ISRO Historic Launch / ମହାକାଶକୁ ଯିବ ସବୁଠାରୁ ଶକ୍ତିଶାଳୀ 'ଆଖି', EOS-05 ଲଞ୍ଚ୍‌ର କାଉଣ୍ଟଡାଉନ୍ ଆରମ୍ଭ

ଅମରାବତୀ: ଭାରତ ପୁଣି ଥରେ ମହାକାଶରୁ ପୃଥିବୀ ଉପରେ ନଜର ରଖିବା କ୍ଷମତାକୁ ମଜଭୁତ କରିବାକୁ ଯାଉଛି । ଇସ୍ରୋର GSLV-F17 ମିଶନ EOS-05 ପୃଥିବୀ ପର୍ଯ୍ୟବେକ୍ଷଣ ଉପଗ୍ରହକୁ ସେପ୍ଟେମ୍ବର ୪ ଅର୍ଥାତ ଆଜି ରାତି ୨.୫୫ଟାରେ ଆନ୍ଧ୍ରପ୍ରଦେଶର ଶ୍ରୀହରିକୋଟାରୁ ଉଡ଼ାଣ କରିବ । ଏହି ମିଶନ କେବଳ ଏକ ଉପଗ୍ରହ ଲଞ୍ଚ୍ ନୁହେଁ ବରଂ ଭାରତର ପୃଥିବୀ ପର୍ଯ୍ୟବେକ୍ଷଣ, ବିପର୍ଯ୍ୟୟ ପରିଚାଳନା ଏବଂ ରଣନୈତିକ ନିରୀକ୍ଷଣ କ୍ଷମତା ଦିଗରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ହେବ । EOS-5 ଉପଗ୍ରହ ଏପର୍ଯ୍ୟନ୍ତ ଭାରତର ସବୁଠାରୁ ଆଧୁନିକ ଏବଂ ଶକ୍ତିଶାଳୀ 'ଆକାଶରେ ଆଖି' ହେବାକୁ ଯାଉଛି ।

• ଏହି ଲଞ୍ଚରୁ କ'ଣ ଲାଭ ମିଳିବ ?

EOS-05 ସାଟେଲାଇଟ୍‌କୁ ଜିଓସିଙ୍କ୍ରୋନାସ୍ କକ୍ଷପଥରେ ସ୍ଥାପନ କରାଯିବ, ଯାହା ପ୍ରାୟ ୩୬,୦୦୦ କିଲୋମିଟର ଉଚ୍ଚତାରୁ ଏକ ବିଶାଳ ଭୌଗୋଳିକ କ୍ଷେତ୍ରର ନିରନ୍ତର ତଦାରଖ ପ୍ରଦାନ କରିବ । ଏହାର ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ଏହାର ଉଚ୍ଚ-ଫ୍ରିକ୍ୱେନ୍ସି ଇମେଜିଂ । ଏହା କିଛି ନିର୍ଦ୍ଦିଷ୍ଟ କ୍ଷେତ୍ରଗୁଡ଼ିକର ପ୍ରତି ୫ ମିନିଟ୍‌ରେ ଫଟୋ ପଠାଇବ । ଏହାସହିତ ବିସ୍ତୃତ ଭାରତୀୟ କ୍ଷେତ୍ରର କଭରେଜ୍ ପ୍ରାୟ ପ୍ରତି ୩୦ ମିନିଟ୍‌ରେ ସମ୍ଭବ ହୋଇପାରିବ । ଏହା ବନ୍ୟା, ଘୂର୍ଣ୍ଣିବାତ୍ୟା, ଜଙ୍ଗଲ ନିଆଁ, କୃଷି ଏବଂ ପରିବେଶଗତ ପରିବର୍ତ୍ତନ ଉପରେ ନଜର ରଖିବାରେ ସାହାଯ୍ୟ କରିପାରିବ । ଚାଷ କ୍ଷେତ୍ରରେ ମଧ୍ୟ ସାଟେଲାଇଟ୍ ଇମେଜିଂ ଉପଯୋଗୀ ହେବ ।

Meet EOS-05 — a state-of-the-art Earth observation spacecraft and India’s first-ever imaging satellite from Geosynchronous orbit.

🗓️ 04 Sept 2026 | ⏰ 02:55 AM IST

Livestreaming starting from 02:25 AM IST onwardshttps://t.co/uCaGCKcwuC

For more information:…

— ISRO (@isro) September 2, 2026

• ଜାତୀୟ ସୁରକ୍ଷା ପାଇଁ ବି ଗୁରୁତ୍ୱପୂର୍ଣ୍ଣ

EOS-05 ମୁଖ୍ୟତଃ ଏକ ପୃଥିବୀ ପର୍ଯ୍ୟବେକ୍ଷଣ ଉପଗ୍ରହ, କିନ୍ତୁ ଏହାର ନିରନ୍ତର ପର୍ଯ୍ୟବେକ୍ଷଣ କ୍ଷମତା ଏହାକୁ ଜାତୀୟ ସୁରକ୍ଷା ପାଇଁ ଏକ ଗୁରୁତ୍ୱପୂର୍ଣ୍ଣ କରିଥାଏ । GSLV-F17 ସହିତ ଭାରତ କେବଳ ଏକ ଉପଗ୍ରହକୁ ମହାକାଶକୁ ଉତକ୍ଷେପଣ କରୁନାହିଁ, ବରଂ ନିଜର ପର୍ଯ୍ୟବେକ୍ଷଣ କ୍ଷମତାକୁ ଆହୁରି ମଜଭୁତ କରୁଛି । ଏହି କାରଣରୁ EOS-05କୁ ଭାରତର ନୂତନ 'ଆକାଶରେ ଆଖି' ବୋଲି କୁହାଯାଉଛି ।

ପଢନ୍ତୁ ଏହି ଖବର: ISROରେ କାହିଁକି ବଢ଼ୁଛି ବୈଜ୍ଞାନିକଙ୍କ ଇସ୍ତଫା ? କେନ୍ଦ୍ର ସରକାର ନେଲେ କଡ଼ା ପଦକ୍ଷେପ

• GSLV-F17 କାହିଁକି ଖାସ୍ ?

GSLV-F17 ରକେଟ୍ ପ୍ରାୟ ୫୧.୭ ମିଟର ଉଚ୍ଚ ଏବଂ ଏହାର ଉତକ୍ଷେପଣ କ୍ଷମତା ପ୍ରାୟ ୪୨୦.୫ ଟନ୍ । ଏହା ଏକ ତିନି-ସ୍ତରୀୟ ପ୍ରକ୍ଷେପଣ ଯାନ, ଯେଉଁଥିରେ ଏକ କ୍ରାୟୋଜେନିକ୍ ଉପର ପର୍ଯ୍ୟାୟ ଅନ୍ତର୍ଭୁକ୍ତ । ଏହି ପ୍ରଯୁକ୍ତିବିଦ୍ୟା ବ୍ୟବହାର କରି GSLVକୁ ଜିଓସିଙ୍କ୍ରୋନାସ୍ ଟ୍ରାନ୍ସଫର କକ୍ଷପଥକୁ ଭାରି ଉପଗ୍ରହ ପଠାଇବା ପାଇଁ ଡିଜାଇନ୍ କରାଯାଇଛି । ଏହି ଉଡ଼ାଣ ପ୍ରାୟ ୪ ମିଟର ବ୍ୟାସ ବିଶିଷ୍ଟ ଏକ କମ୍ପୋଜିଟ୍ ପେଲୋଡ୍ ଫେୟାରିଂ ବ୍ୟବହାର କରିବ । EOS-05 ସାଟେଲାଇଟ୍‌ର ଓଜନ ପ୍ରାୟ ୨୩୬୭ କିଲୋଗ୍ରାମ ।