Rupee record low / କାହିଁକି ଖସୁଛି ଟଙ୍କା ମୂଲ୍ୟ; କେମିତି ରୋକାଯାଇପାରିବ ? ଖୋଲିଲା ରାଜ୍

ଆମେରିକା ଡଲାର ତୁଳନାରେ ରେକର୍ଡ ତଳକୁ ଖସିଲା ଟଙ୍କା । ଆଜି ୧ ଡଲାରର ମୂଲ୍ୟ ୯୨ ଟଙ୍କା ପାର କରିଛି, ଯାହାଦ୍ବାରା ଟଙ୍କାର ମୂଲ୍ୟ ରେକର୍ଡ ସ୍ତରକୁ ଖସିଛି । ଭାରତୀୟ ମୁଦ୍ରା ଚଳିତ ବର୍ଷ ୨.୫ ପ୍ରତିଶତ ହ୍ରାସ ପାଇଛି । ତେବେ ଆମେରିକା ଫେଡେରାଲ ରିଜର୍ଭ ଏହାର ରେପୋ ହାର ହ୍ରାସକୁ ବିରତ କରିବା ପରେ ଟଙ୍କା ଦୁର୍ବଳ ହୋଇଛି । ଏହାରି ମଧ୍ୟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଲୋକସଭାରେ ଅର୍ଥନୈତିକ ସର୍ଭେ ରିପୋର୍ଟ ଉପସ୍ଥାପନ କରିଛନ୍ତି । ଏହି ରିପୋର୍ଟରେ ଟଙ୍କା ଦୁର୍ବଳ ହେବାର କାରଣ ଓ ଏହାକୁ କିପରି ରୋକାଯାଇପାରିବ ସେ ସମ୍ପର୍କରେ ଆଲୋଚନା ହୋଇଛି ।

କାହିଁକି ଦୁର୍ବଳ ହେଉଛି ଟଙ୍କା ?
ଅର୍ଥନୈତିକ ସର୍ଭେ ରିପୋର୍ଟ ଅନୁସାରେ, ଭାରତୀୟ ମୁଦ୍ରାର ମୂଲ୍ୟ ହ୍ରାସ ଭାରତର ଆର୍ଥିକ ଅବସ୍ଥା ସ୍ଥିତିକୁ ଦର୍ଶାଉନାହିଁ ବୋଲି ଅର୍ଥମନ୍ତ୍ରୀ କହିଛନ୍ତି । ଟଙ୍କା ନିଜ କ୍ଷମତାଠାରୁ କମ ପ୍ରଦର୍ଶନ କରୁଛି । କେନ୍ଦ୍ର ଅର୍ଥ ମନ୍ତ୍ରଣାଳୟର ଟିମ ଦ୍ବାରା ପ୍ରସ୍ତୁତ କରାଯାଇଥିବା ଏହି ରିପୋର୍ଟରେ କୁହାଯାଇଛି ଯେ ଭାରତୀୟ ମୁଦ୍ରା ଦୁର୍ବଳ ହେବା ଫଳରେ ଭାରତ ଉପରେ ଆମେରିକାର ବର୍ଦ୍ଧିତ ଟାରିଫର ପ୍ରଭାବ ମଧ୍ୟ ହ୍ରାସ ପାଇଛି । ଅର୍ଥାତ ଟଙ୍କା ଦୁର୍ବଳ ହେବାରେ ଆମେରିକା ଟାରିଫ ସେତେଟା କୌଣସି ଯୋଗଦାନ ନାହିଁ ।

ଅନ୍ୟପଟେ ସର୍ଭେ ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ଏଭଳି ପରିସ୍ଥିତିରେ ଟଙ୍କା ଦୁର୍ବଳ ହେବା ହାନିକାରକ ନୁହେଁ, କାରଣ ଏହାଦ୍ବାରା ଭାରତୀୟ ସାମଗ୍ରୀ ଉପରେ ବର୍ଦ୍ଧିତ ଆମେରିକା ଟାରିଫର ପ୍ରଭାବକୁ କମ କରିଥାଏ । ଏହାସହିତ ଅଶୋଧିତ ତେଲ ଆମଦାନୀର ଉଚ୍ଚା ଦର ଦ୍ବାରା ଦରଦାମ ବୃଦ୍ଧି ହେବାର କୌଣସି ବିପଦ ମଧ୍ୟ ନାହିଁ । ସର୍ଭେ ରିପୋର୍ଟରେ କୁହାଯାଇଛି ଅର୍ଥବ୍ୟବସ୍ଥାରେ ପୁଞ୍ଜି ପ୍ରବାହରେ ବାଧା ଯୋଗୁଁ ଟଙ୍କା ଦୁର୍ବଳ ହୋଇଛି ।

କେମିତି ରୋକାଯାଇପାରିବ ?
ଆଜି ଉପସ୍ଥାପିତ ହୋଇଥିବା ଅର୍ଥନୈତିକ ସର୍ଭେ ରିପୋର୍ଟରେ ଟଙ୍କାର ମୂଲ୍ୟ କିପରି ବୃଦ୍ଧି କରାଯାଇପାରିବେ ସେନେଇ ପରାମର୍ଶ ମଧ୍ୟ ଦିଆଯାଇଛି । ଏଥିରେ କୁହାଯାଇଛି ଯେ ଭାରତକୁ ଏହାର ବର୍ଦ୍ଧିତ ଆମଦାନୀ ବିଲ୍ ପୂରଣ କରିବା ପାଇଁ ପର୍ଯ୍ୟାପ୍ତ ନିବେଶକଙ୍କ ଆଗ୍ରହ ଏବଂ ବିଦେଶୀ ମୁଦ୍ରାରେ ରପ୍ତାନି ଆୟ ସୃଷ୍ଟି କରିବାକୁ ପଡ଼ିବ। 

ଗୋଟିଏ ବର୍ଷରେ ୬% ଖସିଲା ଟଙ୍କା
ଗତ ଏକ ବର୍ଷ ମଧ୍ୟରେ ଟଙ୍କାର ମୂଲ୍ୟ ୬ ପ୍ରତିଶତରୁ ଅଧିକ ହ୍ରାସ ପାଇଛି, ଯେଉଁଥିରେ ଆମଦାନୀ ହଙ୍ଗା ଓ ରପ୍ତାନି ଶସ୍ତା ହୋଇଯାଇଛି । ଏହିପରି ଭାବରେ ଭାରତୀୟ ଅର୍ଥବ୍ୟବସ୍ଥା ଲାଗି ପ୍ରତିଯୋଗିତା ବୃଦ୍ଧି ପାଇଛି । ଏହି ସର୍ଭେରେ ସ୍ବଦେଶୀ ପ୍ରୟାସ ସହିତ ରପ୍ତାନି ଉପରେ ଅଧିକ ଧ୍ୟାନ ଦେବାର ଆବଶ୍ୟକତା ରହିଛି ।

ଏଥିସହ ପଢନ୍ତୁ: ଅର୍ଥନୈତିକ ସର୍ବେକ୍ଷଣ ରିପୋର୍ଟ ଆଗତ; ଜିଡିପି ଅଭିବୃଦ୍ଧି ୭.୨% ରହିବା ଆକଳନ