କିଛି ମାସର ବିରତି ପରେ ଅଷ୍ଟ୍ରେଲିଆ ଗସ୍ତ ସମୟରେ ପୁଣି ଅନ୍ତର୍ଜାତୀୟ କ୍ରିକେଟକୁ ଫେରିଛନ୍ତି ଟିମ୍ ଇଣ୍ଡିଆର ପୂର୍ବତନ ଅଧିନାୟକ ବିରାଟ କୋହଲି । ଅଷ୍ଟ୍ରେଲିଆ ବିପକ୍ଷରେ ଖେଳାଯାଇଥିବା ୩ ମ୍ୟାଚ୍‌ ବିଶିଷ୍ଟ ଦିନିକିଆ ସିରିଜ୍‌ରେ କୋହଲି ୭୪ ରନ୍‌ କରିଥିଲେ । ଅଷ୍ଟ୍ରେଲିଆ ବିପକ୍ଷରେ ପ୍ରଥମ ଦୁଇଟି ମ୍ୟାଚ୍‌ ଖାତା ଖୋଲିପାରିନଥିବା ବିରାଟ ତୃତୀୟ ଦିନିକିଆରେ ପୁରୁଣା ଫର୍ମକୁ ଫେରିଥିଲେ । ସିଡନୀରେ ଖେଳାଯାଇଥିବା ଶେଷ ଦିନିକିଆ ମ୍ୟାଚ୍‌ରେ ସେ ୭୪ ରନ୍‌ର ଦମଦାର ଇନିଂସ ଖେଳିଥିଲେ । ଅଷ୍ଟ୍ରେଲିଆ ଗସ୍ତ ପରେ ଦକ୍ଷିଣ ଆଫ୍ରିକା ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଏକଦିବସୀୟ ସିରିଜରେ କୋହଲି ଖେଳିବେ ବୋଲି ଆଶା କରାଯାଉଛି । ତେବେ ଏହାରି ମଧ୍ୟରେ ବିରାଟ କୋହଲିଙ୍କୁ ନେଇ ବଡ଼ ବୟାନ ଦେଇଛନ୍ତି ପୂର୍ବତନ କ୍ରିକେଟର ମହମ୍ମଦ କୈଫ ।

ମହମ୍ମଦ କୈଫ୍ ବିରାଟ କୋହଲିଙ୍କ ବିଷୟରେ ଏକ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି । ସେ କହିଛନ୍ତି ଯେ ବିବାହ ପରେ ବିରାଟ କୋହଲିଙ୍କର ଚିନ୍ତାଧାରା ଏବଂ ସ୍ୱଭାବ ବହୁତ ପରିବର୍ତ୍ତନ ହୋଇଛି । କୈଫଙ୍କ ଅନୁସାରେ, ଅନୁଷ୍କା ଶର୍ମାଙ୍କୁ ବିବାହ କରିବା ପରେ କୋହଲି ଅଧିକ ଶାନ୍ତ, ପରିପକ୍ୱ ଏବଂ ସନ୍ତୁଳିତ ହୋଇଛନ୍ତି । କୈଫ୍ ତାଙ୍କ ୟୁଟ୍ୟୁବ୍ ଚ୍ୟାନେଲରେ ଜଣେ ପ୍ରଶଂସକଙ୍କ ପ୍ରଶ୍ନର ଉତ୍ତର ଦେଇ କୋହଲିଙ୍କ ବିଷୟରେ ଏହି ମନ୍ତବ୍ୟ ଦେଇଛନ୍ତି ।

ଅଧିକ ପଢ଼ନ୍ତୁ: ଭାଙ୍ଗିଲା ଯୁବରାଜ ସିଂଙ୍କ ମହାରେକର୍ଡ, ୧୧ ବଲରେ ଅର୍ଦ୍ଧଶତକ କରି ଇତିହାସ ରଚିଲେ ଆକାଶ

ମହମ୍ମଦ କୈଫ୍ କହିଛନ୍ତି, 'ବିରାଟ କୋହଲି ଏବେ ଟିକେ ଶାନ୍ତ ହୋଇଯାଇଛନ୍ତି । ସେ ଏବେ ଜଣେ ପିତା ହୋଇସାରିଛନ୍ତି । ବିବାହ ପୂର୍ବରୁ ଏବଂ ପରେ ବହୁତ ପାର୍ଥକ୍ୟ ଅଛି । ମୁଁ ତାଙ୍କୁ ପଞ୍ଜାବ କିଙ୍ଗ୍ସ ବିପକ୍ଷରେ ଏକ IPL ମ୍ୟାଚ୍ ସମୟରେ ଭେଟିଥିଲି । ସେ ସେହି ମ୍ୟାଚରେ ଅର୍ଦ୍ଧଶତକ ହାସଲ କରି ଆରସିବିକୁ ଜିତାଇଥିଲେ । ମ୍ୟାଚ୍‌ ପରେ ଆମେ ତାଙ୍କ ସହ ଆଲୋଚନା କରିଥିଲୁ । ସେ ବହୁତ ଶାନ୍ତ ଥିଲେ । ସେ ସମୟରେ ସେ ମୋତେ କହିଥିଲେ ଯେ ଯଦି ମୁଁ ଆରମ୍ଭରୁ କଗିସୋ ରାବାଡାଙ୍କୁ ଆକ୍ରମଣ କରିନଥାନ୍ତି, ତେବେ ସେ ମୋତେ ଖେଳିବାକୁ ଦେଇ ନଥାନ୍ତେ ।

କୋହଲିଙ୍କ IPL ରେକର୍ଡ କିପରି ?

ସୂଚନା ଅନୁସାରେ, ବିରାଟ କୋହଲି T20 ଆନ୍ତର୍ଜାତୀୟ ଏବଂ ଟେଷ୍ଟ କ୍ରିକେଟରୁ ଅବସର ନେଇସାରିଛନ୍ତି । ଏହାର ଅର୍ଥ ସେ ଏବେ କେବଳ ODI ଫର୍ମାଟରେ ଭାରତ ପାଇଁ ଖେଳୁଛନ୍ତି । କୋହଲି ୨୦୦୮ ମସିହାରୁ ଇଣ୍ଡିଆନ ପ୍ରିମିୟର ଲିଗ୍ (IPL)ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଖେଳୁଛନ୍ତି । ବିରାଟ କୋହଲି IPLର ସବୁଠାରୁ ସଫଳ ବ୍ୟାଟ୍ସମ୍ୟାନ ।

କୋହଲି ତିନୋଟି ଫର୍ମାଟରେ ଭାରତୀୟ ଦଳ ପାଇଁ ୫୩୩ ମ୍ୟାଚ୍ ଖେଳି ୫୨.୨୧ ହାରରେ ୨୭ ହଜାର ୬୭୩ ରନ୍‌ କରିଛନ୍ତି । ସେ ଅନ୍ତର୍ଜାତୀୟ କ୍ରିକେଟରେ ୮୨ ଶତକ ଏବଂ ୧୪୪ ଅର୍ଦ୍ଧଶତକ ହାସଲ କରିଛନ୍ତି । ସେହିପରି କିଙ୍ଗ୍‌ କୋହଲି ଏପର୍ଯ୍ୟନ୍ତ ୨୬୭ IPL ମ୍ୟାଚରେ ୩୯.୫୪ ହାରରେ ୮୬୬୧ ରନ୍‌ କରିଛନ୍ତି । ଯେଉଁଥିରେ ୮ ଶତକ ଏବଂ ୬୩ ଅର୍ଦ୍ଧଶତକ ଅନ୍ତର୍ଭୁକ୍ତ ।