ରବିବାର ଟି-୨୦ ବିଶ୍ବକପ୍‌ରେ ଖେଳାଯିବ ମହାମୁକାବିଲା । ମୁହାଁମୁହିଁ ହେବେ ଦୁଇ ପାରମ୍ପାରିକ ପ୍ରତିଦ୍ବନ୍ଦୀ ଭାରତ-ପାକିସ୍ତାନ । ଶ୍ରୀଲଙ୍କାର କଲମ୍ବୋରେ ଖେଳାଯିବ ଏହି ହାଇଭୋଲଟେଜ୍ ମ୍ୟାଚ୍‌ । ସଲମାନ ଅଲି ଆଗା ରବିବାର ହେବାକୁ ଥିବା ଭାରତ ବନାମ ପାକିସ୍ତାନ ମ୍ୟାଚରେ ଅଭିଷେକ ଶର୍ମା ଖେଳିବା ପାଇଁ ଇଚ୍ଛା ପ୍ରକାଶ କରିଛନ୍ତି । ୨୦୨୬ ଟି-୨୦ ବିଶ୍ୱକପରେ ସମସ୍ତେ ଏହି ମ୍ୟାଚକୁ ଉତ୍ସାହର ସହିତ ଅପେକ୍ଷା କରିଛନ୍ତି ।

ଆମେରିକା ବିପକ୍ଷ ମ୍ୟାଚ୍ ପୂର୍ବରୁ ଅଭିଷେକ ଶର୍ମାଙ୍କ ସ୍ୱାସ୍ଥ୍ୟାବସ୍ଥା ଖରାପ ହୋଇଥିଲା, କିନ୍ତୁ ସେ ସେହି ମ୍ୟାଚ୍ ଖେଳିଥିଲେ। ଏହା ପରେ, ଅଭିଷେକଙ୍କୁ ଦିଲ୍ଲୀରେ ଦୁଇ ଦିନ ପାଇଁ ହସ୍ପିଟାଲରେ ରଖାଯାଇଥିଲା । ଯଦିଓ ସେ ନାମିବ୍ୟା ବିପକ୍ଷ ମ୍ୟାଚ୍ ପୂର୍ବରୁ ଦଳରେ ପୁନର୍ବାର ଯୋଗ ଦେଇଥିଲେ । କିନ୍ତୁ ଅଭିଷେକ ସେହି ମ୍ୟାଚ୍‌ ଖେଳିନଥିଲେ । ତେବେ ସେ ପାକିସ୍ତାନ ବିପକ୍ଷ ମ୍ୟାଚ୍‌ ଖେଳିବେ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । କିନ୍ତୁ ଏହାରି ମଧ୍ୟରେ ଶନିବାର ସାମ୍ବାଦିକ ସମ୍ମିଳନୀରେ ପାକିସ୍ତାନ ଅଧିନାୟକ ସଲମାନ ଅଲି ଆଗା ଏକ ଚ୍ୟାଲେଞ୍ଜିଂ ସ୍ୱରରେ କହିଛନ୍ତି ଯେ ସେ ଅଭିଷେକଙ୍କୁ ଖେଳିବାକୁ ଚାହାଁନ୍ତି କାରଣ ସେ ଭାରତର ସର୍ବୋତ୍ତମ ଦଳକୁ ସାମ୍ନା କରିବାକୁ ଚାହାଁନ୍ତି ।

ପାକିସ୍ତାନ ଅଧିନାୟକ ସଲମାନ ଅଲି ଆଗା ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, "ମୁଁ ଆଶା କରୁଛି ଅଭିଷେକ ଶର୍ମା ସୁସ୍ଥ ହେଉଛନ୍ତି ଏବଂ ରବିବାରର ମ୍ୟାଚ୍ ଖେଳିବେ । ଆମେ ସର୍ବୋତ୍ତମ ଦଳ ବିପକ୍ଷରେ ଖେଳିବାକୁ ଚାହୁଁଛୁ।" ଭାରତ ବନାମ ପାକିସ୍ତାନ ମ୍ୟାଚ୍ ରବିବାର, ଫେବୃଆରୀ ୧୫ ତାରିଖ ସନ୍ଧ୍ୟା ୭ଟାରୁ କଲମ୍ବୋର ଆର. ପ୍ରେମଦାସା ଷ୍ଟାଡିୟମରେ ଖେଳାଯିବ।

ଉସମାନ ତାରିକଙ୍କ ବୋଲିଂ ଆକ୍ସନ ବିଷୟରେ ଉଠାଯାଇଥିବା ପ୍ରଶ୍ନ ସମ୍ପର୍କରେ ସଲମାନ ଅଲି କହିଛନ୍ତି, "ସେ ଦୁଇଥର ଆଇସିସି ପରୀକ୍ଷାରେ ପାସ୍ କରିଛନ୍ତି । ମୁଁ ଜାଣିନାହିଁ କାହିଁକି ଏହାକୁ ନେଇ ଏତେ ହଙ୍ଗାମା ହେଉଛି । ଉସମାନ ତାରିକ ଏସବୁ ବିଷୟରେ ଅଧିକ ଚିନ୍ତା କରନ୍ତି ନାହିଁ କାରଣ ସେ ଖେଳିବା ଆରମ୍ଭ କରିବା ଦିନଠାରୁ ତାଙ୍କ ଆକ୍ସନ ବିଷୟରେ ଆଲୋଚନା ହୋଇଛି, ତେଣୁ ସେ ଏଥିରେ ଅଭ୍ୟସ୍ତ ।"

ଭାରତ ଏବଂ ପାକିସ୍ତାନ ପୂର୍ବରୁ ଆର. ପ୍ରେମଦାସା ଷ୍ଟାଡିୟମରେ ଥରେ ପରସ୍ପରର ମୁହାଁମୁହିଁ ହୋଇଛନ୍ତି, ଯେଉଁଠାରେ ଟିମ୍ ଇଣ୍ଡିଆ ପାକିସ୍ତାନକୁ ୮ ୱିକେଟରେ ପରାସ୍ତ କରିଥିଲା । ହେଡ୍-ଟୁ-ହେଡ୍‌ରେ ମଧ୍ୟ ଭାରତ ଅଗ୍ରଣୀ ରହିଛି । ଉଭୟଙ୍କ ମଧ୍ୟରେ ଖେଳାଯାଇଥିବା ୧୬ ଟି-୨୦ ଆନ୍ତର୍ଜାତୀୟ ମ୍ୟାଚ୍ ମଧ୍ୟରୁ ଭାରତ ୧୩ଟି ଏବଂ ପାକିସ୍ତାନ ୩ଟି ମ୍ୟାଚ୍‌ ଜିତିଛି ।
ପଢନ୍ତୁ ଏହି ଖବର: ଶିବରାତ୍ରିରେ କ୍ରିକେଟ୍‌ ଯୁଦ୍ଧ, କଲମ୍ବୋରେ ହେବ ଭାରତ-ପାକ୍ ହାଇଭୋଲଟେଜ୍ ଫାଇଟ୍