ବାରବାଟୀ ଟି-୨୦ ପାଇଁ କ୍ରିକେଟ୍‌ ପ୍ରେମୀଙ୍କ ମଧ୍ୟରେ ପ୍ରବଳ ଉତ୍ସାହ । ଟିକେଟ୍‌ ଖଣ୍ଡେ ପାଇବା ପାଇଁ ପୂର୍ବ ରାତିରୁ ଆସି ଲାଇନ୍‌ରେ ଠିଆ ହୋଇଛନ୍ତି । ଷ୍ଟାଡିୟମ ଭିତରେ ନିଜ ପସନ୍ଦର ଖେଳାଳିଙ୍କୁ ଦେଖିବା ପାଇଁ ଶୀତ ରାତିରେ ଲମ୍ବା ଲାଇନ୍‌ରେ ଠିଆ ହୋଇଛନ୍ତି କ୍ରିକେଟ୍‌ ପ୍ରେମୀ । କିନ୍ତୁ କାଉଣ୍ଟରରେ ଦେଖିବାକୁ ମିଳିଛି ଭିନ୍ନ ଚିତ୍ର ।

ଅଧିକ ପଢ଼ନ୍ତୁ: 'ଟିକେଟ୍‌ ପାଇଁ ଆସିଛି...କିନ୍ତୁ ଏ ଭିଡ଼ ଦେଖି ମୁଣ୍ଡ ବୁଲାଇଲାଣି'

ଟିକେଟ କାଉଣ୍ଟର ଭିତରୁ କଳାବଜାରୀ ହେଉଛି କ୍ରିକେଟ୍‌ ଟିକେଟ । ଯାହାର ଲାଇଭ ଦୃଶ୍ୟ ଅର୍ଗସ କ୍ୟାମେରାରେ କଏଦ ହୋଇଛି । ବାହାରେ ହଜାର ହଜାର ସଂଖ୍ୟାରେ କ୍ରିକେଟ୍‌ ପ୍ରେମୀ ଟିକେଟ କିଣିବା ପାଇଁ ଗତ ରାତିରୁ ଲମ୍ବା ଲାଇନ ଲଗେଇଛନ୍ତି । ଆଉ ଏତିକି ବେଳେ ଗଳା ବାଟ ଦେଇ କିଛି କର୍ମଚାରୀ କାଉଣ୍ଟର ଭିତରେ ପଶିଲେ ଆଉ ଟିକେଟ୍‌ ବଣ୍ଡଲ ନେଇ ଛୁ ମାରିଲେ । ଯାହାକୁ ନେଇ ବାହାରେ ଟିକେଟ୍‌ ଅପେକ୍ଷାରେ ଥିବା ଜନ ସାଧାରଣଙ୍କ ମଧ୍ୟରେ ପ୍ରବଳ ଅସନ୍ତୋଷ ଦେଖିବାକୁ ମିଳିଛି ।

ସୂଚନା ଅନୁସାରେ ଡିସେମ୍ବର ୯ରେ ବାରବାଟୀ ଷ୍ଟାଡିୟମରେ ଖେଳାଯିବ ମହାମୁକାବିଲା । ମୁହାଁମୁହିଁ ହେବେ ଭାରତ-ଦକ୍ଷିଣ ଆଫ୍ରିକା । ଏଥିପାଇଁ ସମସ୍ତ ପ୍ରସ୍ତୁତି ପ୍ରାୟ ଶେଷ ପର୍ଯ୍ୟାୟରେ ପହଞ୍ଚିଛି । ଡିସେମ୍ବର ୧ ତାରିଖରେ ଅନଲାଇନ୍‌ରେ ଟିକେଟ୍‌ ବିକ୍ରି ହୋଇଥିଲା । ଆଉ ଆଜି ଅର୍ଥାତ ଡିସେମ୍ବର ୫ରେ ଅଫଲାଇନ୍‌ରେ ଦର୍ଶକଙ୍କ ପାଇଁ ଟିକେଟ୍‌ ବିକ୍ରି ଆରମ୍ଭ ହୋଇଛି । ସକାଳ ୯ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଟିକେଟ୍‌ ବିକ୍ରି ହେବ ।

କିନ୍ତୁ କାଉଣ୍ଟରରୁ ଖଣ୍ଡେ ଟିକେଟ୍‌ ପାଇବା ପାଇଁ ଗତକାଲି ସନ୍ଧ୍ୟାରେ କ୍ରିକେଟ୍‌ ପ୍ରେମୀ ଭିଡ଼ ଲଗାଇଛନ୍ତି । ଏମିତିକି ପୋଲିସ୍‌ର ବାରଣ ସତ୍ତ୍ବେ ଗୁରୁବାର ସନ୍ଧ୍ୟାରେ ହଠାତ୍‌ ହଜାର ହଜାର ଲୋକ ବାରବାଟୀ ଷ୍ଟାଡିୟମ ଆଡ଼କୁ ମାଡ଼ି ଆସିଥିଲେ । ପୋଲିସ୍ ଯେତେ ଘଉଡ଼ାଇଲେ ବି ସେମାନେ ସେଠାରୁ ଯାଇନଥିଲେ । ଟିକେଟ୍‌ ପାଇଁ ଲାଇନ୍‌ରେ ଠିଆ ହେବାକୁ ଠେଲାପେଲା ଓ ଧସ୍ତାଧସ୍ତି ସ୍ଥିତି ଉପୁଜିଥିଲା । ସାରା ରାତି ଭିଡ଼ ନିୟନ୍ତ୍ରଣ କରିବାକୁ ପୋଲିସ୍‌ ନାକେଦମ୍ ହୋଇଛି ।

ତେବେ ଗତକାଲି ସନ୍ଧ୍ୟାରୁ ଲାଇନ୍‌ରେ ଠିଆ ହେବା ପରେ ମଧ୍ୟ କିଛି ଦର୍ଶକ ଟିକେଟ୍‌ ନପାଇ ନିରାଶ ହୋଇଛନ୍ତି । ଜଣେ କ୍ରିକେଟ୍ ପ୍ରେମୀ କହିଛନ୍ତି, କାଲି ସନ୍ଧ୍ୟା ୭ଟାରୁ ଆସିଛି । ଲୋକ ଗତକାଲି ୨ଟାରୁ ଆସିଛନ୍ତି । ଏତେ ଲମ୍ବା ଲାଇନ୍‌ ଓ ଭିଡ଼ ଦେଖି ଆମେ ହାରିଗଲୁ ଆଜ୍ଞା । ଆମେ ଟିକେଟ୍‌ ନପାଇ ହତାଶ ହୋଇଗଲୁ । ବହୁତ ଆଶା ଥିଲା ଟିମ୍‌ ଇଣ୍ଡିଆକୁ ଚିୟର୍‌ କରିବାକୁ । କିନ୍ତୁ ମୋ ଆଶା ଆଶାରେ ରହିଗଲା ।