Flash Floods / ଗାଡ଼ି ଉପରେ ଖସିଲା ବଡ଼ ବଡ଼ ପଥର; ଜାତୀୟ ରାଜପଥ ଜାମ୍

ଶ୍ରୀନଗର: ଲଗାଣ ବର୍ଷା ଫଳରେ ଜମ୍ମୁକାଶ୍ମୀରରେ ସ୍ଥିତି ବେହାଲ । ସୋମବାର ଓ ମଙ୍ଗଳବାର ବାଦଲଫଟା ବର୍ଷା ଯୋଗୁଁ ଜମ୍ମୁକାଶ୍ମୀରଠାରୁ ଆରମ୍ଭ କରି ଉତ୍ତରାଖଣ୍ଡ, ହିମାଚଳ ପ୍ରଦେଶରେ ଭୂସ୍ଖଳନ ହୋଇଛି । ଜମ୍ମୁକାଶ୍ମୀରରେ ଏଯାବତ ୨୩ଟି ଜଣଙ୍କ ମୃତ୍ୟୁ ଘଟିଲାଣି ଏବଂ ୭ଜଣ ନିଖୋଜ ଅଛନ୍ତି । ହଠାତ୍ ଭୂସ୍ଖଳନ ଯୋଗୁଁ ଜମ୍ମୁକାଶ୍ମୀରର ଡୋଡାରେ ଜାତୀୟ ରାଜପଥରେ ବିଶାଳ ପଥର ଖସିପଡ଼ିଛି, ଯାହା ତଳେ କାର ଚାପି ହୋଇରହିଥିବାର ଭୟଙ୍କର ଦୃଶ୍ୟ ସାମ୍ନାକୁ ଆସିଛି ।

ସ୍ଥାନୀୟ ଅଧିକାରୀଙ୍କ ସୂଚନାଅନୁସାରେ, ବାନ୍ଦିପୋରା ଜିଲ୍ଲାର ଗୁରେଜ ଓ ତୁଲେଲ ଘାଟି ନିକଟରେ ସୋମବାର ବାଦଲଫଟା ବର୍ଷା ହୋଇଥିଲା । ଏହାପରେ ହଠାତ୍ ବନ୍ୟା ଆସିବାରୁ ଗଛଠୁ ଆରମ୍ଭ କରି ବଡ଼ ବଡ଼ ପଥର ଖସିବା କାରଣରୁ ଅନେକ ବାସଗୃହ କ୍ଷତିଗ୍ରସ୍ତ ହୋଇଛି । ଏହାବ୍ୟତୀତ କାରଗିଲର କରିକିଚୁ ଓ ବଦଗାମ ଅଞ୍ଚଳରେ ବନ୍ୟାପାଣି ଯୋଗୁଁ ଆବାସିକ ସମ୍ପତ୍ତି, ଯାନବାହନ ଓ ଚାଷଜମି ନଷ୍ଟ ହୋଇଛି । ଏଠାରେ କାହାର ମୃତାହତ ହୋଇନାହିଁ । କିଶନଗଙ୍ଗା ନଦୀର ଜଳସ୍ତର ବୃଦ୍ଧି ପାଇଥିବାରୁ ପର୍ଯ୍ୟଟକ ଓ ଟେଣ୍ଟ କଲୋନି ମାଲିକମାନେ ନଦୀ ନିକଟ ସ୍ଥାନକୁ ଖାଲି କରିଛନ୍ତି ।

• ଏଯାବତ ଗଲାଣି ୨୩ଜଣଙ୍କ ଜୀବନ

ଅଧିକାରୀଙ୍କ କହିବାନୁସାରେ, ଜମ୍ମୁକାଶ୍ମୀରରେ ବର୍ଷା ଯୋଗୁଁ ମୃତକଙ୍କ ସଂଖ୍ୟା ୨୩ରେ ପହଞ୍ଚିଛି । ପୁଞ୍ଚ ଜିଲ୍ଲାର ଲୋରନର ଉପର ଅଞ୍ଚଳରେ ପ୍ରବଳ ବର୍ଷା କାରଣରୁ ଏକ କଚ୍ଚା ଘର ବନ୍ୟାପାଣିରେ ବହିଯାଇଥିବାରୁ ଜଣେ ମହିଳା ଓ ତାଙ୍କର ୨ଟି ଛୁଆ ସହିତ ମୋଟ ୭ଜଣଙ୍କ ମୃତ୍ୟୁ ଘଟିଛି । ସେପଟେ ପୁଞ୍ଚ୍ ଓ ରଜୌରି ଜିଲ୍ଲାରେ ବର୍ଷା ଯୋଗୁଁ ୭ଜଣ ନିଖୋଜ ଅଛନ୍ତି ।

• ଜାତୀୟ ରାଜପଥରେ ବିଶାଳ ପଥର

ଏହାବ୍ୟତୀତ ବିଶାଳ ପଥର ଖସିବା ଯୋଗୁଁ ଜମ୍ମୁ-କିଶତୱାଡ ଜାତୀୟ ରାଜପଥ ବନ୍ଦ ହୋଇଯାଇଛି । ସେହିପରି ସୋମବାର ଡୋଡା ଜିଲ୍ଲାର ଡୋଡା-ବଟୋତ ଜାତୀୟ ରାଜପଥ ମଧ୍ୟ ଭୂସ୍ଖଳନ ଯୋଗୁଁ ବନ୍ଦ ହୋଇଯାଇଛି ଏବଂ ବିଶାଳ ପଥର ତଳେ ଗାଡ଼ି ଚାପି ହୋଇ ରହିଥିବା ଦେଖିବାକୁ ମିଳିଛି । ଜାତୀୟ ରାଜପଥରେ କାରଠୁ ଆରମ୍ଭ କରି ବଡ଼ ବଡ଼ ବସ୍ ମଧ୍ୟ ଫସି ରହିଛି । ସ୍ଥାନୀୟ ପ୍ରଶାସନ ପାହାଡ଼ କଟା ହୋଇ ନିର୍ମାଣ ହୋଇଥିବା ଏହି ରାସ୍ତାରେ ଅତି ସାବଧାନତାର ସହ ପଥର ହଟାଇବାକୁ ଉଦ୍ୟମ ଜାରି ରଖିଛି ।

ପଢନ୍ତୁ ଏହି ଖବର: ଲଗାଣ ମୌସୁମୀ ବର୍ଷା ଯୋଗୁଁ ଉପରମୁଣ୍ଡରେ ମାଡ଼ି ଆସିଲା ବନ୍ୟା ପାଣି; ଚାରିଆଡ଼େ ହାହାକାର

ସୂଚନା ଥାଉ କି ପ୍ରବଳ ବର୍ଷା ଯୋଗୁଁ ଉତ୍ତର ଭାରତରେ ପ୍ରକୃତିର ତାଣ୍ଡବ ଦେଖିବାକୁ ମିଳିଛି । ଉତ୍ତରାଖଣ୍ଡରେ ଅସ୍ଥାୟୀ ଭାବେ ଚାରିଧାମ ଯାତ୍ରାକୁ ବନ୍ଦ ରଖାଯାଇଛି । ଉତ୍ତରାଖଣ୍ଡରେ ଜାତୀୟ ରାଜପଥକୁ ମିଶାଇ ମୋଟ ୧୫୦ଟି ରାସ୍ତା ବନ୍ଦ ଅଛି । ବର୍ଷା ଯୋଗୁଁ ପ୍ରଥମରୁ ଦ୍ଵାଦଶ ଶ୍ରେଣୀ ପର୍ଯ୍ୟନ୍ତ ସମସ୍ତ ସ୍କୁଲକୁ ବନ୍ଦ ରଖାଯାଇଛି । ହିମାଚଳ ପ୍ରଦେଶରେ ମଧ୍ୟ ୩୬ଟି ରାସ୍ତାରେ ଯାତାୟାତ ବନ୍ଦ ରଖାଯାଇଛି । ଉତ୍ତର ପ୍ରଦେଶରେ ଆସନ୍ତା ୨୪ ଘଣ୍ଟା ଲାଗି ପ୍ରବଳ ବର୍ଷା ପାଇଁ ରେଡ୍ ଆଲର୍ଟ ଜାରି କରାଯାଇଛି । ସେହିପରି ଦିଲ୍ଲୀ ଲାଗି ଆସନ୍ତା ୨ଦିନ ପର୍ଯ୍ୟନ୍ତ ହଳଦିଆ ଚେତାବନୀ ଜାରି ହୋଇଛି । ଆସାମରେ ପ୍ରବଳ ବର୍ଷା ଯୋଗୁଁ ବନ୍ୟା ପରିସ୍ଥିତି ସୃଷ୍ଟି ହୋଇଛି । ସେଠାରେ ୨ଲକ୍ଷ ଲୋକେ ପ୍ରଭାବିତ ହୋଇଛନ୍ତି ।