ମୟୂରଭଞ୍ଜ: ଗତକାଲି ରାତିରେ ବାରିପଦା ବସଷ୍ଟାଣ୍ଡରେ ଘଟିଯାଇଥିବା ଗଣ୍ଡଗୋଳ, ମାରପିଟ ଓ ହଣାକଟା ଘଟଣାରେ ରାତିରୁ ଘରୋଇ ବସ ଚଳାଚଳା ସମ୍ପୂର୍ଣ୍ଣ ବନ୍ଦ ରହିଛି । ଖାଁ ଖାଁ ଲାଗୁଛି ବାରିପଦା ଘରୋଇ ବସଷ୍ଟାଣ୍ଡ । କେବେ ସ୍ବଭାବିକ ହେବ ବସ ଚଳାଚଳ ତାର କୌଣସି ଖୋଜ ଖବର ମିଳିନଥିବାବେଳେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ବସଯାତ୍ରୀ । ହଠାତ ଏଭଳି ବସ ଚଳାଚଳ ବନ୍ଦ ଘଟଣାକୁ ଯାତ୍ରୀମାନେ ସହଜରେ ଗ୍ରହଣ କରିପାରୁନଥିବାବେଳେ ନିଜର ଅସନ୍ତୋଷ ପ୍ରକାଶ କରିଛନ୍ତି ବସଷ୍ଟାଣ୍ଡକୁ ଆସିଥିବା ଦୁରଦୁରାନ୍ତର ଯାତ୍ରୀ ।
ରାଇରଙ୍ଗପୁରରୁ ବ୍ରହ୍ମପୁର ଯାଉଥିବା ମା' ଦୁର୍ଗା ନାମକ ଏକ ଘରୋଇ ବସ ଚଳାଚଳ ସମୟକୁ ନେଇ ଗଣ୍ଡଗୋଳର ସୂତ୍ରପାତ ହୋଇଥିଲା । ଉକ୍ତ ବସଟି ରାଇରଙ୍ଗପୁରରୁ ବ୍ରହ୍ମପୁର, ଭାୟା ବାରିପଦା ହୋଇ ଆଜକୁ ୩ ବର୍ଷ ହେବ ଚଳାଚଳ କରିଆସୁଥିବା ବେଳେ ଗତକାଲି ସଠିକ ସମୟ ଅନୁସାରେ ବାରିପଦା ବସଷ୍ଟାଣ୍ଡକୁ ପସିବାକୁ ବାରଣ କରିବାରୁ ବଚସା ଓ ପରେ କଥା ହଣାକଟା ପର୍ଯ୍ୟନ୍ତ ଯାଇଥିଲା ।
ଏଥିରେ ୬ ଜଣ ଗୁରୁତର ହୋଇଥିବାବେଳେ ୩ ଜଣଙ୍କୁ କଟକ ମେଡ଼ିକାଲକୁ ସ୍ଥାନାନ୍ତର କରାଯାଇଛି । ଏହି ଘଟଣାରେ ବାରିପଦା ଟାଉନ ଥାନାରେ ଉଭୟ ପକ୍ଷରୁ ପୃଥକ ପୃଥକ ୨ଟି ମାମଲା ରୁଜୁ ହୋଇଥିବାବେଳେ ଉଭୟ ପକ୍ଷରୁ ୧୦ ଜଣଙ୍କୁ ଅଟକ ରଖି ଘଟଣାର ଅଧିକ ତଦନ୍ତ ଜାରି ରଖିଛି ବାରିପଦା ଟାଉନ ପୋଲିସ । ତେବେ ଘଟଣା ଯାହାବି ହୋଇଥାଉନା କାହିଁକି , ତୁରନ୍ତ ଘଟଣାର ସମାଧାନ କରି ବସ ଚଳାଚଳ ସ୍ବାଭାବିକ କରିବା ପାଇଁ ଦାବି କରିଛନ୍ତି ,ଯାତାୟାତରେ ସମ୍ମୁଖୀନ ହେଉଥିବା ଯାତ୍ରାମାନେ ।
ଆହୁରି ପଢନ୍ତୁ ଓଡିଶା ଖବର...