Father Son Killed / ଘରେ ହଠାତ୍ ଶୁଭିଲା ପ୍ରଚଣ୍ଡ ଢୋଢା ଶବ୍ଦ...ବାଣ ବିସ୍ଫୋରଣ ଘଟି ବାପାପୁଅ ମୃତ

ଜଗତସିଂହପୁର: ଜୀବନ କେତେ ବେଳେ କେଉଁ ମୋଡ଼ ନିଏ, ତାହା କେହି କହିପାରିବେ ନାହିଁ। ଆଶା, ସ୍ୱପ୍ନ ଓ ହସଖୁସିରେ ଭରା ଗୋଟିଏ ହସଖୁସିର ପରିବାର ଆଖି ପିଛୁଳାକେ ଏମିତି ଛାରଖାର ହୋଇଯିବ, ତାହା ବୋଧହୁଏ ମହିଳୋ ଗାଁର କେହି କେବେ କଳ୍ପନା ସୁଦ୍ଧା କରିନଥିବେ । ହଠାତ୍ ଘରେ ଭିତରେ ଶୁଭିଥିଲା ଢୋଢା ଶବ୍ଦ । ଆଉ ଅକାଳରେ ଚାଲିଗଲେ ବାପପୁଅ । ଜଗତସିଂହପୁର ତିର୍ତ୍ତୋଲ ଥାନା ମହିଳୋ ଗାଁରେ ଘଟିଛି ଏପରି ଦୁଃଖଦ ଘଟଣା । ଏହି ଘଟଣାରେ ପୂରା ଗାଁରେ ଖେଳିଯାଇଛି ଭୟର ବାତାବରଣ । 

• ପ୍ରଚଣ୍ଡ ଶବ୍ଦ କରି ବିସ୍ଫୋରଣ

ଦିନ ପ୍ରାୟ ୧୨ଟା ସମୟ । ଗାଁର ପରିବେଶ ବେଶ୍ ଶାନ୍ତ ଥିଲା। କିନ୍ତୁ ସେହି ଶାନ୍ତ ପରିବେଶକୁ ନିମିଷକେ ଚୋରମାର୍ କରିଦେଲା ଏକ ଶବ୍ଦ। ମନୋରଞ୍ଜନ ସ୍ୱାଇଁଙ୍କ ଘରେ ହଠାତ୍ ଘଟିଗଲା ଏକ ବାଣ ବିସ୍ଫୋରଣ । ବିସ୍ଫୋରଣର ତୀବ୍ରତା ଏତେ ଭୟଙ୍କର ଓ ପ୍ରଚଣ୍ଡ ଥିଲା ଯେ, ନିମିଷକ ମଧ୍ୟରେ କାନ୍ଥ ଓ ଛାତ ଫାଟି ଚୂରମାର୍ ହୋଇଗଲା । ଧୂଆଁ ଭିତରେ ହଜିଗଲା ଗୋଟିଏ ସୁନ୍ଦର ପରିବାରର ହସଖୁସି । ଏହି ଦୁର୍ଘଟଣାରେ ମନୋରଞ୍ଜନ ସ୍ୱାଇଁ ଓ ତାଙ୍କ ପୁଅ ସୌମ୍ୟ ସାହିଲ ସ୍ୱାଇଁଙ୍କ ଜୀବନ ଦୀପକୁ ଲିଭିଗଲା । ଘଟଣାସ୍ଥଳରେ ହିଁ ମନୋରଞ୍ଜନଙ୍କର ମୃତ୍ୟୁ ହୋଇଥିଲା ।

ପଢନ୍ତୁ ଏହି ଖବର: ବାହାରେ ଛୁଆ ଖେଳୁଥିଲେ ସାବଧାନ ! ୨ବର୍ଷର ଶିଶୁ ଗାଏବ, କାଖେଇ ନେଇଗଲେ ମହିଳା

• SCBରେ ପୁଅ ବି ଆଖି ବୁଜିଲା

ସେପଟେ ପୁଅ ସୌମ୍ୟ ଚିକିତ୍ସା ପାଇଁ କଟକ SCB ମେଡିକାଲରେ ଭର୍ତ୍ତି କରାଯାଇଥିବା ବେଳେ ଚିକିତ୍ସାଧୀନ ଅବସ୍ଥାରେ ଆଖି ବୁଜିଦେଲା । ବିସ୍ଫୋରଣର ତାଣ୍ଡବ ସେତିକିରେ ଅଟକି ନଥିଲା । ସେହି ଘରେ ଭଡ଼ାରେ ରହୁଥିବା ଜଣେ ଶିକ୍ଷକଙ୍କ ସମେତ ଅନ୍ୟ ୭ ଜଣ ବିସ୍ଫୋରଣରେ ଗୁରୁତର ଭାବେ ଆହତ ହୋଇଛନ୍ତି । ତିର୍ତ୍ତୋଲ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ବିସ୍ଫୋରଣର ପ୍ରକୃତ କାରଣ କ’ଣ, ତାହା ପୋଲିସ ତଦନ୍ତ ପରେ ସ୍ପଷ୍ଟ ହେବ । ଗୋଟିଏ ମୁହୂର୍ତ୍ତର ଅସାବଧାନତା କିମ୍ବା ଦୁର୍ଭାଗ୍ୟ କିପରି ସମ୍ପୂର୍ଣ୍ଣ ସଂସାରକୁ ଉଜାଡ଼ି ଦିଏ, ଏହି ଘଟଣା ତାର ପ୍ରତ୍ୟକ୍ଷ ପ୍ରମାଣ ।