ଅର୍ଗସ ବ୍ୟୁରୋ : ଯେମିତି କିଏ ନିଶା ଔଷଧ ଦେଇ ଶୁଆଇ ଦେଇଛି ଆଉ ନିଦରୁ ଉଠୁନି ବିଏମସି । ବିଏମସିର ସବୁଜ ସୁନ୍ଦର ନାରା ଏହି ଅଳିଆ ପାହାଡ଼ରେ କେଉଁଠି ହଜିଯାଇଛି । ଗାଢ଼କଣ ଅଞ୍ଚଳର ଏହି  ଅସ୍ଥାୟୀ ଡମ୍ପିଂୟାର୍ଡର ଗନ୍ଧ ନାକ ଫୁଲାଇ ଦେଉଛି । ଟିକେ ମୃଦୁ ପବନ ହେଲେ ବାସ୍ ସରିଗଲା କଥା, ଗୋଟେ ବୋତଲ ଅତର ମାରିଲେ ବି କାମ ଦେଉନି । ଏହି ଫେଲ୍ ଯୋଜନା ଏବଂ ଏହି ପହାଡ଼ ନିର୍ମାଣର ଯୋଜନା ପଛରେ ଥିବା ବିଚକ୍ଷଣ ବୁଦ୍ଧିଙ୍କୁ କେଉଁ ସମ୍ମାନରେ ସମ୍ମାନିତ କରାଯିବ ୟା ଉପରେ ବୋଧେ ଗବେଷଣା ଚାଲିଥିବ । 

ଏପଟେ ବିଜେପି ୧୦ ଦିନ ହେଲା ସତ୍ୟାଗ୍ରହ କରୁଛି, ବାସ୍ ଗୋଟିଏ ଦାବି ଗାଢକଣା ଲୋକଙ୍କ ଜୀବନକୁ ନର୍କରୁ ବାହାର କରିବା । ହେଲେ ସ୍ଥାଣୁ ଭୁବନେଶ୍ବର ମହାନଗର ନିଗମ । ବିଏମସିର କେତେ ସୁନ୍ଦର ସୁନ୍ଦର ନାରା ।  ହେଲେ ନାରା ଆଉ କାମ ଭିତରେ ଆକାଶ ପାତାଳ ଫରକ। ଘରେ ଦୁଇଦିନ ଅଳିଆ ରହିଗଲେ ବଞ୍ଚିବା ମୁସ୍କିଲ ହେଇଯାଉଛି । 

ତେବେ ଭୁବନେଶ୍ବରକୁ ବିଏମସି ଦେଇଥିବା ଏହି ପାହାଡ଼କୁ ଦେଖନ୍ତୁ ଆଉ ଚିନ୍ତା କରନ୍ତୁ କେମିତି ରହୁଥିବେ ଲୋକେ । ମେୟର ଠାରୁ ଆରମ୍ଭ କରି କମିଶନର ପର୍ଯ୍ୟନ୍ତ ସମସ୍ତେ ନକ୍ସା ତିଆରି କରିବାରେ ବ୍ୟସ୍ତ । ହେଲେ ଏପଟେ ନକ୍ସାକୁ ପଛରେ ପକାଇ ଆକାଶ ଛୁଇଁବାକୁ ଯାଉଛି ଅଳିଆ ପାହାଡ଼ ।  ତେବେ କେବେ ଉଠୁଛି ଅଳିଆ ପାହାଡ଼, କେବେ ଭାଙ୍ଗୁଛି ବିଜେପିର ସତ୍ୟାଗ୍ରହ ତାହା ଦେଖିବାକୁ ଅପେକ୍ଷା ରହିଲା ।