Odisha Flood Alert / ଅବପାତ ପ୍ରଭାବରେ ଉତ୍ତର ଓଡ଼ିଶାରେ ପ୍ରବଳ ବର୍ଷା, ପୁଣି ବଢ଼ିଲା ବନ୍ୟା ଚିନ୍ତା

ଉତ୍ତର ଓଡ଼ିଶାରେ ଅବପାତ ପ୍ରଭାବରେ ପ୍ରବଳ ବର୍ଷା ଯୋଗୁ ପୁଣି ବଢ଼ିଲା ବନ୍ୟା ଚିନ୍ତା । ମୟୂରଭଞ୍ଜ, ବାଲେଶ୍ୱର, କେନ୍ଦୁଝରରେ ପ୍ରବଳ ବର୍ଷା ହେଉଛି । ତେବେ ବଡ଼ ବନ୍ୟା ହେବନି ବୋଲି କହିଛନ୍ତି ଜଳସଂପଦ ବିଭାଗ ସର୍ବୋଚ୍ଚ ଯନ୍ତ୍ରୀ । ସାଳନ୍ଦୀ ଓ ବୈତରଣୀରେ ପାଣି ବଢ଼ିଲେ ଜଳବନ୍ଦୀ ସମସ୍ୟା ସୃଷ୍ଟି ହେବ । ବୈତରଣୀ ଆଖୁଆପଦାରେ ବଢ଼ି ବିପଦ ସଂକେତ ଟପିବ ବୋଲି ଆକଳନ କରାଯାଇଛି । ଯାଜପୁର ଜିଲ୍ଲାର ଦଶରଥପୁରରେ ଜଳବନ୍ଦୀ ସମସ୍ୟା ରହିବ । କିନ୍ତୁ ଅଧିକ କ୍ଷତି ହେବନି ବୋଲି ଜଳ ସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀ କହିଛନ୍ତି ।

ସେହିପରି ସେ ଆହୁରି କହିଛନ୍ତି, ସାଳନ୍ଦୀ ଉପରମୁଣ୍ଡରେ ଅଧିକ ବର୍ଷା ହୋଇଛି । ଚାନ୍ଦବାଲି, ଆରଡ଼ି ଓ ତିହିଡିରେ ଜଳ ନିଷ୍କାସନ ସମସ୍ୟା ହେଉଛି । ଆସନ୍ତାକାଲି ଯାଏଁ ସତର୍କ ରହିବାକୁ ପଡ଼ିବ । ସେହିପରି ବୁଢାବଳଙ୍ଗ ସତର୍କ ସଂକେତ ଟପିବ, ହେଲେ ବନ୍ୟା ହେବନି । ସୁବର୍ଣ୍ଣରେଖାରେ ବି ବନ୍ୟା ଆସିବା ଆଶଙ୍କା ନାହିଁ । ରେଙ୍ଗାଲି ଡ୍ୟାମରୁ ପାଣି ଦୁଇଟି ଗେଟ ଦେଇ ଯାଉଛି । IMD ଆକଳନ ଅନୁୟାୟୀ ଆସନ୍ତାକାଲି ଦ୍ଵିତୀୟାର୍ଦ୍ଧରେ ବର୍ଷା କମିବ । ଦକ୍ଷିଣ ଓଡ଼ିଶାରେ ଭଲ ବର୍ଷା ହୋଇନଥିବା ସେ ସୂଚନା ଦେଇଛନ୍ତି ।

ଅଧିକ ପଢ଼ନ୍ତୁ: ପ୍ରବଳ ବର୍ଷାକୁ ଦୃଷ୍ଟିରେ ରଖି ମୟୂରଭଞ୍ଜରେ ଜିଲ୍ଲାର ସମସ୍ତ ସ୍କୁଲ ଛୁଟି

ସେପଟେ ପଶ୍ଚିମବଙ୍ଗ ଉପକୂଳରେ ସୃଷ୍ଟି ହେଲା ଅବପାତ । ବାରିପଦାଠାରୁ ୧୯୦ କିମି ଦୂରରେ ଅବପାତ କେନ୍ଦ୍ରୀଭୂତ ରହିଛି l ଏହା ଆଗାମୀ ୨୪ ଘଣ୍ଟା ଯାଏଁ ଉତ୍ତର ପଶ୍ଚିମ ଦିଗରେ ଗତି କରିବା ସହ ପଶ୍ଚିମବଙ୍ଗ ଦେଇ ଝାଡ଼ଖଣ୍ଡ ମୁହାଁ ହେବା ସମ୍ଭାବନା ରହିଛି ।

ଏହା ପ୍ରଭାବରେ ସାରା ରାଜ୍ୟରେ ପ୍ରବଳ ବର୍ଷା ନେଇ ଆଲର୍ଟ ଜାରି କରିଛି ପାଣିପାଗ ବିଭାଗ । ଆଗାମୀ ୨୪ ଘଣ୍ଟା ପର୍ଯ୍ୟନ୍ତ ପ୍ରବଳରୁ ଅତି ପ୍ରବଳ ଓ ଅତ୍ୟନ୍ତ ପ୍ରବଳ ବର୍ଷାକୁ ନେଇ କେନ୍ଦୁଝର ଜିଲ୍ଲାକୁ ରେଡ୍ ଆଲର୍ଟ ଜାରି ହୋଇଛି । ଯାଜପୁର, କଟକ, ଢେଙ୍କାନାଳ, ଅନୁଗୁଳ, ଦେବଗଡ଼, ସମ୍ବଲପୁର, ଝାରସୁଗୁଡ଼ା, ବାଲେଶ୍ୱର ଓ ମୟୂରଭଞ୍ଜରେ ପ୍ରବଳରୁ ଅତି ପ୍ରବଳ ବର୍ଷାକୁ ନେଇ ଅରେଞ୍ଜ ୱର୍ଣ୍ଣିଂ ଜାରି କରିଛି ବିଭାଗ ।

ସେହିପରି ଅନ୍ୟ ଜିଲ୍ଲାଗୁଡ଼ିକୁ ବିଜୁଳି ଘଡ଼ଘଡ଼ି ସହ ୩୦ରୁ ୪୦ କିମି ବେଗରେ ଝଟକା ପବନ ବହିବାର ସମ୍ଭାବନାକୁ ନେଇ ୟେଲୋ ୱର୍ଣ୍ଣିଂ ଜାରି କରିଛି ବିଭାଗ ।