Argus News - ଶକ୍ତ ଭୂମିକମ୍ପ ଝଟକାରେ ଥରିଲା ଜାପାନ; ସୁନାମି ଆଲର୍ଟ ପରେ ଆତଙ୍କ

ଆଜି ଜାପାନରେ ଏକ ଶକ୍ତିଶାଳୀ ଭୂମିକମ୍ପ ଲୋକଙ୍କ ମଧ୍ୟରେ ଆତଙ୍କ ସୃଷ୍ଟି କରିଛି । ଉତ୍ତର ଜାପାନରେ ୭.୪ ତୀବ୍ରତାର ଏହି ଭୂମିକମ୍ପ ଅନୁଭୂତ ହୋଇଥିବାବେଳେ ଉପକୂଳବର୍ତ୍ତୀ ଅଞ୍ଚଳରେ ସୁନାମି ସତର୍କତା ଜାରି କରାଯାଇଛି । ପ୍ରଶାସନ ଉପକୂଳବର୍ତ୍ତୀ ଅଞ୍ଚଳରେ ରହୁଥିବା ଲୋକଙ୍କୁ, ବିଶେଷକରି ହୋକ୍କାଇଡୋର ଇୱାଟେରେ ରହୁଥିବା ଲୋକଙ୍କୁ ତୁରନ୍ତ ନିରାପଦ ସ୍ଥାନ କିମ୍ବା ଉଚ୍ଚ ଅଞ୍ଚଳକୁ ସ୍ଥାନାନ୍ତର କରିବାକୁ କହିଛି । ସମୁଦ୍ରରେ ୩ ମିଟର ଉଚ୍ଚ ଢେଉ ଉଠିପାରେ, ଯାହା ଉପକୂଳରେ ପହଞ୍ଚିବା ସମୟରେ କ୍ଷତି କରିପାରେ ବୋଲି ଆଶଙ୍କା କରାଯାଇଛି ।

• ଅନେକ ଥର ମାଡ଼ି ଆସିପାରେ ସମୁଦ୍ର

ଜାପାନ ସରକାର ସତର୍କ କରାଇ ଦେଇଛନ୍ତି ଯେ ସୁନାମି ଢେଉ କେବଳ ଥରେ ନୁହେଁ ବରଂ ଅନେକ ଥର ଆସିପାରେ । ଏଣୁ ସରକାରଙ୍କ ଠାରୁ ପରବର୍ତ୍ତୀ ନିର୍ଦ୍ଦେଶ ନ ଆସିବା ପର୍ଯ୍ୟନ୍ତ ଲୋକମାନେ ସୁରକ୍ଷିତ ଅଞ୍ଚଳରେ ରହିବାକୁ ପରାମର୍ଶ ଦିଆଯାଇଛଇ । ଏହା ମଧ୍ୟ କୁହାଯାଇଛି ଯେ ତରଙ୍ଗ ଆଶାଠାରୁ ଶୀଘ୍ର କିମ୍ବା ବିଳମ୍ବରେ ଆସିପାରେ ଏବଂ ସେମାନଙ୍କର ଉଚ୍ଚତା ଆଶାଠାରୁ ଅଧିକ ହୋଇପାରେ ।

• ସମୁଦ୍ର କୂଳରେ ନ ରହିବାକୁ ପରାମର୍ଶ

ସମୁଦ୍ର କୂଳ ଏବଂ ନଦୀ ମୁହାଣରୁ ଦୂରେଇ ରହିବାକୁ ପରାମର୍ଶ ଦିଆଯାଇଛି, କାରଣ ସେଠାରେ ପାଣି ଆଖି ପିଛୁଳାକେ ବିଶାଳ ରୂପ ନେଇପାରେ । ଉଦ୍ଧାର ଏବଂ ଜରୁରୀକାଳୀନ ସେବା ସଜାଗ ରହିଛି ଏବଂ ଶକ୍ତ ଭୂମିକମ୍ପରେ ହୋଇଥିବା କ୍ଷୟକ୍ଷତିର ଆକଳନ କରାଯାଉଛି ।

ପଢନ୍ତୁ ଏହି ଖବର: ଶକ୍ତିଶାଳୀ ଭୂକମ୍ପ ଝଟକା କମ୍ପିଉଠିଲା ଭାନୁଆଟୁ

• ଜାପାନରେ କାହିଁକି ଅଧିକ ଭୂମିକମ୍ପ ହୁଏ ?

ଏଠାରେ କହି ରଖୁଛୁ କି, ଜାପାନ ବିଶ୍ୱର ସବୁଠାରୁ ଅଧିକ ଭୂମିକମ୍ପ ପ୍ରଭାବିତ ଦେଶଗୁଡ଼ିକ ମଧ୍ୟରୁ ଗୋଟିଏ । ଏହା ପ୍ରଶାନ୍ତ ମହାସାଗରୀୟ ବଳୟ ଅଞ୍ଚଳରେ ଅବସ୍ଥିତ, ଯେଉଁଠାରେ ୪ଟି ପ୍ରମୁଖ ଟେକ୍ଟୋନିକ୍ ପ୍ଲେଟ୍ ମିଶିଥାନ୍ତି । ପ୍ରତିବର୍ଷ ଏଠାରେ ପ୍ରାୟ ୧୫୦୦ ଭୂମିକମ୍ପ ହୁଏ, ଯାହା ବିଶ୍ୱର ମୋଟ ଭୂମିକମ୍ପର ପ୍ରାୟ ୧୮ ପ୍ରତିଶତ। ଯଦିଓ ଅଧିକାଂଶ ଭୂମିକମ୍ପ ମୃଦୁ ହୋଇଥାଏ, କେତେକ ସମୟରେ ବଡ଼ ଭୂମିକମ୍ପ ବହୁତ କ୍ଷୟକ୍ଷତି ଘଟାଇପାରେ । ୨୦୧୧ ମସିହାରେ ଏକ ବଡ଼ ଭୂମିକମ୍ପ ଏବଂ ସୁନାମି ଜାପାନରେ ବହୁତ କ୍ଷତି କରିଥିଲା । ଏହି ଘଟଣାକୁ '୨୦୧୧ ତୋହୋକୁ ଭୂମିକମ୍ପ' ବୋଲି କୁହାଯାଏ । ଏହି ଦୁଃଖଦ ଘଟଣାରେ ପ୍ରାୟ ୧୮,୫୦୦ ଲୋକଙ୍କ ମୃତ୍ୟୁ ଘଟିଥିବାବେଳେ ଅନେକ ନିଖୋଜ ହୋଇଯାଇଥିଲେ ।