ଉତ୍ତରପ୍ରଦେଶ ନୋଏଡାର ଗାର୍ଡେନ ଗ୍ୟାଲେରିଆ ମଲ୍ ପ୍ରାୟତଃ ଚର୍ଚ୍ଚାରେ ରହିଥାଏ । ନିକଟରେ ମଲ୍‌ରେ ବାଉନ୍ସରଙ୍କ ଗୁଣ୍ଡାରାଜକୁ ନେଇ ପୁଣି ଏହା ଚର୍ଚ୍ଚାକୁ ଆସିଛି । ଶୁକ୍ରବାର ବିଳମ୍ବିତ ରାତିରେ ଦୁଇ ଗୋଷ୍ଠୀ ମୁହାଁମୁହିଁ ହୋଇଥିଲେ । ଏହାପରେ ଉଭୟ ଗୋଷ୍ଠୀ ମଧ୍ୟରେ ମାରପିଟ ପରିସ୍ଥିତି ସୃଷ୍ଟି ହୋଇଥିଲା । ଏହି ଘଟଣାରେ ଯେତେବେଳେ ବାଉନ୍ସରମାନଙ୍କ ଏଣ୍ଟ୍ରି ହୋଇଥିଲା, ସେତେବେଳେ ବାଉନ୍ସରମାନେ ଜଣେ ଯୁବକକୁ ତଳେ ପକାଇ ପିଟିଥିଲେ । ଏହି ମାରପିଟର ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।

ମିଳିଥିବା ସୂଚନା ଅନୁସାରେ, ନୋଏଡା ଥାନା ସେକ୍ଟର ୩୯ ଅଧୀନସ୍ଥ ସେକ୍ଟର ୩୮ଠାରେ ଥିବା ଗାର୍ଡେନ ଗ୍ୟାଲେରିଆର ଏକ ବାର୍‌ରେ ଏହି ବିବାଦ ଉପୁଜିଥିଲା । ହଠାତ୍ ଦୁଇ ଗୋଷ୍ଠୀ କୌଣସି ଏକ ଘଟଣାକୁ ନେଇ ପରସ୍ପର ମଧ୍ୟରେ ମାରପିଟ କରିଥିଲେ । ଠିକ୍ ଏହି ସମୟରେ ମଲ୍‌ରେ ବାହାରେ ଜଗିଥିବା ବାଉନ୍ସର ଉକ୍ତ ସ୍ଥାନକୁ ଆସିଥିଲେ ଏବଂ ଜଣେ ଯୁବକଙ୍କୁ ଖୁବ ଜୋରରେ ମାଡ଼ ମାରିଥିଲେ । ଏହି ଘଟଣା ସମ୍ପର୍କରେ ପୋଲିସକୁ ଖବର ମିଳିବା ପରେ ସେଠାରେ ସେକ୍ଟର ୩୯ର ପୋଲିସ କର୍ମଚାରୀମାନେ ପହଞ୍ଚିଥିଲେ । ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ସଙ୍ଗେ ସଙ୍ଗେ ୭ ଜଣଙ୍କୁ ଗିରଫ କରିଛି ।

ନୋଏଡା ପୋଲିସର ମିଡିଆ ସେଲ୍‌ର କହିବା ମୁତାବକ, ଏକ ଘରୋଇ ବାର୍‌ରେ କିଛି ବ୍ୟକ୍ତି ନାଚଗୀତକୁ ନେଇ ପରସ୍ପର ମଧ୍ୟରେ ମୁହାଁମୁହିଁ ହୋଇଥିଲେ । ଏହି ସମୟରେ ହଠାତ୍ ସେଠାରେ ଏକାଧିକ ବାଉନ୍ସର ପହଞ୍ଚି ଜଣେ ବ୍ୟକ୍ତିଙ୍କୁ ଘେରି ଯାଇଥିଲେ । ଏହାପରେ ତାଙ୍କୁ ପ୍ରଥମେ ଚାପୁଡ଼ା ମାରିବା ସହ ତଳେ ପକାଇ ବିଧା ଗୋଇଠା ମାରିଥିଲେ । ଏହି ସମୟରେ ଆଉ କିଛି ବ୍ୟକ୍ତି ସେଠାରେ ପହଞ୍ଚି ବାଉନ୍ସରମାନଙ୍କୁ ରୋକିବାକୁ ଉଦ୍ୟମ କରିଥିଲେ । ପୋଲିସ ମାମଲାର ତଦନ୍ତ କରି ଉଭୟ ଗୋଷ୍ଠୀର ୭ ଜଣଙ୍କୁ ଗିରଫ କରିଛି । ଆଇନ ଅନୁଯାୟୀ ଆଗାମୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛି ପୋଲିସ । ସେପଟେ ଏହି ଭିଡିଓଟି ଭାଇରାଲ ହେବା ପରେ ଗ୍ରାହକଙ୍କ ସୁରକ୍ଷାକୁ ନେଇ ସାଧାରଣରେ ପ୍ରଶ୍ନ ଉଠିଛି । ଏହା ସହିତ ବାଉନ୍ସରମାନଙ୍କ ଏପରି ଅମାନବୀୟ ଭାବେ ଯୁବକଙ୍କୁ ମାଡ଼ ମାରିବାକୁ ମଧ୍ୟ ନିନ୍ଦା କରାଯାଇଛି । 

ଏଥିସହ ପଢନ୍ତୁ: ୨୦ ଟଙ୍କାର ଲାଞ୍ଚ, ୩୦ବର୍ଷର ଆଇନଗତ ଲଢେଇ; ଜେଲରୁ ବାହାରିବାର ଗୋଟିଏ ଦିନ ପରେ ମୃତ୍ୟୁ