Odisha Cyclone Alert / ଅକ୍ଟୋବର ନୁହେଁ, ସେପ୍ଟେମ୍ବରରେ ଆସିପାରେ ବାତ୍ୟା, ଭୟ ବଢ଼ାଇଲା ପାଣିପାଗ ବିଜ୍ଞାନୀଙ୍କ ଆକଳନ

ଅକ୍ଟୋବର ନ ଆସୁଣୁ ଘାରିଲାଣି ବାତ୍ୟା ଭୟ । ସାଧାରଣତଃ ଅକ୍ଟୋବରରେ ଓଡ଼ିଶାରେ ଅଧିକ ବାତ୍ୟା ଭୟ ରହୁଥିବା ବେଳେ ଏ ବର୍ଷ ସେପ୍ଟେମ୍ବର ମାସରେ ବାତ୍ୟା ଆସିବା ନେଇ ଆଶଙ୍କା ଦେଖାଦେଇଛି । ଆମେରିକାର ନ୍ୟାସନାଲ ହରିକେନ୍ ସେଣ୍ଟର, ୟୁରୋପର ଇସିଏମ୍‌ଡବ୍ଲୁଏଫ୍‌ (ECMWF) ଏବଂ WINDY.COM ର ପୂର୍ବାନୁମାନ ବଢାଇଛି ଚିନ୍ତା । ଏଥିସହ ପାଣିପାଗ ବିଜ୍ଞାନୀଙ୍କ ଆକଳନ ପୁଣି ଭୟ ବଢାଇଛି । ଆଗାମୀ ୪୮ରୁ ୭୨ ଘଣ୍ଟା ଓଡ଼ିଶା ପାଇଁ ଅତ୍ୟନ୍ତ ଗୁରୁତ୍ବପୂର୍ଣ୍ଣ ରହିଛି ।
ଅକ୍ଟୋବର ମାସରେ ଓଡିଶାରେ ସାଧାରଣତଃ ବାତ୍ୟା ଆଶଙ୍କା ରହିଥିବା ବେଳେ ଏବର୍ଷ ସେପ୍ଟେମ୍ବର ମାସରେ ବାତ୍ୟା ଆଶଙ୍କା ରହିଛି । ଆମେରିକାର ନ୍ୟାସନାଲ ହରିକେନ୍ ସେଣ୍ଟର ମଡେଲ ଓ ୟୁରୋପର ଇସିଏମ୍‌ଡବ୍ଲୁଏଫ୍‌ ମଡେଲ୍‌ ବାତ୍ୟା ହେବା ନେଇ ପୂର୍ବାନୁମାନ କରିଛନ୍ତି । WINDY.COM ପକ୍ଷରୁ ମଧ୍ୟରୁ ମଧ୍ୟ ବାତ୍ୟାର ଆଶଙ୍କା ଥିବା ଆକଳନ ହୋଇଛି । କିନ୍ତୁ ଏହାର ପ୍ରକୋପ କ'ଣ ରହିବ, ତୀବ୍ରତା ଓ କେଉଁ ଦିଗରେ ଗତି କରିବ ତାହା ସ୍ପଷ୍ଟ ହୋଇନାହିଁ ।

ସେପଟେ ପାଣିପାଗ ବିଜ୍ଞାନୀ ସୁରେନ୍ଦ୍ର ନାଥ ପଶୁପାଳକଙ୍କ ଆକଳନ ଅନୁସାରେ ୧୯ କିମ୍ବା ୨୦ ତାରିଖ ବେଳକୁ କେନ୍ଦ୍ରୀୟ ବଙ୍ଗୋପସାଗରରେ ଘୂର୍ଣ୍ଣିବଳୟ ସୃଷ୍ଟି ହୋଇପାରେ । ୨୨ ରୁ ୨୪ ସେପ୍ଟେମ୍ବରରେ ଅବପାତ, ୨୩ ରୁ ୨୫ ସେପ୍ଟେମ୍ବର ମଧ୍ୟରେ ପରିବେଶ ଅନୁକୂଳ ରହିଲେ ଗଭୀର ଅବପାତ, ୨୪ରୁ ୨୬ ସେପ୍ଟେମ୍ବର ସମୟରେ ସିଷ୍ଟମ୍ ଉତ୍ତର କିମ୍ବା ଉତ୍ତର-ପଶ୍ଚିମ ବଙ୍ଗୋପସାଗରକୁ ପହଞ୍ଚିବା ବେଳେ ଅଧିକ ଶକ୍ତିଶାଳୀ ହେବାର କିଛି ମଡେଲ ଆକଳନ କରୁଛନ୍ତି । ତେଣୁ ବାତ୍ୟା ଆଶଙ୍କାକୁ ଏଡ଼ାଇ ଦିଆଯାଇପାରିବ ନାହିଁ ବୋଲି ସେ କହିଛନ୍ତି । ଏହା ଓଡ଼ିଶା ଓ ଆନ୍ଧ୍ରପ୍ରଦେଶ ଉପକୂଳ ଦେଇ ଅତିକ୍ରମ କରିବା ଆଶଙ୍କା ରହିଛି ।

ସେପଟେ ସେପ୍ଟମ୍ବର ୨୦ରୁ ରାଜ୍ୟରେ ଅତ୍ୟନ୍ତ ପ୍ରବଳ ବର୍ଷାର ସମ୍ଭାବନା ରହିଛି ବୋଲି ପାଣିପାଗ ବିଜ୍ଞାନୀ ଶରତ ସାହୁ କହିଛନ୍ତି । ୧୮ରୁ ୧୯ ତାରିଖ ବେଳକୁ ଏକ ଘୂର୍ଣ୍ଣିବଳୟ ଦକ୍ଷିଣ ଚୀନ୍‌ ସାଗରରୁ ଅବଶିଷ୍ଟାଂଶ ଭାବେ ପ୍ରବେଶ କରିବାର ସମ୍ଭାବନା ରହିଛି । ଯାହା ପ୍ରଭାବରେ ସେପ୍ଟେମ୍ବର ୨୦ ତାରିଖ ବେଳକୁ ଉତ୍ତର ଆଣ୍ଡାମାନ ସାଗର ଏବଂ ପାର୍ଶ୍ବବର୍ତ୍ତୀ ଅଞ୍ଚଳରେ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି । ଯାହା ପରବର୍ତ୍ତୀ ସମୟରେ ଆହୁରି ଘନୀଭୂତ ହୋଇ ଗଭୀର ଅବପାତ କିମ୍ବା ବାତ୍ୟାର ରୂପ ନେଇପାରେ ବୋଲି ସୂଚନା ଦେଇଛନ୍ତି ପାଣିପାଗ ବିଜ୍ଞାନୀ ଶରତ ଚନ୍ଦ୍ର ସାହୁ । ଆସନ୍ତା ୨୦ ବେଳକୁ ଚିତ୍ର ସ୍ପଷ୍ଟ ହେବ ବୋଲି ସେ କହିଛନ୍ତି । ୨୪ରୁ ୨୭ ସେପ୍ଟେମ୍ବର ମଧ୍ୟରେ ବର୍ଷା ଅଧିକ ହେବାର ସମ୍ଭାବନା ରହିବ । ତେଣୁ ଆଗାମୀ ୪୮ ରୁ ୭୨ ଘଣ୍ଟା ଓଡ଼ିଶା ପାଇଁ ବିଶେଷ ଗୁରୁତ୍ୱପୂର୍ଣ୍ଣ ରହିବ ।

ସେପଟେ ଦେଶର ବିଭିନ୍ନ ସ୍ଥାନରେ ମୌସୁମୀ ବାୟୁପ୍ରବାହ ଦୁର୍ବଳ ରହିଛି । ଚଳିତବର୍ଷ ଓଡ଼ିଶାରେ ମୌସୁମୀ ଋତୁରେ ୧୧ଟି ଲଘୁଚାପ ସୃଷ୍ଟି ହୋଇଥିଲେ ମଧ୍ୟ ଭୀଷଣ ଅବପାତର ରୂପ ନେଇ ନାହିଁ । କିନ୍ତୁ ରାଜ୍ୟରେ ଏଥର ସ୍ୱାଭାବିକଠୁ ଅଧିକ ବର୍ଷା ରେକର୍ଡ କରାଯାଇଛି । ଓଡ଼ିଶାରେ ଅକ୍ଟୋବର ବାତ୍ୟାର ତିକ୍ତ ଅନୁଭୂତି ରହିଆସିଛି । ତେଣୁ ଏଥର ଆଗୁଆ ବାତ୍ୟା ଆଶଙ୍କା ପୁଣିଥରେ ଛନକା ଭରିଛି ।