ଗ୍ରୀଷ୍ମ ପ୍ରବାହରେ କଲବଲ ହେଉଛି ସାରା ଓଡ଼ିଶା । ପଶ୍ଚିମରୁ ଉପକୂଳ, ସବୁଠି ସମାନ ସ୍ଥିତି । ସକାଳ ୭ଟା ବାଜିଲେ ହିଁ ସହର ଗୁଡ଼ିକରେ ତାତି ଅସହ୍ୟ ହୋଇପଡ଼ୁଛି, ଯାହାଫଳରେ ଘରୁ ବାହାରିବା ମଧ୍ୟ ମୁସ୍କିଲ ହୋଇଯାଇଛି । ଅସହ୍ୟ ଖରା ସାଙ୍ଗକୁ ଗୁଳୁଗୁଳି ଜନଜୀବନକୁ ଅସ୍ତବ୍ୟସ୍ତ କରିଦେଇଛି । ଦକ୍ଷିଣ-ପଶ୍ଚିମ ଦିଗରୁ ପବନ ପ୍ରବାହିତ ହେଉଥିବାରୁ ତାତିର ପ୍ରକୋପ ଏଭଳି ଭାବେ ଅନୁଭୂତ ହେଉଛି । ଆଗକୁ ତାପମାତ୍ରା ଆହୁରି ବଢିବା ସହିତ କାଳବୈଶାଖୀର ମଧ୍ୟ ସମ୍ଭାବନା ଥିବା ଭୁବନେଶ୍ଵର ଆଞ୍ଚଳିକ ପାଣିପାଗ ବିଭାଗ ପକ୍ଷରୁ କୁହାଯାଇଛି ।

• ଆଗକୁ ଅସମ୍ଭାଳ ତାତି

ରାଜ୍ୟରେ ଆସନ୍ତା ୩ ଦିନରେ ବଢ଼ିବ ୩ ଡିଗ୍ରି ସେଲସିୟସ । ୪୫ ଡିଗ୍ରୀ ମୁହାଁ ହେବ ପାରଦ । ବର୍ତ୍ତମାନ ରାଜ୍ୟରେ ପ୍ରଚଣ୍ଡ ଖରା, ଭୀଷଣ ଗରମ ଓ ଅସହ୍ୟ ଗୁଳୁଗୁଳି କିଛି ଦିନର ବ୍ୟବଧାନ ପରେ ପୁଣି ରାଜ୍ୟକୁ ଫେରିଥିବା ବେଳେ, ଆଗକୁ ଆହୁରି ଉପରମୁହାଁ ହେବ ପାରଦ । କାହିଁକି ନା ରାଜ୍ୟକୁ ଉତ୍ତର ଦିଗରୁ ଶୁଷ୍କ ବାୟୁ ପ୍ରବାହିତ ହେଉଥିବାରୁ ଜଳୀୟବାଷ୍ପ ମାତ୍ରା ହ୍ରାସ ପାଇଛି । କାଳବୈଶାଖୀ ପ୍ରଭାବ କମ୍‌ ରହିବା ଫଳରେ ତାପମାତ୍ରା ବଢ଼ୁଛି । ଗତକାଲି ୧୭ ସହରରେ ତାପମାତ୍ରା ୪୦ ଡ଼ିଗ୍ରୀ ଛୁଇଁଥିବା ବେଳେ ୪୩.୪°C ସହ ଝାରସୁଗୁଡା ରାଜ୍ୟର ଉତ୍ତପ୍ତ ସହର ପାଲଟିଥିଲା । ଏପଟେ କଟକ ୩୯.୬°C ଓ ଭୁବନେଶ୍ୱର ୩୯°C ରେକର୍ଡ କରାଯାଇଥିଲା ।

• ତାତି ଭିତରେ ଆସନ୍ତା ୭ଦିନ କାଳବୈଶାଖୀ

ପାଣିପାଗ ବିଭାଗର ସୂଚନା ଅନୁଯାୟୀ, ଆସନ୍ତା ୨ ଦିନ ମଧ୍ୟରେ ରାଜ୍ୟର ତାପମାତ୍ରା ଆହୁରି ବଢ଼ିବାର ସମ୍ଭାବନା ରହିଛି । ତାତି ଭିତରେ ରାଜ୍ୟରେ ଆସନ୍ତା ୭ ଦିନ ପର୍ଯ୍ୟନ୍ତ କାଳବୈଶାଖୀର ପ୍ରଭାବ ଜାରି ରହିବ । ଆସନ୍ତା ୨୪ ଘଣ୍ଟା ମଧ୍ୟରେ ୧୩ଟି ଜିଲ୍ଲାରେ ବିଜୁଳି ଘଡ଼ଘଡ଼ି ସହ ୪୦ରୁ ୫୦ କିମି ବେଗରେ ପବନ ବହିବା ସମ୍ଭାବନା ରହିଛି, ଏଥିପାଇଁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ସେପଟେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଆଗକୁ ଅଗ୍ରସର ହୋଇଛି । ଏହା ଆରବ ସାଗରର କିଛି ଅଧିକ ଅଞ୍ଚଳ, ସମଗ୍ର ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜ ଏବଂ ବଙ୍ଗୋପସାଗରର ଆହୁରି କିଛି ଅଞ୍ଚଳକୁ ସ୍ପର୍ଶ କରିଛି ।

• ଗତକାଲି ରାଜ୍ୟରେ କାଳବୈଶାଖୀର ତାଣ୍ଡବ

ସେପଟେ ଗତକାଲି ରାଜ୍ୟରେ ବିଭିନ୍ନ ସ୍ଥାନରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଛି । କରଞ୍ଜିଆରେ ୫୩ ନମ୍ବର ରାଜ୍ୟ ରାଜପଥରେ ଉପୁଡ଼ି ପଡ଼ିଛି ଗଛ । ବାଲେଶ୍ୱରରେ ବି କାଳବୈଶାଖୀ ପ୍ରଭାବରେ ହଠାତ୍ ମାଡ଼ିଆସିଥିଲା ପ୍ରଳୟଙ୍କରୀ ଘୂର୍ଣ୍ଣିଝଡ । ଅନେକ ସ୍ଥାନରେ ଗଛ ମଧ୍ୟ ଭାଙ୍ଗିପଡ଼ିଥିଲା । ଆସନ୍ତା ୨୪ ତାରିଖ ଯାଏଁ କାଳବୈଶାଖୀ ପାଇଁ ୟେଲୋ ୱାର୍ଣ୍ଣିଂ ଜାରି କରାଯାଇଛି । ଆସନ୍ତା ୨୪ ଘଣ୍ଟା ପାଇଁ ୧୩ ଜିଲ୍ଲାକୁ ବିଜୁଳି-ଘଡ଼ଘଡ଼ି -ପବନ ନେଇ ପାଣିପାଗ ବିଭାଗର ସତର୍କତା ଜାରି କରାଯାଇଛି ।

ପଢନ୍ତୁ ଏହି ଖବର: ଆସିପାରେ ସୁପର ଏଲ୍‌ ନିନୋ, ଦେଖା ଦେଇପାରେ ମରୁଡ଼ି ସ୍ଥିତି

ସେହିପରି ମୟୂରଭଞ୍ଜର କରଞ୍ଜିଆ ଅଞ୍ଚଳରେ ବି କାଳବୈଶାଖୀର ପ୍ରଳୟ । ସନ୍ଧ୍ୟାରେ ଆସିଥିବା ଝଡ଼ବର୍ଷା ଯୋଗୁଁ ୫୩ ନମ୍ବର ରାଜ୍ୟ ରାଜପଥର ରସମତଳାରୁ ମଣ୍ଡୁଆ ପର୍ଯ୍ୟନ୍ତ ବହୁ ସଂଖ୍ୟାରେ ଗଛ ଭାଙ୍ଗି ରାସ୍ତା ଉପରେ ପଡ଼ିଛି । କେତେକ ସ୍ଥାନରେ ଚଳନ୍ତି ବାଇକ୍ ଓ ସାଇକେଲ୍ ଉପରେ ମଧ୍ୟ ଗଛ ଢଳି ପଡ଼ିଥିବା ସୂଚନା ମିଳିଛି । ଏହି କାରଣରୁ କରଞ୍ଜିଆ-ଠାକୁରମୁଣ୍ଡା ରାସ୍ତାର ଉଭୟ ପାର୍ଶ୍ୱ ସମ୍ପୂର୍ଣ୍ଣ ଅବରୋଧ ହୋଇଯାଇଛି ଏବଂ ଶତାଧିକ ଗାଡ଼ିମଟର ଅଟକି ରହିଛି ।