Possible Cyclone / ଆନ୍ଧ୍ର ଉପକୂଳ ନା ଦକ୍ଷିଣ ଓଡ଼ିଶା, କୁଆଡେ ମୁହାଁଇବ ସମ୍ଭାବ୍ୟ ବାତ୍ୟା ?

ଅନ୍ତର୍ଜାତୀୟ ପାଣିପାଗ ମଡେଲର ଆକଳନ ଅନୁସାରେ, ବର୍ତ୍ତମାନ ଆଣ୍ଡାମାନ ଉପସାଗରକୁ ପ୍ରବେଶ କରିସାରିଥିବା ଘୂର୍ଣ୍ଣିବଳୟଟି ଅଧିକ ଘନୀଭୂତ ହୋଇ ବାତ୍ୟାର ରୂପ ନେବା ସହ ଏହାର ଗତି ଉପକୂଳ ଆନ୍ଧ୍ରପ୍ରଦେଶ ଏବଂ ଦକ୍ଷିଣ ଓଡ଼ିଆ ଆଡକୁ ରହିପାରେ । ଯଦିଓ ଦେଶର ସଵୁଠାରୁ ନିର୍ଭରଯୋଗ୍ୟ ପାଣିପାଗ ସଂସ୍ଥା- IMD ଏନେଇ କୌଣସି ପୂର୍ବାନୁମାନ କରିନାହିଁ, କିନ୍ତୁ ଆମେରିକାର GFS ଓ ୟୁରୋପର ECMWF ଭଳି ବିଶ୍ୱସ୍ତରୀୟ ପାଣିପାଗ ମଡେଲର କେତେକ ପୂର୍ବାନୁମାନ ଅନୁଯାୟୀ, ଅବପାତ କିମ୍ବା ବାତ୍ୟାର ରୂପ ନେଇପାରେ ଲଘୁଚାପ କ୍ଷେତ୍ର । ଏପରିକି ଭାରତର ପୂର୍ବ ଉପକୂଳ ଆଡ଼କୁ ଏହାର ସମ୍ଭାବ୍ୟ ଗତିପଥକୁ ନେଇ ମଧ୍ୟ ଆକଳନ କରାଯାଇଛି ।

ଥାଇଲାଣ୍ଡ ଉପସାଗର ଓ ପାର୍ଶ୍ୱବର୍ତ୍ତୀ ଅଞ୍ଚଳରେ ସକ୍ରିୟ ଥିବା ଘୂର୍ଣ୍ଣିବଳୟ ଆଜି ଆଣ୍ଡାମାନ ସାଗରରେ ପ୍ରବେଶ କରିଥିବାବେଳେ ଏହା କ୍ରମଶଃ ଘନୀଭୂତ ହୋଇ ବାତ୍ୟାର ରୂପ ନେଇପାରେ ବୋଲି ଆକଳନ କରାଯାଇଛି । ଥାଇଲାଣ୍ଡ ଓ ମିଆଁମାର ଅଞ୍ଚଳରେ ସକ୍ରିୟ ଥିବା ଘୂର୍ଣ୍ଣିବଳୟ ବର୍ତ୍ତମାନ ଉତ୍ତର-ଆଣ୍ଡାମାନ ସାଗରକୁ ପ୍ରବେଶ କରିସାରିଛି । ପରେ ଏହା ପଶ୍ଚିମ, ଉତ୍ତର-ପଶ୍ଚିମ ଦିଗକୁ ଗତି କରି ବଙ୍ଗୋପ ସାଗରରେ ପ୍ରବେଶ କରିବା ସମ୍ଭାବନା ରହିଛି । ୨୩ ତାରିଖ ବେଳକୁ ଦକ୍ଷିଣ-ପୂର୍ବ ଓ ସଂଲଗ୍ନ ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ଲଘୁଚାପ କ୍ଷେତ୍ର ସୃଷ୍ଟି ହୋଇପାରେ । ୨୪ ସୁଦ୍ଧା ଅବପାତ ଓ ୨୬ ବେଳକୁ କେନ୍ଦ୍ରୀୟ ବଙ୍ଗୋପସାଗରରେ ବାତ୍ୟାର ରୂପ ନେବ ବୋଲି ଆନ୍ତର୍ଜାତୀୟ ମଡେଲର ଆକଳନ ।

କିନ୍ତୁ ଭାରତୀୟ ପାଣିପାଗ ବିଭାଗର ଆକନ ଅନୁଯାୟୀ, ଓଡ଼ିଶା ପାଇଁ ବର୍ତ୍ତମାନ କୌଣସି ବିପଦ ନାହିଁ ଏବଂ ସେଥିପାଇଁ କୌଣସି ସତର୍କ ସୂଚନା ଜାରି କରାଯାଇନାହିଁ । କିନ୍ତୁ ଅକ୍ଟୋବର ୨୬ ଓ ୨୭ ତାରିଖ ବେଳକୁ ଉପକୂଳ ଏବଂ ସଂଲଗ୍ନ ଜିଲ୍ଲାଗୁଡ଼ିକରେ କାଳବୈଶାଖୀ ସହ ବଜ୍ରପାତ ଏବଂ ଘଣ୍ଟାପ୍ରତି ୩୦-୪୦ କିମି ବେଗରେ ଝଡ଼ତୋଫାନ ବହିବାର ସମ୍ଭାବନା ଥିବାରୁ ୟେଲୋ ଆଲର୍ଟ ଜାରି କରାଯାଇଛି । ସେହିପରି ପାଣିପାଗ ବିଜ୍ଞାନୀ ଶରତ ଚନ୍ଦ୍ର ସାହୁ କହିଛନ୍ତି ସମ୍ଭାବ୍ୟ ବାତ୍ୟା ନେଇ ଆଗାମୀ ୨୫ ତାରିଖ ପରେ ଅଧିକ ସ୍ପଷ୍ଟ ହୋଇପାରିବ । ବାତ୍ୟା ଆନ୍ଧ୍ର କିମ୍ବା ଓଡ଼ିଶା ଉପକୂଳ ଛୁଇଁବାର ସମ୍ଭାବନା ଅଛି କି ନାହିଁ ତାହା ଲଘୁଚାପ କ୍ଷେତ୍ର ସୃଷ୍ଟି ହେବା ପରେ ତା'ର ଗତି ଓ ପ୍ରକୃତିକୁ ଦେଖି କହିହେବ ।

ଆଗାମୀ ୬ ରୁ ୭ ଦିନ ପର୍ଯ୍ୟନ୍ତ ଓଡ଼ିଶାର ବିଭିନ୍ନ ଜିଲ୍ଲାରେ ଦିନ ଓ ରାତିର ତାପମାତ୍ରାରେ କୌଣସି ବଡ଼ଧରଣର ପରିବର୍ତ୍ତନ ହେବାର ସମ୍ଭାବନା ନାହିଁ । ତଥାପି ଓଡ଼ିଶାରେ ଅକ୍ଟୋବର ବାତ୍ୟାର ପୂର୍ବ ଅନୁଭୂତି ଭୟ ଓ ଆଶଙ୍କା ବଢ଼ାଇ ଦେଇଛି ।