ଭାରତ ଉପରେ ଟାରିଫ୍ ଲାଗୁ କରିବା ପରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିଜ ଦେଶ ଭିତରେ ସମସ୍ୟା ବୃଦ୍ଧି ପାଇବାରେ ଲାଗିଛି । ପୂର୍ବତନ ଆମେରିକା ଜାତୀୟ ସୁରକ୍ଷା ପରାମର୍ଶଦାତା (NSA) ସମେତ ଅନେକ ବ୍ୟୁରୋକ୍ରାଟ ଟ୍ରମ୍ପଙ୍କୁ ଭାରତ ସହିତ ସମ୍ପର୍କକୁ କ୍ଷତି ପହଞ୍ଚାଇବା ପାଇଁ ସମାଲୋଚନା କରୁଛନ୍ତି । ତେବେ ଏହାରି ମଧ୍ୟରେ ଆମେରିକା ସାଂସଦ ଡେବୋରା ରସ୍ ଏବଂ ରୋ ଖାନ୍ନାଙ୍କ ନେତୃତ୍ୱରେ ୧୯ ଜଣ ସାଂସଦ ଆମେରିକା ରାଷ୍ଟ୍ରପତିଙ୍କୁ ଏକ ଚିଠି ଲେଖି ଭାରତ ସହିତ ସମ୍ପର୍କକୁ ତୁରନ୍ତ ସୁଧାରିବା ପାଇଁ ଅନୁରୋଧ କରିଛନ୍ତି । ସେମାନେ ଟ୍ରମ୍ପ ପ୍ରଶାସନକୁ ଭାରତ ଉପରେ ଲାଗୁ ହୋଇଥିବା ଶୁଳ୍କ ପ୍ରତ୍ୟାହାର କରିବାକୁ ମଧ୍ୟ ଦାବି କରିଛନ୍ତି।
ଏହି ସାସଦମାନେ ରାଷ୍ଟ୍ରପତି ଟ୍ରମ୍ପଙ୍କୁ ଭାରତ ସହିତ ଆମେରିକାର ତିକ୍ତ ସମ୍ପର୍କକୁ ଶୀଘ୍ର ସଜାଡ଼ିବା ଏବଂ ସରକାରଙ୍କ ଶୁଳ୍କ ବୃଦ୍ଧି ନିଷ୍ପତ୍ତିକୁ ତୁରନ୍ତ ପ୍ରତ୍ୟାହାର କରିବାକୁ ଅନୁରୋଧ କରିଛନ୍ତି ।

ଆମେରିକାର ସାଂସଦମାନେ ଅକ୍ଟୋବର ୮ ତାରିଖରେ ଏହି ଚିଠି ଲେଖି କହିଥିଲେ ଯେ ଭାରତ ଉପରେ ୫୦% ଶୁଳ୍କ ବୃଦ୍ଧି ବିଶ୍ୱର ସର୍ବବୃହତ ଗଣତନ୍ତ୍ର ଭାରତ ସହିତ ଆମେରିକାର ସମ୍ପର୍କକୁ କ୍ଷତି ପହଞ୍ଚାଇଛି ଏବଂ ଉଭୟ ଦେଶକୁ ନକାରାତ୍ମକ ଭାବରେ ପ୍ରଭାବିତ କରିଛି । ତୁରନ୍ତ ଭାରତ ସହିତ ସମ୍ପର୍କ ସଜାଡ଼ିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଅନୁରୋଧ କରିଛନ୍ତି ।

ଅଧିକ ପଢ଼ନ୍ତୁ: ଟ୍ରମ୍ପଙ୍କ ବଡ଼ ଘୋଷଣା, ଇସ୍ରାଏଲ-ଗାଜା ମଧ୍ୟରେ ପ୍ରଥମ ପର୍ଯ୍ୟାୟ ଶାନ୍ତି ଚୁକ୍ତି ସ୍ବାକ୍ଷରିତ

ତେବେ ଏହା ପ୍ରଥମ ଥର ନୁହେଁ ଏହା ପୂର୍ବରୁ ଅଗଷ୍ଟ ୨୦୨୫ରେ ଆମେରିକାର ଏହି ସାଂସଦମାନେ ଏକ ଚିଠି ମଧ୍ୟ ଲେଖିଥିଲେ, ଯେଉଁଥିରେ କୁହାଯାଇଥିଲା ଯେ ଟ୍ରମ୍ପ ପ୍ରଶାସନ ଭାରତୀୟ ସାମଗ୍ରୀ ଉପରେ ୫୦% ଶୁଳ୍କ ବୃଦ୍ଧି କରିଛି ଏବଂ ଭାରତ ଉପରେ ଅତିରିକ୍ତ ୨୫% ଶୁଳ୍କ ଲାଗୁ କରିଛି । ଏହି ପଦକ୍ଷେପ ଭାରତୀୟ ନିର୍ମାତା ଏବଂ ଆମେରିକୀୟ ଗ୍ରାହକମାନଙ୍କୁ ପ୍ରଭାବିତ କରିଛି ଏବଂ ଯୋଗାଣ ଶୃଙ୍ଖଳାକୁ ବାଧାପ୍ରାପ୍ତ କରିଛି।

ଏକ ବାଣିଜ୍ୟିକ ଅଂଶୀଦାର ଭାବରେ ଭାରତର ଗୁରୁତ୍ୱକୁ ଉଜାଗର କରି ଆମେରିକୀୟ ସାଂସଦମାନେ କହିଛନ୍ତି, ଆମେରିକୀୟ ନିର୍ମାତାମାନେ ସେମିକଣ୍ଡକ୍ଟରଠାରୁ ସ୍ୱାସ୍ଥ୍ୟସେବା ଏବଂ ଶକ୍ତି ପର୍ଯ୍ୟନ୍ତ ବିଭିନ୍ନ କ୍ଷେତ୍ରରେ ପ୍ରମୁଖ ସାମଗ୍ରୀ ପାଇଁ ଭାରତ ଉପରେ ନିର୍ଭର କରନ୍ତି । ଭାରତରେ ନିବେଶ କରୁଥିବା ଆମେରିକୀୟ କମ୍ପାନୀଗୁଡ଼ିକ ବିଶ୍ୱର ଦ୍ରୁତତମ ବୃଦ୍ଧି ପାଉଥିବା ଗ୍ରାହକ ବଜାର ମଧ୍ୟରୁ ଗୋଟିଏରେ ପ୍ରବେଶ ପାଆନ୍ତି । ଆମେରିକାରେ ଭାରତୀୟ ନିବେଶ ସ୍ଥାନୀୟ ସମ୍ପ୍ରଦାୟ ପାଇଁ ନିଯୁକ୍ତି ଏବଂ ଆର୍ଥିକ ସୁଯୋଗ ସୃଷ୍ଟି କରିଛି।

ସେମାନେ ଚେତାବନୀ ଦେଇଛନ୍ତି ଯେ ନିରନ୍ତର ଶୁଳ୍କ ବୃଦ୍ଧି ଭାରତ ଏବଂ ଆମେରିକା ମଧ୍ୟରେ ଏହି ସମ୍ପର୍କକୁ ପ୍ରଭାବିତ କରୁଛି । ଚିଠିରେ ଏହା ମଧ୍ୟ କୁହାଯାଇଛି ଯେ ଟ୍ରମ୍ପ ପ୍ରଶାସନର ଏହି କାର୍ଯ୍ୟ ଭାରତକୁ ଚୀନ୍ ଏବଂ ଋଷର ନିକଟତର କରିଛି । କ୍ୱାଡରେ ଅଂଶଗ୍ରହଣ ସହିତ, ଭାରତ-ପ୍ରଶାନ୍ତ ମହାସାଗରୀୟ କ୍ଷେତ୍ରରେ ଭାରତର ଗୁରୁତ୍ୱ ନିରନ୍ତର ବୃଦ୍ଧି ପାଉଛି। ଚୀନ୍‌ର ମୁକାବିଲା ପାଇଁ ଭାରତ ଏକ ଉତ୍କୃଷ୍ଟ ଅଂଶୀଦାର ହୋଇପାରେ ବୋଲି ଡୋନାଲ୍ଡ ଟ୍ରମ୍ପଙ୍କୁ ଚିଠି ମାଧ୍ୟମରେ ଆମେରିକା ସାଂସଦ କହିଛନ୍ତି ।