Heatwave Alert / ତତଲା କଡ଼େଇରେ ସିଝୁଛି ସାରା ଓଡ଼ିଶା, ୨୨ ଯାଏଁ ନାହିଁ ନିସ୍ତାର

ଜଳୁଛି ପଶ୍ଚିମଠୁ ଉପକୂଳ । ପ୍ରବଳ ଗ୍ରୀଷ୍ମ ପ୍ରବାହରେ କଲବଲ ହେଉଛି ସାରା ଓଡ଼ିଶା । ପଶ୍ଚିମରେ ସୂର୍ଯ୍ୟଙ୍କ ପ୍ରବଳ ତାଉ ଆଉ ଉପକୂଳରେ ଛଟପଟ କରୁଛି ଗୁଳୁଗୁଳି । ଏଭଳି ସ୍ଥିତିରେ ଆଇଏମଡିର ପୂର୍ବାନୁମାନ ବଢ଼ାଇ ଦେଇଛି ଟେନସନ । ଆସନ୍ତା ୨୨ ତାରିଖ ଯାଏଁ ଆଉ ନିସ୍ତାର ନାହିଁ । ଏପଟେ ପଶ୍ଚିମ ଓଡ଼ିଶାର ୬ ଜିଲ୍ଲାକୁ ଆସନ୍ତାକାଲି ଓ ୨୦ ତାରିଖ ପାଇଁ ହିଟୱେଭ୍‌ ୱାର୍ଣ୍ଣିଂ ଜାରି ହୋଇଛି । ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ୭ ଜିଲ୍ଲାରେ ସ୍କୁଲ ଛୁଟି ଘୋଷଣା ହୋଇଛି ।

ରାଜ୍ୟରେ ହିଟୱେଭ୍‌ କଣ୍ଡିସନ ନେଇ ଏଭଳି ପୂର୍ବାନୁମାନ କରିଛି ଭୁବନେଶ୍ବର ଆଞ୍ଚଳିକ ପାଣିପାଗ କେନ୍ଦ୍ର । ଆଜି ପାଇଁ ପଶ୍ଚିମ ଓଡ଼ିଶାର ୫ ଜିଲ୍ଲାକୁ ଜାରି ହୋଇଥିଲା ହିଟୱେଭ୍ ୱାର୍ଣ୍ଣିଂ । ଏହି ଜିଲ୍ଲାଗୁଡ଼ିକ ହେଲା ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର, ବଲାଙ୍ଗୀର ଓ ନୂଆପଡ଼ା । ସେହିପରି ଆସନ୍ତାକାଲି ପାଇଁ ୬ ଜିଲ୍ଲା ସୁନ୍ଦରଗଡ଼, ଝାରସୁଗୁଡ଼ା, ସମ୍ବଲପୁର, ବଲାଙ୍ଗୀର, ନୂଆପଡ଼ା ଓ କଳାହାଣ୍ଡିକୁ ହିଟୱେଭ୍‌ ୱାର୍ଣ୍ଣିଂ ଜାରି ହୋଇଛି । ଗତ ୨୪ ଘଣ୍ଟାରେ ୪୦ ଡିଗ୍ରୀ ଉପରେ ୧୦ ସହରର ତାପମାତ୍ରା ରେକର୍ଡ ହୋଇଛି । ଆସନ୍ତା ୨୧ ତାରିଖରେ ୮ ଜିଲ୍ଲା ଓ ୨୨ ତାରିଖରେ ବି ପଶ୍ଚିମ ଓଡ଼ିଶାର ୮ ଜିଲ୍ଲାକୁ ଜାରି ହୋଇଛି ହିଟୱେଭ ୱାର୍ଣ୍ଣିଂ । କେବଳ ଦିନରେ ନୁହେଁ ରାତିରେ ବି ପ୍ରଚଣ୍ଡ ଗରମ ଅନୁଭୂତ ହେବ ବୋଲି ଚେତାଇଛି ପାଣିପାଗ ବିଭାଗ ।

ଅସହ୍ୟ ଖରାକୁ ଦୃଷ୍ଟିରେ ରଖି ପିଲାଙ୍କ ସୁରକ୍ଷା ପାଇଁ ରାଜ୍ୟର ୭ ଜିଲ୍ଲାରେ ସ୍କୁଲ ଛୁଟି ଘୋଷଣା ହୋଇଛି । ସମ୍ବଲପୁର, ନୂଆପଡ଼ା, ବଲାଙ୍ଗିର, ନବରଙ୍ଗପୁର, ଝାରସୁଗୁଡ଼ା, କଳାହାଣ୍ଡି ଓ ସୁବର୍ଣ୍ଣପୁର ଜିଲ୍ଲାରେ ସ୍କୁଲ ଛୁଟି ଘୋଷଣା କରିଛନ୍ତି ସଂପୃକ୍ତ ଜିଲ୍ଲାର ଜିଲ୍ଲାପାଳ ।

ହିଟୱେଭ ମୁକାବିଲା ପାଇଁ SOP ପ୍ରସ୍ତୁତ କରିଛି ରାଜସ୍ବ ବିଭାଗ । ଏନେଇ ଜିଲ୍ଲାପାଳଙ୍କ ସହ ବୈଠକ କରିଛନ୍ତି ରାଜସ୍ବ ମନ୍ତ୍ରୀ । ହିଟୱେଭ ୱାର୍ଣ୍ଣିଂ ଥିବା ସ୍ଥାନରେ ଆଶ୍ରୟ ସ୍ଥଳୀ ନିର୍ମାଣ କରିବେ ସରକାର । ଜିଲ୍ଲାପାଳଙ୍କୁ ଏଥିପାଇଁ ଅଧିକୃତ କରାଯାଇଛି । ସରକାର ଦେଇଥିବା SOP ବାହାରେ ଜିଲ୍ଲାପାଳ ନିଷ୍ପତ୍ତି ନେଇପାରିବେ । ଦିନ ୧୧ଟାରୁ ଅପରାହ୍ଣ ୩ଟା ପର୍ଯ୍ୟନ୍ତ ଯାତ୍ରୀ ଓ ମାଲ ପରିବହନ ଉପରେ ତଦାରଖ କରାଯିବ । ରାସ୍ତାରେ ଡ୍ରାଇଭରଙ୍କ ପାଇଁ ବିଶ୍ରାମ, ORS, ପିଇବା ପାଣିର ବ୍ୟବସ୍ଥା କରାଯାଇଛି । ଫୋନ୍‌ କଲ୍‌ ଆସିବାର ୨୦ ମିନିଟ ଭିତରେ ଆମ୍ବୁଲାନ୍ସ ପହଞ୍ଚିବା ପାଇଁ ବ୍ୟବସ୍ଥା ହୋଇଛି । ସ୍କୁଲ ଛୁଟି ନେଇ ଗଣ ଶିକ୍ଷା ବିଭାଗ ସହ ଆଲୋଚନା ହୋଇଛି । ଯେଉଁଠି ତାତି ବଢୁଛି ସେଠାରେ ସ୍କୁଲ ଛୁଟି ପାଇଁ ଜିଲ୍ଲାପାଳଙ୍କୁ କ୍ଷମତା ଦିଆଯାଇଛି । ଅଂଶୁଘାତ ମୃତ୍ୟୁ ପାଇଁ କ୍ଷତି ପୂରଣ ଦିଆଯାଉଛି । ରିପୋର୍ଟ ପାଇବାର ୨୪ ଘଣ୍ଟା ଭିତରେ ଟଙ୍କା ଦିଆଯିବ । ହିଟୱେଭ ଥିବା ସ୍ଥାନରେ ବିନା ଏସି ଗାଡ଼ିରେ ଯାତ୍ରୀ ପରିବହନ ବେଳେ କୌଣସି ଅଘଟଣ ହେଲେ ଗାଡ଼ି ମାଲିକ ଦାୟୀ ରହିବେ ।

ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ଆସନ୍ତା ୨୨ ଯାଏଁ ତତଲା କଡ଼େଇରେ ଭାଜି ହେବ ସାରା ଓଡ଼ିଶା । ତେବେ ଉତ୍ତର ଓଡ଼ିଶା ଓ ଉପକୂଳ ଓଡ଼ିଶା ଉପରେ ଏକ ଘୂର୍ଣ୍ଣିବଳୟ ରହିଛି । ଯଦି ଏହାର ପ୍ରଭାବରେ ବର୍ଷା ହୁଏ ତେବେ ଅସହ୍ୟ ଗରମରେ ତ୍ରାହି ତ୍ରାହି ଡାକୁଥିବା ରାଜ୍ୟବାସୀଙ୍କୁ ଟିକିଏ ଆଶ୍ବସ୍ତ ହେବେ ।