Mobile Blast in Pocket / ପ୍ୟାଣ୍ଟ ପକେଟ୍‌ରେ ଫାଟିଲା ମୋବାଇଲ୍‌, ଅଳ୍ପକେ ବର୍ତ୍ତିଲେ ଯୁବକ

ବରଗଡ଼ ପଦ୍ମପୁର ସହରରେ ଅଭାବନୀୟ ଘଟଣା । ପ୍ୟାଣ୍ଟ ପକେଟ୍‌ରେ ଫାଟିଲା ମୋବାଇଲ୍‌ । ରାସ୍ତାରେ ଯିବା ବେଳେ ଜଣେ ଯୁବକଙ୍କ ପ୍ୟାଣ୍ଟ ପକେଟ୍‌ରେ ଥିବା ମୋବାଇଲ୍ ଫୋନ୍‌ଟି ହଠାତ୍ ବ୍ଲାଷ୍ଟ ହୋଇଛି । ମୋବାଇଲ୍‌ଟି ଫାଟିବା ସହ ଯୁବକଙ୍କ ପ୍ୟାଣ୍ଟରେ ନିଆଁ ଲାଗି ଯାଇଥିଲା । ଯୁବକ ଜଣକ ଉପସ୍ଥିତ ବୁଦ୍ଧି ଖଟାଇ ତୁରନ୍ତ ଫୋନ୍‌କୁ ପକେଟରୁ କାଢ଼ି ବାହାରକୁ ଫିଙ୍ଗି ଦେଇଥିବାରୁ ଏକ ବଡ଼ ବିପଦରୁ ଅଳ୍ପକେ ରକ୍ଷା ପାଇଯାଇଛନ୍ତି ।

ସ୍ଥାନୀୟ ଜଣେ ଯୁବକ ପଦ୍ମପୁର ସହରର ଏକ ମୋବାଇଲ୍ ଦୋକାନରେ କାମ କରନ୍ତି । ମୋବାଇଲ୍‌କୁ ପ୍ୟାଣ୍ଟ ପକେଟ୍‌ରେ ରଖି ଘରକୁ ଫେରୁଥିଲେ । ଏହି ସମୟରେ ରାସ୍ତା ମଝିରେ ହଠାତ୍ ତାଙ୍କ ପ୍ୟାଣ୍ଟ ପକେଟ୍‌ ଭିତରେ ହିଁ ମୋବାଇଲ୍‌ଟି ଶବ୍ଦ କରି ଫାଟିଯାଇଥିଲା । ପ୍ରବଳ ଗ୍ରୀଷ୍ମ ପ୍ରବାହ ଓ ଅତ୍ୟଧିକ ଖରା ଯୋଗୁଁ ମୋବାଇଲ୍‌ଟି ଓଭରହିଟିଂ ହୋଇ ଫାଟିଥିବା ଅନୁମାନ କରାଯାଉଛି ।

ଅଧିକ ପଢ଼ନ୍ତୁ: ତାତିରୁ ତ୍ରାହି ନାହିଁ: ଆଜିଠୁ ଆହୁରି ବଢ଼ିବ ତାତି, ଆଗାମୀ ୫ ଦିନ ଯାଏଁ ହିଟ୍‌ୱେଭ ଆଲର୍ଟ ଜାରି

ସେପଟେ ଆକାଶରୁ ଅଗ୍ନି ବର୍ଷା ହେଉଥିବା ବେଳେ ତାତିର ତାଉରେ ଜଳୁଛି ପଶ୍ଚିମ ଓଡ଼ିଶା । କଲବଲ କରୁଛି ଉପକୂଳର ଅସହ୍ୟ ଗୁଳୁଗୁଳି । ସନ୍ତୁଳି ହେଉଛି ଜନଜୀବନ । ତେବେ ପ୍ରଚଣ୍ଡ ତାତି ଓ ଗୁଳୁଗୁଳିରେ ଜନଜୀବନ ଅସ୍ତବ୍ୟସ୍ତ ହେଉଥିବା ବେଳେ ଆହୁରି ୫ ଦିନ ଏଭଳି ସ୍ଥିତି ଜାରି ରହିବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି । ଉପକୂଳରେ ଉଚ୍ଚ ତାପମାତ୍ରା ସହ ଉଚ୍ଚ ଆଦ୍ରତା ହେତୁ ଅସହ୍ୟ ଗୁଳୁଗୁଳି ଅନୁଭୂତ ହେଉଛି ।