ଶ୍ରୀଲଙ୍କାର ତାଣ୍ଡବ ରଚିବା ପରେ ଭାରତ ମୁହାଁ ବାତ୍ୟା ଡିଟୱା । ଦକ୍ଷିଣ ଭାରତର ବିଭିନ୍ନ ରାଜ୍ୟରେ ପ୍ରବଳ ବର୍ଷା ସାଙ୍ଗକୁ ଝଡ଼ ତୋଫାନ । ବାତ୍ୟା ଉତ୍ତର ତାମିଲନାଡୁ, ପୁଡୁଚେରୀ, ଆନ୍ଧ୍ରପ୍ରଦେଶ ଆଡକୁ ମୁହାଁଇଛି । ଆସନ୍ତା ୨ ଦିନ ଧରି ତାମିଲନାଡୁ, ଆନ୍ଧ୍ର ଏବଂ ପୁଡୁଚେରୀରେ ପ୍ରବଳ ବର୍ଷା ସମ୍ଭାବନା ରହିଛି ।

ଶ୍ରୀଲଙ୍କା ପରେ ଭାରତ ମୁହାଁ ବାତ୍ୟା ଡିଟଓ୍ବା । ବାତ୍ୟା ସ୍ଥଳଭାଗ ଛୁଇଁବା ସମୟରେ ତାମିଲନାଡୁରେ ୧୦୦ କିଲୋମିଟର ବେଗରେ ପବନ ବହିପାରେ । ଶ୍ରୀଲଙ୍କା ଏବଂ ଦକ୍ଷିଣ-ପଶ୍ଚିମ ବଙ୍ଗୋପସାଗର ଉପରେ ସୃଷ୍ଟି ହୋଇଥିବା ଘୂର୍ଣ୍ଣିଝଡ଼ ଡିଟୱା ଯୋଗୁ ଦକ୍ଷିଣ ଭାରତରେ ଜାରି ରହିଛି ପ୍ରବଳ ବର୍ଷା । ଆଇଏମଡି ଅନୁସାରେ ଆଜି ଓ ଆସନ୍ତାକାଲି ଆନ୍ଧ୍ରପ୍ରଦେଶ, ୟାନମ୍ ଏବଂ ରାୟଲସୀମାରେ ଡିସେମ୍ବର ୨ ପର୍ଯ୍ୟନ୍ତ ପ୍ରବଳରୁ ଅତି ପ୍ରବଳ ବର୍ଷା ହେବ । ଉତ୍ତର ତାମିଲନାଡୁ ଏବଂ ପୁଡୁଚେରୀର ଉପକୂଳବର୍ତ୍ତୀ ଅଞ୍ଚଳରେ ୭୦ରୁ ୮୦ କିଲୋମିଟର ବେଗରେ ପବନ ବହିବ । ଏଥିପାଇଁ ସମସ୍ତ ପ୍ରକାର ଉଦ୍ଧାର ଓ ସହାୟତା କାର୍ଯ୍ୟ ଜାରି ରଖିଛି ଏନଡିଆରଏଫ ଓ ଏସଡିଆରଏଫ ଟିମ୍ । ଏଥିସହ ସେନା ମଧ୍ୟ ବାତ୍ୟା ସ୍ଥିତି ଉପରେ ତୀକ୍ଷ୍ମଣ ନଜର ରଖିଛି ।

ଅଧିକ ପଢ଼ନ୍ତୁ: ଭାରତ ମୁହାଁ ପ୍ରଳୟଙ୍କାରୀ ବାତ୍ୟା ‘ଦିତୱା’, ଶ୍ରୀଲଙ୍କାରେ ରଚିଛି ତାଣ୍ଡବ

ଶ୍ରୀଲଙ୍କାରେ ବାତ୍ୟା ଡିଟୱାରେ ୧୫୦ରୁ ଅଧିକ ଜଣଙ୍କର ମୃତ୍ୟୁ ହୋଇଛି । ୨୦ ହଜାରରୁ ଊର୍ଦ୍ଧ୍ୱ ଘର ଭାଙ୍ଗିଥିବା ବେଳେ ୭୮ ହଜାର ଲୋକ ଆଶ୍ରୟ ସ୍ଥଳରେ ରହିଛନ୍ତି । ଏପରି ସ୍ଥିତିରେ ଭାରତ ଅପରେସନ ସାଗର ବନ୍ଧୁ ଜରିଆରେ ଦୁଇଟି ବିମାନରେ ଶ୍ରୀଲଙ୍କାକୁ ରିଲିଫ୍ ସାମଗ୍ରୀ ପଠାଇଛି । ପୂର୍ବରୁ କଲୋମ୍ବୋରେ ଥିବା ଏକ ଭାରତୀୟ ଯୁଦ୍ଧପୋତ ମଧ୍ୟ ପୀଡ଼ିତଙ୍କ ସହାୟତା ପାଇଁ ନିଜର ରାସନ ଦାନ କରିଛି । ଏହା ସହିତ ଭାରତୀୟ ବାୟୁ ସେନା ପକ୍ଷରୁ ବିଭିନ୍ନ ସ୍ଥାନରେ ଫସି ରହିଥିବା ଲୋକଙ୍କୁ ଉଦ୍ଧାର କରାଯାଉଛି । ଶ୍ରୀଲଙ୍କାର ବାତ୍ୟା ପ୍ରଭାବିତ ଅଞ୍ଚଳର ଲୋକମାନଙ୍କ ସହାୟତା ପାଇଁ ଭାରତୀୟ ବାୟୁସେନା ୨୧ ଟନ୍‌ ରିଲିଫ୍‌ ସାମଗ୍ରୀ ପଠାଇଛି । ଏଥିସହିତ ଉଦ୍ଧାର କାର୍ଯ୍ୟରେ ସହାୟତା ନିମନ୍ତେ ଭାରତ ୮୦ ଜଣ ଏନ୍‌ଡିଆର୍‌ଏଫ୍‌ କର୍ମଚାରୀ ଏବଂ ୮ ଟନ୍‌ ଉପକରଣ ପଠାଇଛି । ଭାରତୀୟ ବାୟୁସେନାର ଗୋଟିଏ ସି-୧୩୦ ଏବଂ ଗୋଟିଏ ଆଇଏଲ୍‌-୭୬ ବିମାନକୁ ରିଲିଫ୍‌ ପଠାଇବା କାର୍ଯ୍ୟରେ ନିୟୋଜିତ କରାଯାଇଛି ।

ବାତ୍ୟା ଡିଟଓ୍ବା ପାଇଁ ତାମିଲନାଡୁ, ପୁଡୁଚେରୀ ଓ ଆନ୍ଧ୍ରପ୍ରଦେଶରେ ହାଇ ଆଲର୍ଟ ଜାରି ହୋଇଛି। ୪୭ ଉଡ଼ାଣ ରଦ୍ଦ ହେବା ସହ ଟ୍ରେନ୍ ସେବା ବାତିଲ କରାଯାଇଛି । ପରିସ୍ଥିତିକୁ ଦୃଷ୍ଟିରେ ରଖି ପାଣିପାଗ ବିଭାଗ ଆଗାମୀ କିଛି ଦିନ ପାଇଁ ଏହି ସବୁ ଅଞ୍ଚଳରେ ରେଡ୍‌ ଆଲର୍ଟ ଜାରି କରିଛି ।