Argus News - ସମୁଦ୍ର ଭିତରେ ତେଲ ଟାଙ୍କି ଉପରେ ବଡ଼ ଆକ୍ରମଣ; ଜଣେ ଭାରତୀୟ ମୃତ

ମଧ୍ୟପ୍ରାଚ୍ୟ ଦେଶ ଓମାନ ଉପକୂଳରେ ଏକ ତେଲ ଟ୍ୟାଙ୍କର ଉପରେ ବଡ଼ ଧରଣର ଆକ୍ରମଣ ହୋଇଛି । ଏଥିରେ ଜଣେ ଭାରତୀୟ ନାଗରିକଙ୍କ ମୃତ୍ୟୁ ଘଟିଛି । ଆକ୍ରମଣ ପଛରେ ପ୍ରକୃତ ଷଡ଼ଯନ୍ତ୍ରକାରୀ ଦେଶ କିଏ ତାହା ସ୍ପଷ୍ଟ ହୋଇନାହିଁ । ଆକ୍ରମଣ ଏତେ ଜୋରରେ ହୋଇଥିଲା ଯେ ଜାହାଜର ଇଞ୍ଜିନ ବଗିରେ ସଙ୍ଗେ ସଙ୍ଗେ ନିଆଁ ଲାଗିଯାଇଥିଲା । ଏହାପରେ ମଝି ସମୁଦ୍ରର ଆକାଶ ପୁରା ଧୂଆଁମୟ ହୋଇଯାଇଥିଲା ।

ଓମାନ ଉପକୂଳରେ ଯାଉଥିବା ଏହି ଏକ ତେଲ ଟ୍ୟାଙ୍କର ଉପରେ ଡ୍ରୋନ୍ ଦ୍ଵାରା ଆକ୍ରମଣ କରାଯାଇଥିଲା । ଏଥିରେ ଜଣେ ଭାରତୀୟ କ୍ରୁ ସଦସ୍ୟଙ୍କ ମୃତ୍ୟୁ ହୋଇଥିବାବେଳେ ଏଥିରେ ଥିବା ଅନ୍ୟ ସମସ୍ତଙ୍କୁ ସୁରକ୍ଷିତ ଭାବରେ ଉଦ୍ଧାର କରାଯାଇଥିଲା । ଆଜି ସୋମବାର (୨ ମାର୍ଚ୍ଚ) ଅଧିକାରୀମାନେ ଏହି ଘଟଣାକୁ ନିଶ୍ଚିତ କରିଛନ୍ତି । ଟ୍ୟାଙ୍କରଟି ତା'ର ନିର୍ଦ୍ଧାରିତ ରାସ୍ତାରେ ଯାଉଥିବା ସମୟରେ ସମୁଦ୍ରରେ ଆକ୍ରମଣ ଘଟିଥିଲା ।

• ଆତଙ୍କୀଙ୍କ ଟାର୍ଗେଟରେ ତେଲ ଟ୍ୟାଙ୍କର

ଓମାନର ସାମୁଦ୍ରିକ ସୁରକ୍ଷା କେନ୍ଦ୍ର କହିଛି ଯେ ଘଟଣାଟି ଶନିବାର (ମାର୍ଚ୍ଚ ୧) ମସ୍କଟ ପ୍ରଦେଶର ସୁଲତାନ କାବୁସ୍ ବନ୍ଦରର ଉତ୍ତର-ପଶ୍ଚିମରେ ପ୍ରାୟ ୫୨ ନଟିକାଲ୍ ମାଇଲ୍ ଦୂରରେ ଘଟିଛି । ଆକ୍ରମଣ ଶିକାର ହୋଇଥିବା ତେଲ ଟ୍ୟାଙ୍କରର ନାମ ହେଉଛି MKD VYOM । ଏହା ପ୍ରାୟ ୫୯,୪୬୩ ମେଟ୍ରିକ୍ ଟନ୍ ମାଲ ପରିବହନ କରୁଥିଲା । ଅଧିକାରୀଙ୍କ ଅନୁଯାୟୀ, ଡ୍ରୋନ୍ ବୋଟ୍ ଭାବରେ ଜଣାଶୁଣା ଏକ ମାନବବିହୀନ ଜାହାଜ ସିଧାସଳଖ ଟ୍ୟାଙ୍କର୍ ସହିତ ଧକ୍କା ହୋଇଥିଲା । ଧକ୍କାର ଶକ୍ତି ଏତେ ଥିଲା ଯେ ଏହା ଜାହାଜର ମୁଖ୍ୟ ଇଞ୍ଜିନ୍ ରୁମ୍‌ରେ ନିଆଁ ଏବଂ ବିସ୍ଫୋରଣ ଘଟିଥିଲା ।

• ଜାହାଜରେ ଥିଲେ ମୋଟ ୨୧ ଜଣ ଲୋକ

ରିପୋର୍ଟ ଅନୁଯାୟୀ, ଆକ୍ରମଣ ସମୟରେ ଜାହାଜରେ ମୋଟ ୨୧ ଜଣ ଲୋକ ଥିଲେ । ଏଥିରେ ୧୬ ଜଣ ଭାରତୀୟ, ୪ ଜଣ ବାଂଲାଦେଶୀ ଏବଂ ଜଣେ ୟୁକ୍ରେନୀୟ ନାଗରିକ ଥିଲେ । ତେବେ ବିସ୍ଫୋରଣ ଘଟିବା ପରେ ସେହି ସମୁଦ୍ର ପଥ ଦେଇ ଯାଉଥିବା ଏକ ବାଣିଜ୍ୟ ଜାହାଜ 'MV SAND' ଉଦ୍ଧାର କାର୍ଯ୍ୟରେ ସହାୟତା କରିଥିଲା । ସାମୁଦ୍ରିକ ସୁରକ୍ଷା କେନ୍ଦ୍ର ସହିତ ସମନ୍ୱୟ ରଖି ସମସ୍ତ ବଞ୍ଚିଥିବା କ୍ରୁ ସଦସ୍ୟଙ୍କୁ ସୁରକ୍ଷିତ ଭାବରେ ସ୍ଥାନାନ୍ତର କରାଯାଇଥିବା ଜଣାପଡ଼ିଛି । ଅଧିକାରୀମାନେ କହିଛନ୍ତି ଯେ ସମସ୍ତ ଆହତ ସୁରକ୍ଷିତ ଅଛନ୍ତି ଏବଂ ସେମାନଙ୍କୁ ଆବଶ୍ୟକୀୟ ସହାୟତା ଯୋଗାଇ ଦିଆଯାଉଛି ।

• ସମୁଦ୍ର ଭିତରେ ଓମାନ ନୌସେନା

ଏହି ଘଟଣା ପରେ ରୟାଲ୍ ଓମାନ ନୌସେନା ଘଟଣାସ୍ଥଳକୁ ଏକ ଜାହାଜ ମୁତୟନ କରିଛି । ଏହାସହିତ ସମୁଦ୍ରରେ ପରିବହନ କରୁଥିବା ଅନ୍ୟ ଜାହାଜଗୁଡ଼ିକୁ ସତର୍କତା ଅବଲମ୍ବନ କରିବାକୁ ଏବଂ ପ୍ରଭାବିତ ଅଞ୍ଚଳରୁ ନିରାପଦ ଦୂରତା ବଜାୟ ରଖିବାକୁ ଚେତାବନୀ ଦିଆଯାଇଛି । ଖାଲି ସେତିକି ନୁହେଁ, ସାମୁଦ୍ରିକ ମାର୍ଗର ସୁରକ୍ଷା ସୁନିଶ୍ଚିତ କରିବା ପାଇଁ ସମସ୍ତ ଆବଶ୍ୟକୀୟ ପଦକ୍ଷେପ ନିଆଯାଉଛି ।

ଅଧିକ ଖବର ପଢନ୍ତୁ...