ଅର୍ଗସ ବ୍ୟୁରୋ : ଜମ୍ମୁ ଓ କାଶ୍ମୀରକୁ ସ୍ଵତନ୍ତ୍ର ମାନ୍ୟତା ଦେଇଥିବା ଧାରା ୩୭୦ ଏବେ ଇତିହାସ ପାଲଟି ଯାଇଛି । ଆଗାମୀ ଦିନରେ ବି କେବଳ ଇତିହାସ ହୋଇ ରହିବ । ଧାରା ଫେରିବାର କୌଣସି ପ୍ରଶ୍ନ ଉଠୁନି । ଜମ୍ମୁ ଓ କଶ୍ମୀର ନିର୍ବାଚନ ପାଇଁ ଦଳୀୟ ଇସ୍ତାହାର ଉନ୍ମୋଚନ କାର୍ଯ୍ୟକ୍ରମରେ ଯୋଗଦେଇ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏମିତି ଦମ୍ଭୋକ୍ତି ଦେଖାଇଛନ୍ତି । ଶାହଙ୍କ ଏମିତି ଟିପ୍ପଣୀ ପରେ ଜୋର ଧରିଛି ରାଜନୀତି ।
କାଶ୍ମୀର ବିଧାନସଭାକୁ ନେଇ ଏବେ ପୁରା ଦେଶରେ ଚର୍ଚ୍ଚା ଜୋର ଧରିଛି । କାରଣ ପ୍ରାୟ ଏକ ଦଶନ୍ଧି ପରେ ହିଁ ଜମ୍ମୁରେ ହେଉଛି ନିର୍ବାଚନ । ଏହାରି ଭିତରେ କଂଗ୍ରେସ ଓ ଏନସି ମେଣ୍ଟ ହୋଇ ନିର୍ବାଚନ ଲଢିବାକୁ ଯାଉଛନ୍ତି । ନିର୍ବାଚନ ବୈତରଣୀ ପାର ହେବା ପୂର୍ବରୁ ବିରୋଧୀ ମେଣ୍ଟ କହିଛି, ଆମେ ବିଜୟୀ ହେଲେ ପୁଣି ଥରେ କାଶ୍ମୀରକୁ ଫେରିବ ଧାରା ୩୭୦ । ତେଣୁ ଏହାର ଦୃଢ଼ ଜବାବ ଦେଇ କେନ୍ଦ୍ରମନ୍ତ୍ରୀ ଶାହ କହିଛନ୍ତି, ମୁଁ ପୁରା ଦେଶବାସୀଙ୍କୁ ସ୍ପଷ୍ଟତାର ସହ କହିବାକୁ ଚାହୁଁଛି କି, ଧାରା ୩୭୦ ଇତିହାସ ପାଲଟିଯାଇଛି । ଏହା ଆଉ ଫେରିପାରିବ ନାହିଁ । ଜମ୍ମୁ-କଶ୍ମୀରରେ ଗତ ୧୦ ବର୍ଷ ମଧ୍ୟରେ ସରକାରଙ୍କ ବିଭିନ୍ନ କାର୍ଯ୍ୟକ୍ରମକୁ ପ୍ରଶଂସା କରି ଶାହ କହିଛନ୍ତି ଯେତେବେଳେ ମଧ୍ୟ ଭାରତ ଓ ଜମ୍ମୁ-କଶ୍ମୀରର ଇତିହାସ ଲେଖାଯିବ ସେତେବେଳେ ୨୦୧୪ରୁ ୨୦୨୪ ପର୍ଯ୍ୟନ୍ତ କାଳଖଣ୍ଡକୁ ସ୍ବର୍ଣ୍ଣାକ୍ଷରରେ ଲେଖାଯିବ ।
ନିର୍ବାଚନ ପୂର୍ବରୁ ବିକାଶ ନେଇ ବଡ଼ ବୟାନ ଦେଇଛନ୍ତି ଶାହ । କହିଛନ୍ତି, ରଜୌରିରେ ଏକ ପର୍ଯ୍ୟଟନ ହବ୍ କରାଯିବ ଏବଂ ୫ ଲକ୍ଷ ନିଯୁକ୍ତି ସୃଷ୍ଟି କରାଯିବ । କଶ୍ମୀର ପଣ୍ଡିତଙ୍କ ପ୍ରତ୍ୟାବର୍ତ୍ତନ ଓ ଥଇଥାନ ପାଇଁ ବିସ୍ଥାପିତ ସମାଜ ପୁନର୍ବାସ ଯୋଜନା ଆରମ୍ଭ କରାଯିବ । ଜମ୍ମୁ ଓ କଶ୍ମୀର ସର୍ବଦା ଭାରତର ଅବିଚ୍ଛେଦ୍ୟ ଅଙ୍ଗ ଏବଂ ୧୯୪୭ରୁ ଆମର ହୃଦୟର ନିକଟରେ ରହି । କାଶ୍ମୀରକୁ ନେଇ ସବୁବେଳେ ଚର୍ଚ୍ଚା ରହେ । ଖାସ କରି ଭାରତର ଅବଚ୍ଛେଦ ଅଙ୍ଗ ହୋଇଥିବାରୁ ଆଲୋଚନା ବି ହୁଏ । ହେଲେ ଏବେ ଯେଉଁପରି ଭାବରେ କଶ୍ମୀରରୁ ଧାରା ଉଠାଯିବ ବୋଲି ଯେଉଁପରି ଭାବରେ ବିରୋଧୀ କହିଲେ ତାହାକୁ ନେଇ ଚର୍ଚ୍ଚା ଜୋର ଧରିଛି ।