ଅର୍ଗସ ବ୍ୟୁରୋ : ଏକ ତରଫା ପ୍ରେମର କରୁଣ କାହାଣୀ । ମହିଳାଙ୍କୁ ପାଇବାକୁ ସ୍ୱାମୀକୁ ରାସ୍ତାରୁ ହଟେଇଲା ହତ୍ୟାକାରୀ । ବାଲିପାଟଣା ଥାନା ଅନ୍ତର୍ଗତ ବନମାଳୀପୁର ନୂଆସାହି ନିକଟ ମହଲା ସାହିର ଅକ୍ଷୟ ମାଝୀଙ୍କୁ ଗତକାଲି ରାତିରେ ସଂଘବଦ୍ଧ ଭାବେ ମରଣାନ୍ତକ ଆକ୍ରମଣ ହୋଇଥିଲା । ଚିକିତ୍ସାଧୀନ ଅବସ୍ଥାରେ ଆଜି ସକାଳୁ ଅକ୍ଷୟଙ୍କ ମୃତ୍ୟୁ ଘଟିଛି ।
ଦୁର୍ବୃତ୍ତମାନେ ତାଙ୍କୁ ମାରଣାସ୍ତ୍ରରେ ଆକ୍ରମଣ ପରେ ଏକ ନିଛାଟିଆ ଜାଗାରେ ପକାଇ ଦେଇଥିଲେ । ସ୍ଥାନୀୟ ଲୋକମାନେ ତାଙ୍କୁ ଉଦ୍ଧାର କରି ବାଲିପାଟଣା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ଭୁବନେଶ୍ୱରର ବିଭିନ୍ନ ହସ୍ପିଟାଲକୁ ନେଇଥିଲେ । ମୃତ ଅକ୍ଷୟଙ୍କ ପତ୍ନୀ ଶ୍ରାବଣୀ ମାଝୀ ଆଜି ବାଲିପାଟଣା ଥାନାରେ କରିଛନ୍ତି ଅଭିଯୋଗ । ଅଭିଯୋଗ ଅନୁସାରେ ଏକତରଫା ପ୍ରେମ କାରଣରୁ ହୋଇଛି ଅକ୍ଷୟଙ୍କ ହତ୍ୟା । ପୂର୍ବରୁ ଅକ୍ଷୟଙ୍କ ସ୍ତ୍ରୀକୁ ସ୍ଥାନୀୟ ଗାଁର ଦିଲୁ ନାମକ ଯୁବକ ବାରମ୍ବାର ମୋବାଇଲରେ ଅଶ୍ଳୀଳ ମେସେଜ୍ ପଠାଇଥିଲେ। ଏହାକୁ ବିରୋଧ କରିଥିଲେ ଅକ୍ଷୟ ।
ଅଧିକ ପଢନ୍ତୁ ଓଡ଼ିଶା ଖବର
ପରେ ଅକ୍ଷୟ ଏବଂ ଦିଲୁ ହାତାହାତି ମଧ୍ୟ ହୋଇଥିଲେ। ସେହି ରାଗ ରଖି ଦିଲୁ ଏଭଳି କାଣ୍ଡ ଭିଆଇଛି ବୋଲି ବୋଲି ଚର୍ଚ୍ଚା ହେଉଛି । ଅଭିଯୋଗ ଆଧାରରେ ତଦନ୍ତ ଚାଲିଛି ବୋଲି କହିଛନ୍ତି ବାଲିପାଟଣା ଥାନା ଅଧିକାରୀ ସୂର୍ଯ୍ୟନାରାୟଣ ପାଢ଼ୀ । ଏକ ତରଫା ପ୍ରେମ ନା ଅନ୍ୟ କୌଣସି କାରଣରୁ ହତ୍ୟା ତାହା ତଦନ୍ତ ପରେ ଜଣା ପଡିବ।