ଭାରତ-ଦକ୍ଷିଣ ଆଫ୍ରିକା ଦିନିକିଆ ସିରିଜ୍‌ ୧-୧ରେ ବରାବର ରହିଛି । ରାଞ୍ଚିରେ ଖେଳାଯାଇଥିବା ପ୍ରଥମ ଦିନିକିଆରେ ଦମଦାର ବିଜୟ ହାସଲ କରିଥିଲା ଟିମ୍ ଇଣ୍ଡିଆ । କିନ୍ତୁ ରାୟପୁର ଦିନିକିଆରେ ଭାରତୀୟ ଦଳ ୪ ଓ୍ବିକେଟରେ ପରାଜୟ ବରଣ କରିଛି । ଟିମ୍ ଇଣ୍ଡିଆ ଦକ୍ଷିଣ ଆଫ୍ରିକା ସାମ୍ନାରେ ୩୫୯ ରନ୍‌ର ବିଶାଳ ଟାର୍ଗେଟ ରଖିବା ପରେ ମଧ୍ୟ ପରାଜୟର ସ୍ବାଦ ଚାଖିଛି । ଏହି ବିଜୟ ସହିତ ଦକ୍ଷିଣ ଆଫ୍ରିକା ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜକୁ ୧-୧ରେ ବରାବର କରିଛି । ସିରିଜ୍‌ର ଶେଷ ମ୍ୟାଚ୍‌ ଡିସେମ୍ବର ୬ରେ ବିଶାଖାପାଟଣାରେ ଖେଳାଯିବ । ଯାହା ଉଭୟ ଦଳ ପାଇଁ କର ବା ମର ପ୍ରମାଣିତ ହେବ ।

ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜରେ ଭାରତୀୟ ଦଳର ବୋଲିଂ ଅତ୍ୟନ୍ତ ସାଧାରଣ ରହିଛି । ବିଶେଷ କରି ଦ୍ରୁତ ବୋଲର ପ୍ରସିଦ୍ଧ କ୍ରିଷ୍ଣା ନୈରାଶଜନକ ପ୍ରଦର୍ଶନ କରିଛନ୍ତି । ରାଞ୍ଚି ଦିନିକିଆରେ ପ୍ରସିଦ୍ଧ ୬.୫୪ ଇକୋନୋମି ରେଟ୍‌ରେ ୪୮ ରନ୍‌ ଦେଇଥିଲେ । ସେହିପରି ରାୟପୁର ଦିନିକିଆରେ ପ୍ରସିଦ୍ଧ ୮.୨ ଓଭରରେ ୮୫ ରନ୍ ଦେଇଥିଲେ । ଯଦି ସେ ପୂରା ୧୦ ଓଭର ବୋଲିଂ କରିଥାନ୍ତେ, ତେବେ ସେ ଶତକ ହାସଲ କରିପାରିଥାନ୍ତେ । ରାୟପୁର ଦିନିକିଆ ସମୟରେ ଭାରତୀୟ ଅଧିନାୟକ କେଏଲ ରାହୁଲ ମଧ୍ୟ ତାଙ୍କ ଖରାପ ବୋଲିଂକୁ ନେଇ ବିରକ୍ତି ପ୍ରକାଶ କରିଥିଲେ ।

ପ୍ରସିଦ୍ଧ କ୍ରିଷ୍ଣା ଏବେ ତାଙ୍କ ଖରାପ ପ୍ରଦର୍ଶନ ପାଇଁ ପ୍ରଶ୍ନ ଘେରରେ ରହିଛନ୍ତି । ଅନ୍ତର୍ଜାତୀୟ କ୍ରିକେଟର ତିନୋଟି ଫର୍ମାଟରେ ତାଙ୍କର ରେକର୍ଡ ଆଶ୍ଚର୍ଯ୍ୟଜନକ, ସେ ସବୁ ଫମାର୍ଟରେ ବହୁ ସଂଖ୍ୟକ ରନ ଦେଇଛନ୍ତି । ଯାହାଫଳରେ ତାଙ୍କୁ ପ୍ରଶଂସକମାନେ "ରନ ମେସିନ" ବୋଲି କହୁଛନ୍ତି ।

ଅଧିକ ପଢ଼ନ୍ତୁ: ବିରାଟ କୋହଲି ହାସଲ କରିପାରିବେ କି ୧୦୦ 'ଶତକ' ? ବଡ଼ ବୟାନ ଦେଲେ ଆକାଶ ଚୋପ୍ରା

ପ୍ରସିଦ୍ଧ କ୍ରିଷ୍ଣା ଘରୋଇ କ୍ରିକେଟରେ ତାଙ୍କର ପ୍ରଭାବଶାଳୀ ପ୍ରଦର୍ଶନ ବଳରେ ଭାରତୀୟ ଦଳରେ ସ୍ଥାନ ପାଇଥିଲେ । କିନ୍ତୁ ସମ୍ପ୍ରତି ତାଙ୍କର ଇକୋନୋମି ହାର କ୍ରମାଗତ ଭାବରେ ହ୍ରାସ ପାଇଛି । କ୍ରିଷ୍ଣା ଟେଷ୍ଟ ମ୍ୟାଚ୍‌ରେ ୩୪.୩୬ ହାରରେ ୨୨ ୱିକେଟ୍ ନେଇଛନ୍ତି। ତଥାପି ଏହି ଫର୍ମାଟରେ ତାଙ୍କର ଇକୋନୋମି ହାର ୪.୭୨ ରହିଛି । ଯାହା ଟେଷ୍ଟ କ୍ରିକେଟ୍‌ରେ ଯେକୌଣସି ବୋଲରଙ୍କ ପାଇଁ ଖରାପ ବୋଲି ବିବେଚନା କରାଯାଏ।

ଡାହାଣହାତୀ ଦ୍ରୁତ ବୋଲର ପ୍ରସିଦ୍ଧ ୨୦ ଦିନିକିଆରେ ୨୮.୦୯ ହାରରେ ୩୩ ୱିକେଟ୍ ନେଇଛନ୍ତି। ଏକଦିବସୀୟ କ୍ରିକେଟ୍‌ରେ ତାଙ୍କର ଇକୋନୋମି ହାର ୫.୯୮ କିମ୍ବା ୬ ପାଖାପାଖି । ମିଡିଲ୍‌ ଏବଂ ଡେଥ୍ ଓଭରରେ ରନକୁ ନିୟନ୍ତ୍ରଣ କରିବାରେ ତାଙ୍କର ଅକ୍ଷମତା ଭାରତୀୟ ଦଳ ଉପରେ ଚାପ ବୃଦ୍ଧି କରୁଛି ।

ଗତ ୫ଟି ODIରେ ପ୍ରସିଦ୍ଧ କ୍ରିଷ୍ଣାଙ୍କ ପ୍ରଦର୍ଶନ

୮.୨ ଓଭର - ୮୫ ରନ, ୨ ୱିକେଟ
୭.୨ ଓଭର - ୪୮ ରନ, ୧ ୱିକେଟ
୭ ଓଭର - ୫୨ ରନ, ୧ ୱିକେଟ
୫ ଓଭର - ୪୫ ରନ, ୧ ୱିକେଟ
୬ ଓଭର - ୫୬ ରନ, ୨ ୱିକେଟ

T-20 ଆନ୍ତର୍ଜାତୀୟ ମ୍ୟାଚରେ ପ୍ରସିଦ୍ଧ ୫ଟି ମ୍ୟାଚ୍ ଖେଳି ୨୭.୫୦ ହାରାହାରି ୮ ୱିକେଟ ନେଇଛନ୍ତି। କ୍ରିକେଟର ସବୁଠାରୁ ଛୋଟ ଫର୍ମାଟରେ ଭାରତୀୟ ଦଳ ପାଇଁ କ୍ରିଷ୍ଣଙ୍କ ଇକୋନୋମି ହାର ୧୧.୦୦ ରହିଛି । ଯାହା ଯେକୌଣସି ବୋଲରଙ୍କ ପାଇଁ ଅତ୍ୟନ୍ତ ଚିନ୍ତାଜନକ । ସେ ୨୦୨୩ ନଭେମ୍ବରରେ ଅଷ୍ଟ୍ରେଲିଆ ବିପକ୍ଷରେ ଗୌହାଟୀ T-୨୦ ମ୍ୟାଚରେ ୬୮ ରନ ଦେଇଥିଲେ । ଯାହା ଏହି ଫର୍ମାଟରେ ଜଣେ ଭାରତୀୟ ବୋଲରଙ୍କ ଦ୍ୱାରା ସବୁଠାରୁ ମହଙ୍ଗା ବୋଲିଂ ଥିଲା ।

ଭାରତ ପାଖରେ ପେସ୍ ବୋଲିଂ ୟୁନିଟ୍‌ରେ ଜସପ୍ରିତ ବୁମରାହ, ମହମ୍ମଦ ସିରାଜ, ଅର୍ଶଦୀପ ସିଂହ, ହର୍ଷିତ ରାଣା, ମହମ୍ମଦ ଶାମି, ଅଂଶୁଲ କମ୍ବୋଜ ଏବଂ ଆକାଶ ଦୀପଙ୍କ ଭଳି ବିକଳ୍ପ ଅଛନ୍ତି । ତେଣୁ ୨୯ ବର୍ଷୀୟ ପ୍ରସିଦ୍ଧଙ୍କୁ ଶୀଘ୍ର ତାଙ୍କର ପ୍ରଦର୍ଶନରେ ଉନ୍ନତି ଆଣିବାକୁ ପଡିବ, ନଚେତ୍ ସେ ଭାରତୀୟ ଦଳରୁ ବିଦା ହୋଇପାରନ୍ତି ।