ଝିଅ ବିବାହ ଘର ପାଇଁ ରଖିଥିଲେ ଟଙ୍କା ଓ ସୁନା ଅଳଙ୍କାର । ଘରେ କେହି ନଥିବା ସୁଯୋଗ ନେଇ ଘରେ କଳା କନା ବୁଲାଇଛନ୍ତି ଚୋର । ରାତି ଅଧରେ ଝରକା ତାଡ଼ି ସୁନା ଗହଣାକୁ ଦୁର୍ବୃତ୍ତ ଲୁଟିନେଇଛନ୍ତି । ଘଟଣା ଜଣାପଡ଼ିବା ପରେ ଦମ୍ପତ୍ତି ଭାଙ୍ଗିପଡ଼ିଛନ୍ତି । ତେବେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।
ଭଦ୍ରକ ସହରରେ କିଛି ମାସ ବ୍ୟବଧାନ ପରେ ପୁଣି ମାତିଲେ ଲୁଟେରା ।

ଭଦ୍ରକ ଟାଉନ ଥାନା ଅଧୀନସ୍ଥ ମଠସାହିର ଗୌରହରି ସାହୁଙ୍କ ଘରର ଝରକା ତାଡି ଦୁର୍ବୃତ୍ତମାନେ ୧୫ ଭରିରୁ ଅଧିକ ଓଜନର ସୁନା ଅଳଙ୍କାର ସମେତ ନଗଦ ୧ ଲକ୍ଷ ଟଙ୍କା ଲୁଟି ନେଇଛନ୍ତି । ଗୌରହରି ଘରେ ଥିବାବେଳେ ତାଙ୍କ ପତ୍ନୀ ମେଡିକାଲ କେସ୍‌ରେ ବାଲେଶ୍ଵର ଯାଇଥିଲେ । ରାତିରେ ଗୌରହରି ଏକାକୀ ଥିବା ବେଳେ ଦୁର୍ବୃତ୍ତମାନେ ଘରର ଝରକାର ଗ୍ରୀଲ ତାଡ଼ିବା ସହ ଘର ଭିତରେ ପ୍ରବେଶ କରି ଲୁହା ଆଲମିରାରେ ଥିବା ଅଳଙ୍କାର ଓ ନଗଦ ଟଙ୍କା ନେଇ ଯାଇଛନ୍ତି ।

ଅନ୍ୟ ଏକ କୋଠରୀରେ ଶୋଇଥିବା ବେଳେ ଗୌରହରି କିଛି ଜାଣିପାରିନଥିଲେ । ସକାଳୁ ଝରକା ତଡ଼ାଯାଇଥିବା ନେଇ ପଡ଼ୋଶୀ ଦେଖିବା ପରେ ଚୋରି ନେଇ ଜଣାପଡ଼ିଥିଲା । ଝିଅ ବାହାଘର ପାଇଁ କିଣିଥିବା ଅଳଙ୍କାର ଓ ସାଇତି ଥିବା ଟଙ୍କା ଦୁର୍ବୃତ୍ତ ନେଇଯାଇଥିବାରୁ ଭାଙ୍ଗି ପଡ଼ିଛନ୍ତି ଦମ୍ପତି । ଏ ନେଇ ଟାଉନ ଥାନାରେ ଅଭିଯୋଗ ହେବା ପରେ ଘଟଣାସ୍ଥଳରେ ଟାଉନ ଥାନା ଅଧିକାରୀଙ୍କ ସମେତ ସାଇଣ୍ଟିଫିକ୍ ଟିମ ପକ୍ଷରୁ ସନ୍ଧାନୀ କୁକୁର ସହାୟତାରେ ତଦନ୍ତ ଆରମ୍ଭ କରାଯାଇଛି ।

ଲୁଟର ଶିକାର ହୋଇଥିବା ମହିଳା ବିନୋଦିନୀ ସାହୁ କହିଛନ୍ତି, "୫ ମାସ ତଳେ ନଗଦ ୫ ଭରି ସୁନା ଅଳଙ୍କାର କିଣିଥିଲୁ । ହେଲେ ଚୋରମାନେ ସବୁ ଲୁଟିନେଇଛନ୍ତି ।" ଦୁର୍ବୃତ୍ତ ୪ଟି ସୁନା ଚେନ୍, ଗୋଟିଏ ନେକଲେସ, ଗୋଟିଏ ବାହୁଟି, ଗୋଟିଓ ଚୂଡ, ୭ ହଳ କାନଫୁଲ, ଗୋଟିଏ ମଙ୍ଗଳସୂତ୍ର, ଗୋଟିଏ ବଡ଼ ନେକଲେସ୍, ୪ଟି ମୁଦି ଆଦି ଚୋରି ହୋଇଥିବା ମହିଳା ଜଣକ କହିଛନ୍ତି । ଝିଅ ବାହାଘର ପାଇଁ ସୁନା ଅଳଙ୍କାର ସାଇତି ଥିବାରୁ ପୋଲିସ ଖୁବଶୀଘ୍ର ତାଙ୍କ ସୁନା ଗହଣା ଫେରିପାଇବାରେ ସାହାଯ୍ୟ କରି ଚୋରଙ୍କୁ ଧରୁ ବୋଲି ଦମ୍ପତ୍ତି ଦାବି କରିଛନ୍ତି ।

ଏଥିସହ ପଢନ୍ତୁ: ଧୋକ୍କା ଦେଲା ଅଲିଅଳି ଝିଅ; ପ୍ରେମିକକୁ ପଠାଇଲା ମାଆର ନ୍ୟୁଡ୍ ଫଟୋ