ଏବେ ଅଧା ଦେଶରେ ପ୍ରଚଣ୍ଡ ଖରା ହେଉଛି । ଦିନରେ ଅସହ୍ୟ ଗରମ ଓ ରାତିରେ ବି ବାୟୁମଣ୍ଡଳ ଉଷ୍ମ ରହୁଛି । ଖରାରେ ଘରୁ ବାହାରିବା ମୁସ୍କିଲ ହୋଇପଡୁଛି । ଏହାରି ଭିତରେ ଏକ ଭୟାନକ ଖବର ଆସିଛି । ବାଇକ୍ ଚଲାଉଥିବାବେଳେ ଚାଳକଙ୍କ ବେକରେ ଫାଟିଛି ବ୍ଲୁଟୁଥ୍ ଇଅରଫୋନ୍ । ବିହାର ଛପରା ଜିଲ୍ଲାରୁ ଆସିଛି ଏହି ଖବର । ବାଇକ ଚାଳକଙ୍କୁ ଗମ୍ଭୀର ଆଘାତ ଲାଗିଥିବାବେଳେ ଏବେ ତାଙ୍କ ଚିକିତ୍ସା ଜାରି ରହିଛି ।

ଆହତ ଯୁବକ ଜଣକ ହେଉଛନ୍ତି ନଗର ଥାନା ଅଞ୍ଚଳର କଟହରି ବାଗ ଆର୍ଯ୍ୟନଗର ଅଧିବାସୀ ଘନଶ୍ୟାମ ମିଶ୍ରା । ଘଟଣା ପରେ ତାଙ୍କୁ ତୁରନ୍ତ ଚିକିତ୍ସା ପାଇଁ ଛପରା ସଦର ହସ୍ପିଟାଲକୁ ଅଣାଯାଇଥିଲା । ପ୍ରାଥମିକ ଚିକିତ୍ସା ପରେ ଡାକ୍ତର ତାଙ୍କୁ ଡିସଚାର୍ଜ କରିଛନ୍ତି । ଏବେ ପ୍ରବଳ ଖରା ଗରମରେ ବୈଦ୍ୟୁତିକ ଉପକରଣ ବି ଗରମ ହୋଇଯାଉଛି । ଏଣୁ ଆପଣ ମୋବାଇଲ, ଇଅରଫୋନ, ଇଅରବଡ୍ ଆଦି ବ୍ୟବହାର କରୁଥିବା ସମୟରେ ସାବଧାନ ରହିବା ଉଚିତ ।

• ବିସ୍ଫୋରଣକୁ ନେଇ ଏମିତି କହିଲେ ଆହତ

ଆହତ ଯୁବକ ଘନଶ୍ୟାମ ମିଶ୍ରା କହିଛନ୍ତି ଯେ ସେ ଲହଲାଦପୁର ବଜାର ଅଞ୍ଚଳରୁ ନିଜ ଗାମ ସାରି ବାଇକରେ ଛପରା ଆସୁଥିଲେ । ସବୁଦିନ ପରି ବାଇକ୍ ଚଲାଇବା ସମୟରେ ସେ ବେକରେ ବ୍ଲୁଟୁଥ୍ ଇଅରଫୋନକୁ ପକାଇଥିଲେ । ଛପରା ସହର ଆଉ ପ୍ରାୟ ୪ କିଲୋମିଟର ଥିବା ସମୟରେ ତାଙ୍କୁ ଇଅରଫୋନ ତଳେ ପ୍ରବଳ ଗରମ ଅନୁଭବ ହୋଇଥିଲା । ସେ କିଛି ବୁଝିବା ପୂର୍ବରୁ ହଠାତ୍ ଇଅରଫୋନଟି ଜୋରରେ ଶବ୍ଦ ଧରି ଫାଟିଥିଲା ଓ ତାଙ୍କ ସାର୍ଟ ଜଳିଯାଇଥିଲା ।

ଏହାପରେ ଘନଶ୍ୟାମ ତୁରନ୍ତ ବାଇକକୁ ରଖିଥିଲେ ଓ ସ୍ଥାନୀୟ ଲୋକଙ୍କ ସହାୟତାରେ ଜଳୁଥିବା ପୋଷାକକୁ ଚିରିଦେଇଥିଲେ । ଏହି ବିସ୍ଫୋରଣରେ ତାଙ୍କର ଛାତି ଓ ବେକ ତଳ ଭାଗ ଜଳିଯାଇଛି । ସ୍ଥାନୀୟ ଲୋକେ ତୁରନ୍ତ ତାଙ୍କୁ ହସ୍ପିଟାଲରେ ପହଞ୍ଚାଇଥିବାରୁ କିଛି ବଡ଼ ଅଘଟଣରୁ ଘନଶ୍ୟାମ ବର୍ତ୍ତିଯାଇଥିଲେ । ପ୍ରାରମ୍ଭିକ ଚିକିତ୍ସା ପରେ ଏବେ ସେ ଘରକୁ ଫେରିଛନ୍ତି ।

• ବ୍ୟାଟେରୀ ଓଭରହିଟ୍ ଯୋଗୁଁ ବିସ୍ଫୋରଣ

ଏହି ଘଟଣା ପରେ ବଢୁଥିବା ତାତି ଯୋଗୁଁ ଇଲେକ୍ଟ୍ରୋନିକ୍ ଉପକରଣ ବ୍ୟବହାରକୁ ନେଇ ଭୟ ଉପୁଜିଛି । ଜଣେ ଇଲେକ୍ଟ୍ରିକାଲ୍ ଇଞ୍ଜିନିୟରଙ୍କ କହିବାନୁସାରେ, ତାତି ବଢିଲେ ସବୁଠୁ ବଡ଼ ପ୍ରଭାବ ବ୍ୟାଟେରୀ ଦ୍ଵାରା ଚାଳିତ ରିଚାର୍ଜେବଲ୍ ଉପକରଣ ଉପରେ ପଡ଼େ । ଲଗାତାର ବ୍ଲୁଟୁଥ୍ କନେକ୍ଟ ରହିବା, ଗରମ ପରିବେଶ ଓ ବ୍ୟାଟେରୀ ଓଭରହିଟ୍ ହେବା ପରେ ବିସ୍ଫୋରଣ ଘଟିଥାଏ । ସେ ଲୋକଙ୍କୁ ପରାମର୍ଶ ଦେଇଛନ୍ତି ଯେ ପ୍ରବଳ ଖରାରେ ମୋବାଇଲ, ବ୍ଲୁଟୁଥ୍ ଇଅରଫୋନ୍‌ ପାୱାର୍ ବ୍ୟାଙ୍କ ଓ ଅନ୍ୟ ବୈଦ୍ୟୁତିକ ଉପକରଣଗୁଡ଼ିକୁ ବ୍ୟବହାର କରିବା ସମୟରେ ସାବଧାନ ରହିବା ଆବଶ୍ୟକ । ବିଶେଷ କରି ପ୍ରବଳ ଖରାରେ ଅଧିକ ସମୟ ଧରି ଏପରି ଉପକରଣର ବ୍ୟବହାରକୁ ହ୍ରାସ କଲେ, ଏପରି ଅଘଟଣରୁ ଲୋକେ ବର୍ତ୍ତିପାରିବେ ।

ପଢନ୍ତୁ ଏହି ଖବର: ପ୍ୟାଣ୍ଟ ପକେଟ୍‌ରେ ଫାଟିଲା ମୋବାଇଲ୍‌, ଅଳ୍ପକେ ବର୍ତ୍ତିଲେ ଯୁବକ