାଇଁ ପ୍ରସ୍ତୁତ ଥିବା ବେଳେ ବର୍ଷାର ଅଭାବ ଦେଖାଦେଇଛି । ଜମିରେ ହଳ ଲଙ୍ଗଳ କରିବା ସହ ଗଛ ଲତା ସଫା କରି, ଧାନ ବିହନ ଆଣି ଘରେ ରଖିଛି ଚାଷୀ । କିନ୍ତୁ ମୌସୁମୀ ବର୍ଷା ବିଳମ୍ବ ଯୋଗୁଁ ଏବେ ଚାଷୀଙ୍କ ଚିନ୍ତା ବଢିଛି ।

ସେପଟେ ସୁବର୍ଣ୍ଣପୁର ଜିଲ୍ଲାରେ ମଧ୍ୟ ଚାଷୀମାନେ ବର୍ଷାକୁ ଅପେକ୍ଷା କରି ରହିଛନ୍ତି । ଯେଉଁଠି ବି ସାମାନ୍ୟ ବର୍ଷା ହୋଇଛି ତାହା କାମରେ ଆସୁନି ଫଳରେ ଅଡୁଆରେ ଚାଷୀ । ଜିଲ୍ଲାରେ ଚଳିତ ସିଜିନରେ ୨୭.୪୮ ମିଲିମିଟର ବର୍ଷା ରେକର୍ଡ କରାଯାଇଛି । ଯାହା ଫଳରେ ଚାଷ କାମ ପୂରା ଠପ୍ ହୋଇଯାଇଥିବା ଚାଷୀମାନେ କହିଛନ୍ତି ।

ଅନ୍ୟପକ୍ଷରେ ପରମ୍ପରା ଅନୁଯାଇ ଅଣ୍ଡିରା ବାହାଘର କରି ବର୍ଷାକୁ ନିମନ୍ତ୍ରଣ କରିଛନ୍ତି କୋରେଇ ବ୍ଲକ ବନ୍ଦାଳର ଗମ୍ଭାରୀଆ ଗ୍ରାମବାସୀ । ବର ଯାଉଛି, ବାଜା ବାଜୁଛି, ବାଣ ଫୁଟୁଛି ଡିଜେ ବାଜୁଛି ରୋଷଣୀ କରି ଆସୁଛନ୍ତି ବର କନିଆ । ଲୋକ କଥା ଅନୁଯାଇ ଅଣ୍ଡିରା ବାହାଘର ହେଲେ ବର୍ଷା ହୁଏ । ଏଥିପାଇଁ ଏକାଠି ବର୍ଷାକୁ ନିମନ୍ତ୍ରଣ କରୁଛନ୍ତି ଗ୍ରାମବାସୀ । ହରିବୋଲ ହୁଳହୁଳିରେ କମ୍ପୁଛି ପୁରା ପରିବେଶ ।

ଜୁନ୍ ୧୨ରେ ଦକ୍ଷିଣ ପଶ୍ଚିମ ମୌସୁମୀ ଓଡ଼ିଶାରେ ପହଞ୍ଚିଥିଲା । ତାପରେ ଏହା ବିଭିନ୍ନ ଅଂଚଳକୁ ଅଗ୍ରସର ହୋଇଥିଲେ ମଧ୍ୟ ବର୍ଷାର ପରିମାଣ କମ୍ ରହିଛି । ଆଉ ୪/୫ଦିନ ମଧ୍ୟରେ ମୌସୁମୀ ସାରା ଓଡ଼ିଶା ଛୁଇଁବ ବୋଲି ଆଞ୍ଚଳିକ ପାଣିପାଗ ବିଭାଗ ଆକଳନ କରିଛି ।