Electric Shock / ବିଲରେ ହଳ କଲା ବେଳେ ଅଘଟଣ; ବିଦ୍ୟୁତ୍ ଆଘାତରେ ୨ ଯୁବକ ମୃତ

ଜଗତସିଂହପୁର: ବିଦ୍ୟୁତ୍ ଆଘାତରେ ୨ ଯୁବକ ମୃତ । ଜଗତସିଂହପୁର ସଦର ଥାନା ଅନ୍ତର୍ଗତ ବେନୁଖଣ୍ଡାରେ ଅଘଟଣ । ବିଲରେ ହଳ କରୁଥିବା ସମୟରେ ବିଦ୍ୟୁତ୍ ଆଘାତ ଲାଗି ମୃତ୍ୟୁ ଘଟିଥିବା ସୂଚନା । ମୃତ ଯୁବକ ଦୁଇଜଣ ହେଲେ ଅଜୟ କୁମାର ସାହୁ ଓ ସାଗର ଭୋଇ । ଉଭୟଙ୍କୁ ଗୁରୁତର ଅବସ୍ଥାରେ ଜଗତସିଂହପୁର ସଦର ମେଡିକାଲକୁ ନିଆଯାଇଥିଲା । ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଘଟଣାକୁ ନେଇ ସଦର ଥାନା ପୋଲିସ ତଦନ୍ତ ଆରମ୍ଭ କରିଛି ।

• କଣ ପୂରା ଘଟଣା ?

ବିଲରେ ଦୁଇ ଜଣ ଚାଷୀ ଜମିରେ କାମ କରୁଥିଲେ । ଏହି ସମୟରେ ସେମାନେ ବିଦ୍ୟୁତ୍‌ ତାର ସଂସ୍ପର୍ଶରେ ଆସିଯାଇଥିଲେ । ଏହାପରେ ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ତୁରନ୍ତ ହସ୍ପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ । ହସ୍ପିଟାଲରେ ପହଞ୍ଚିବା ପୂର୍ବରୁ ଉଭୟଙ୍କ ମୃତ୍ୟୁ ଘଟିସାରିଥିବା ଡାକ୍ତର କହିଛନ୍ତି । ସେପଟେ ଖବର ପାଇ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏନେଇ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।

ପଢନ୍ତୁ ଏହି ଖବର: ବଜ୍ରପାତ ନେଇଗଲା ୩ ଚାଷୀଙ୍କ ଜୀବନ, କ୍ଷେତରେ ଟଳିପଡ଼ିଲେ

ଅନ୍ୟପଟେ ମୃତ ସାଗର ଭୋଇଙ୍କ ବଡ଼ ଭାଇ ସାଙ୍ଘାତିକ ଅଭିଯୋଗ ଆଣିଛନ୍ତି । ମାଟି ତଳେ ଇଲେକଟ୍ରିକ୍ ଲାଇନ୍ ଯାଇଥିବାରୁ ଏହି ବିଦ୍ୟୁତ ଝଟକା ଲାଗିଥିବା ସେ ଅଭିଯୋଗ କରିଛନ୍ତି । ସେମାନେ ଚାଷବାସ କରି ଘର ଚଳାନ୍ତି । ଏବେ ସାନ ଭାଇର ମୃତ୍ୟୁ ପରେ ସେ ସମ୍ପୂର୍ଣ୍ଣ ଭାଙ୍ଗିପଡ଼ିଛନ୍ତି । ତାଙ୍କୁ କିଛି ଆର୍ଥିକ ସହାୟତା ଯୋଗାଇ ଦିଆଯାଉ ବୋଲି ସେ ସରକାରଙ୍କୁ ଅନୁରୋଧ କରିଛନ୍ତି ।

ଏଠାରେ ଉଲ୍ଲେଖଯୋଗ୍ୟ ଯେ, ଗତ କିଛି ଦିନ ତଳେ ଯାଜପୁରର ବଡ଼ଚଣା ଓ କେନ୍ଦୁଝରର ଆନନ୍ଦପୁରରେ ବଜ୍ରପାତରେ ୩ ଜଣ ଚାଷୀଙ୍କ ମୃତ୍ୟୁ ଘଟିଥିଲା । ବଡ଼ଚଣାର ଚଣ୍ଡିତଳ ଦଳିତ ସାହିର ବଜ୍ରାଘାତରେ ଜଣେ ଓ ବନ୍ଦାଳ ପଞ୍ଚାୟତ ଓଲର ଆଦିବାସୀ ସାହିରେ ଆଉ ଜଣଙ୍କର ମୃତ୍ୟୁ ଘଟିଥିଲା । ସେହିପରି ଆନନ୍ଦପୁର ଘସିପୁରା ଥାନା ଅନ୍ତର୍ଗତ କଇନିପୁରା ଗାଁର ଚୈତନ୍ୟ ସାହୁ ନାମକ ଚାଷୀ ତଳି ରୋଇବାକୁ ଗାଁ ନିକଟସ୍ଥ ଚାଷ ଜମିକୁ ଯାଇଥିବାବେଳେ ବଜ୍ରପାତରେ ଆଖି ବୁଜିଥିଲେ । ଏହି ଘଟଣା ଘଟିବାର ଗୋଟିଏ ଦିନ ପୂର୍ବରୁ ସୁବର୍ଣ୍ଣପୁର ଜିଲ୍ଲା ବିନିକା ଥାନା ଖୁର୍ଡିଆବାହାଲ ଗାଁର ଚାଷୀ ଗଙ୍ଗା ବାଗ ମଧ୍ୟ ବଜ୍ରାଘାତରେ ମୃତ୍ୟୁବରଣ କରିଥିଲେ ।