ସୋସିଆଲ ମିଡିଆ ନିଶା ଯେ ବେଳେବେଳେ ଘାତକ ସାଜିପାରେ, ତାହା ଏହି ଘଟଣା ପ୍ରମାଣ କରିଛି । ଉତ୍ତରପ୍ରଦେଶ ବାନ୍ଦା ଜିଲ୍ଲାରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ଜଣେ ମହିଳା ରିଲ୍ କରିବା ସମୟରେ ଭୁଲବଶତଃ ନିଜ ଜୀବନ ନେଇଛନ୍ତି । ଏଠି ରିଲ୍ ହୋଇଯାଇଛି ରିଅଲ । ମୃତ୍ୟୁ ଘଟିବାର ଅଭିନୟ କରୁ କରୁ ବାସ୍ତବରେ ମହିଳାଙ୍କ ଜୀବନ ଯାଇଛି ।

• ରିଲ୍ ସୁଟ୍ ବେଳେ ଘଟିଲା ଅଘଟଣ

ମୃତ ମହିଳା ଜଣକ ହେଉଛନ୍ତି ୨୭ ବର୍ଷୀୟ ମୋହିନି । ତାଙ୍କ ପରିବାରର କହିବା ମୁତାବକ, ସେ ନିଜକୁ ଫାଶୀ ଦେବାର ଏକ ଭିଡିଓ ସୁଟ୍ କରୁଥିଲେ । ଏଥିଲାଗି ସେ ନିଜ ବେକରେ ଏକ କପଡ଼ା ବାନ୍ଧି ଷ୍ଟୁଲ୍ ଉପରେ ଛିଡ଼ା ହୋଇଥିଲେ । ଠିକ୍ ଏହି ସମୟରେ ଅସାବଧାନତା ବଶତଃ ତାଙ୍କର ଗୋଡ଼ ଖସି ବେକରେ ବନ୍ଧା ଯାଇଥିବା କପଡ଼ାଟି ଭିଡି ହୋଇଯାଇଥିଲା । ତେବେ ଏହି ଘଟଣାଟି କିପରି ଘଟିଲା ସେ ସମ୍ପର୍କରେ କିଛି ଜଣାପଡ଼ିନାହିଁ । ମହିଳା ଜଣକ ଏକାକୀ ଘର ଭିତରେ ରହି ସୁଟ୍ କରୁଥିବାରୁ ଏହା ଅସାବଧାନତା ଯୋଗଁ ଘଟିଥାଇପାରେ ବୋଲି ପୋଲିସ କହିଛି ।

• ଝୁଲନ୍ତା ମୃତଦେହ ଦେଖିଲା କୁନିଝିଅ

ଅନେକ ସମୟ ଧରି ମୋହିନୀଙ୍କ ଝୁଲନ୍ତା ମୃତଦେହ ରହିଥିଲା । ତାଙ୍କର ୪ ବର୍ଷର କୁନିଝିଅ ଘରକୁ ପ୍ରବେଶ କରେ ତ, ମାଆକୁ ଏପରି ଅବସ୍ଥାରେ ଦେଖି ଭୟରେ ଖୁବ ଜୋରରେ ଚିତ୍କାର କରିଥିଲା । ଏହି ସମୟରେ ଘଟଣାସ୍ଥଳରେ ସ୍ଥାନୀୟ ଲୋକମାନେ ପହଞ୍ଚିଥିଲେ । ସେମାନେ ତୁରନ୍ତ ଏନେଇ ପୋଲିସକୁ ଖବର ଦେଇଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିବା ସହ ଏକ ମାମଲା ରୁଜୁ କରିଛି । ମହିଳାଙ୍କ ମୃତଦେହକୁ ବ୍ୟବଚ୍ଛେଦ ପାଇଁ ପଠାଯାଇଥିବା ପୋଲିସ କହିଛି । ପୋଲିସ ସବୁ ଦିଗରୁ ତଦନ୍ତ କରୁଛି । ପ୍ରାରମ୍ଭିକ ତଦନ୍ତରେ ଏହା ଭିଡିଓ ସୁଟିଂ କରିବା ସମୟରେ ଏଭଳି ଅଭାବନୀୟ ଘଟଣା ଘଟିଯାଇଛି ବୋଲି ପୋଲିସ କହିଛି ।

ଏଥିସହ ପଢନ୍ତୁ: ମଲ୍‌ରେ ବାଉନ୍ସରଙ୍କ ଗୁଣ୍ଡାରାଜ; ଯୁବକଙ୍କୁ ତଳେ ପକାଇ ପିଟିଲେ